Sambal Acan

HIDUP di kampung bujur- bujur hidup saadanya. Tapi biarpun kaya itu kada parnah ada warganya nang marasa kada cukup. Samunyaan disyukuri, apalagi apa nang dimakan sudah tasadia, kaya banih manutuk saurang, iwak maunjun, lalapan mamutik, laos, kancur, tipakan mancabut, banyu mancibuk di sumur. Paling sakali saminggu ka pasar manukar gula, teh, uyah, minyak gas wan rarampah dapur.

“Sabulanan ini kita tabanyak baungut dirumah karna hujan kada saling mandakan,” ujar Palui.

“Makanya jangan disalahakan kalu KB di kampung kami tahun ini bisa gagal karna warganya tarancak batikap wan umanya,” ujar garbus.

“Bulih haja rancak asal bisa maaturnya,” ujar Palui mambalas.

Wayah musim hujan kaya ini jua maka bubuhannya rancak batamuan, bahanu saling bagagantian baik di rumah Palui, Garbus ataupun Tulamak. Bubuhannya kalu bapanderan kada biasa satumat, paling capat satangah hari, makanya sambil baricau bakisah,bapapanderan muntung kada saling mandakan bamamakan. Wayah di rumah Garbus disurungi kacang bajarang, dirumah Tulamak dibanamakannya jagung, di wadah Tuhirang bapapancukan.

“Aku sudah lawas baniat manyaru bubuhan ikam makan tangah hari disini, sudah kusiapakan iwak papuyu baubar, garih batanak, lalapannya pucuk-pucukan nang hanyar kuputik di kabun, pucuk gumbili, pucuk kastila, kamangi wan daun sasawi,” sahut Palui.

“Tapi jangan kada ingat maulahakan sambal acannya nang nyaman karna bini Palui pintar banar bamamasak,” ujar Tulamak.

“Uuuuiii…..umanya,” ujar Palui. “Amun maulah sambal banyaki manbanam acannya, lalu buati asam binjainya, supaya bubuhannya tapaluh wan tanganga kapadasan.” Nang bini sibuk amamasak, mambanam bawang wan acan babarapa hiris kaya kalikir ganalnya. Imbah tuntung lalu langsung mamirik sambal lumbuk parawit,dibuatinya bawang wan acan nang sudah babanam bacampur asam binjai. Malingut baunya makin kacar liur.

“Ayu lajui bamamakan, samunyaan sudah siap,” sahut bininya.

“Dasar bujur-bujur harat bamamasak bini Palui ini, banaman papuyunya nyaman banar, sambal lalapannya aduhai,” ujar Tulamak.

“Napa bumbunya makasambal babinjai itu asa nahap banar kada biasa kutamui nyamannya kaya itu, pas banar acannya. Aku sampai basah baju tapaluh, habang muha kanyamanan.

“Kalu biniku biasanya mambanam acam paling-paling sahujung kuku, makanya kada karasaan lingutnya. Kaya apa maulahnya bini Palui,” ujar Garbus.

“Aku kada tahu jua tapi tadi aku marasa anih haja. Aku mambanam acan cuma tiga bigi tapi wayah kupirik tadi kanapa maka jumlahnya manjadi lima bigi. Sakalinya aku hanyar ingat, mungkin nang dua biginya itu tadi ampunnya si Puput, pantas haja asa runyuh dipirik,” sahut bini Palui.

“Siapa itu si Puput?” ujar bubuhannya batakun.

“Puput itu kucing anakku. Puput itu sudah biasa bahira di dapur.Mungkin tambahan acan babanam tadi tahinya si Puput,” ujar Palui.

Mandangar sambal acan nang kanyamanan tadi bacampur tahi kucing maka galuakan bubuhannya muak mangaluarakan isi parut sambil kalunyuran bulikan kada saling padahan. (emhati/rep)