Kapanjangan P3

Kisah Palui dan Kapanjangan P3

WAYAH ini bila ada piluang gawian atau jabatan kacak tarus, kada tahu mampukah atau kada mampu manyandang jabatan nitu.

”Aku handak bakesah wan buhan ikam Bus ai, Mak ai?” Palui mambuka pander.

“Kesah apa Lui, pina sarius banar?” sahut Garbus.

“Kesah kapanjangan P3,” jawab Palui.

“Umai rami banarlah, ikam pang urang bapulitik jua wayah ini, umpat rombongan parpol kalu mandaftar ka kantur KPU,” sambat Tulamak.

“Aku ne guru honor, kada usah umpat bapulitik praktis, tapi kalau manjalankan pulitik pandidikan nitu pasti pang sudah,” ujar Palui.

“Jadi angguta partai jua kalu ikam,” tangguh Garbus.

“Aku dasar kada umpat nah, tapi pulitik nang kujalanakan ne, pulitik pandidikan, kaya apa caranya anak didik supaya taat, patuh wan guru-gurunya di sakulahan nitu nang kumaksud pulitik pandidikan,” tagas Palui.

“Anak didik nang nakal, kita atur strategi supaya ampih inya nakal, nitu ngarannya ilmu nang maatur adalah ilmu pulitik pandidikan,” lanjut Palui sarius banar.

“Nitukah kesahnya Lui,” Tulamak tanganga, inya handak kesah nang lain matan Palui.

“Ayuja kesah kapanjangan P3 tadi nah nang sabujurnya lah, Paman Arun bahari disambat urang P3,” ujar Palui.

“Apa kapanjangannya Lui?” takun Garbus.

“P3 nitu artinya pagawai, panghulu wan pambakal. Salain sabagai pagawi lagi bahari, sidin jua sabagai pambakal, wan diulah urang jua panghulu.Makanya digalari urang P3. Ujar palui, sidin batugas di kantur nang maurusi urang nikah, jadi kada tapi banyak urang baurusan. Dalam sabulan paling banyak sapuluh kali. Bahari nitu urang nikah kawa mambagi waktu jadi pambakal, napa kadada nang handaknya jadi pambakal waktu bahari nitu. Rapat di kantur pambakalan biasanya kamarian, sudah bulikan kantur, kalu urang manikah di kantur, maka pas haja sidin nang manikahakan urang pada jam kantur, karana tugas sidin sabagai pangulu.

“Han jarku nyaman kalu, talu jabatan dir aup sakaligus iya kada Lui?” sahut Garbus.

“Makanya tampulu kawa diraup haja jabatan atau gawian , nang panting masyarakat himung. Tugas pagawai beres, jadi pangulu kawa, jadi pambakal kawa haja jua manyuntan waktu, makanya rancak kamarian rapat-rapat di kantur pambakalan,” Palui takarinyum.

“Kada kaya aku pang Lui ai, jadi tukang parkir haja gawian,” sahut Tulamak.

“Sama haja aku gin tukang tarik bentor ha jua tiap hari, wayah ini ada nang mainjami mudal.

Jadi kawa manukar bentor, lima tahun sudah jadi tukang bentor kada kawa lagi nah manyaor haji, garis tangan sudah ya diterima ai kaya,” Palui asa suka haja inya.

“Panting gawian nang digawi nitu halal, iya kada Lui?” ucap Garbus nang tiap hari bajual iwak karing.

“Iya banar Bus ai?” jawab Palui. Rami kalu bila takumpulan Palui sapakawalan?