勿當奴縮縮

https://www.facebook.com/mcdonslavehk/ 從2019年6月9日開始重新認識香港。 從今日起,為每一件事情加上問號,尋找哲理。 🤡🍟🍔🥤🧠🕵️👩‍💻👩‍🎓👩‍⚖️👳📚

NETFLIX影片《願者上網》反思

發布於

前日連登有個熱門POST:Netflix新片《願者上網》誣衊香港示威;蘋果亦有相關報導:【觀感有出入】NETFLIX紀錄片引用港抗爭畫面探討假消息 未解釋背後衝突起因。睇完《願者上網》有以下反思,少少劇透注意:

1. 連登仔的批評係可以理解。影片重點並唔係探討各地的抗爭運動,而係講現時網絡科技、社交媒體帶來的憂患同警告。放係全球的大環境下,影片中出現過香港的抗爭畫面,難免會令睇的人會認為香港的抗爭者原來好大程度係受到社交媒體的影響而勇武抗爭,對於咁連登仔當然會唔認同。


2. 先撇開呢套片究竟係咪誣衊香港示威。影片主要批評社交媒體和網絡的演算法。演算法只係一種工具,本身未必有好壞之分,原意係想透過收集網民的網絡足跡數據,然後推算佢鍾意睇咩聽咩,結果社交媒體同瀏覽器就會自動篩選D你喜歡睇的野,並係當中不停插入廣告,增加人消費的意欲。社交媒體主要靠廣告賺錢,所以演算法原本的設定係想為社交媒體同瀏覽器得到最大財富收益。

例如你係FACEBOOK睇到一個旅遊POST,你停留左好耐時間係個POST度/留言/分享等,演算法知道你有認真睇D內容,結果之後你就會睇到同果個旅遊相關的廣告係FACEBOOK或者其他網頁出現。


3. 好可惜,片中主角同受訪者發現社交媒體同演算法呢種工具。往往會製造好多假新聞、令社會兩極化、最終甚至會令民主自由呢D基石崩壞,人類道德淪亡。點解?因為演算法只係用黎賺錢,入面唔會有道德設定,結果好容易做成圍爐取暖、以偏概全,以情緒主導削弱理性。再進一步,呢一種網絡世界會不知不覺間塑造我地的行為、思想同價值觀,我地不自覺地被演算法所提供的資訊日漸加固我地認為係岩的意見同思想,以為自己睇到的就係真相,進一步相信同認為自己係接近真理的人。

可以想像成日係FACEBOOK睇幫港出聲的人,之後佢會睇到SUPPORT CY Leung、各藍色KOL、HKG報、SAVE HK等等。整個網絡世界都充斥住同一種意見同一種報導同一種思想,面對相反意見,就覺得自己係眾人皆醉我獨醒。同樣地,黃絲亦一樣。


4. 網絡世界令人著迷的地方就係匿名性同自由,可惜呢種匿名性同自由往往會令網民的道德感下降,係網上講得更誇張更毒更狠,間接令現實世界上的衝突、傷害同紛爭更趨嚴重。

相信有唔少人會認為睇AV唔算係不道德。但當你想消費AV女優滿足自己的時候,你唔係俾錢買佢套片睇,而係BT免費下載,咁係咪真係道德呢? 我地會認同AV女優係一份職業,透過自己身體同演技工作,希望得到經濟回報。但相信大部份網民會選擇免費咁滿足自己慾望,同時唔覺得自己無視知識產權呢一種間接盜取的行為係不道德。不過,現實世界入面自己就一定唔會去偷野。

無幾耐之前,喇沙仔一事部份連登仔可能無諗過自己一個惡毒的留言,現實中會為女事主帶來幾大傷害,甚至會覺得關我L事?又唔係我POST段片;又唔係我拍段片;又唔係我第一個咁講佢既,就算我無咁講,其他人都會話佢笑佢嫁啦;無連登咪唔會有咁多人知囉等等。

引用作者L係大時代的哲學裡面寫的網絡一文,作者指出:『當事情涉及多個因素,就會有「多手」問題:當一件事情的發展涉及越多人,則越難指出誰人須要為那件事情負上責任。網絡的興起,令人類行為突破了以往時間空間的限制,令很多人共同在網絡上做某件事變得更容易,亦令到追究網上行為責任誰屬時都會遇上「多手」的問題。』

係「多手」的情況下,網絡行為同事情的結果就極難有足夠的因果關係,令到網民好易忽略自己行為的道德責任。係仿佛唔需要負責任的世界,面對政治立場不同,兩邊就更加仇恨對方,只想主宰結局,甘願用誇張失實的資訊攻擊對方或袒護自己陣營。


5. 最後,我地都可以先問問自己,呢一年的抗爭運動,我地受到社交媒體所提供的資訊有幾大影響?我地每一次行動係咪真係了解過果個行動背後的意義,經過個人的思考判斷去決定?好吊詭地,香港人呢一年抗爭的根源係爭取民主自由,但如果情況真係好似影片入面所講,虛擬網絡的演算法係咪無聲無息地改變緊我地,令我地漸漸失去理性?暫時撇開中共的所作所為,我地又係咪真正地活得自由?

不過,更加明顯的現實例子,當極權統領科技,所有網絡、社交媒體都由極權控制,由一出世生活上的每一個層面,每一個接觸到的資訊都係被極權過濾,相信大家都可以想像到會變成點。我地會好自然咁愛國、好自然咁覺得人地亡我之心不死,最嚴重同可悲的情況係完全失去批判、失去尊嚴、失去自己而不自知,淪為極權而生。

係資本主義的民主國家,資本家、爭權者可能開始緊爭取掌控科技,從而賺最多的錢;操縱輿論,開發人類的不理性,為自己拎最大的權力,從民主邁向極權。係極權的社會,政府透過科技完全掌控人民的一切,只要養得飽人民,人民就甘願生活係牆內。咁香港呢一個無民主而漸漸步入極權的地方,我地又想要邊一種出路?如果我地想要真正的自由,我地係咪甘願演算法操縱我地睇到聽到的野?我地係咪應該要盡力支持擁有專業道德,致力尋找同報導真相的傳媒工作者?如果我地仍然係尊重道德,認為人禽之別在於人類有道德感同道德規範,我地係咪都要做一個負責任的網民?做好FACT CHECK咪亂傳?

科技的確令我地生活方便左好多,但無咁先進的科技,人類又係咪生存唔到?係咪唔會有民主自由?需要花時間精神去溝通同尋找真相係咪咁差呢?無約制既任何人同事,係咪最終都只會導致黑暗同邪惡呢?


啟發自

#願者上網 The social dilemma

#學人串社科 2019:媒體數據攻略

#大時代的哲學 網絡 L

#大時代的哲學 科技西瓜冰

喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明
3

看不過癮?

一鍵登入,即可加入全球最優質中文創作社區