勿當奴縮縮

https://www.facebook.com/mcdonslavehk/ 從2019年6月9日開始重新認識香港。 從今日起,為每一件事情加上問號,尋找哲理。 🤡🍟🍔🥤🧠🕵️👩‍💻👩‍🎓👩‍⚖️👳📚

我們剩下的武器,只有真相。

發布於

香港警察事隔一年後指元朗721事件係「勢均力敵,旗鼓相當」,警察搭膊頭係喝令白衣人離開等等,但大部份香港人都知道「指鹿為馬」呢四個字點解,結果又再一次成為警察公信力的災難,被市民唾棄的理由。

我地仿佛仍然仲追尋到真相。不過,自從網絡興起,亦有人開始覺得「沒有真相,只有詮釋」,因為似幻疑真的訊息每日都係度流轉。Factcheck係一件花時間心力的事,好多人可能因為咁漸漸認為真相好煩,不如選擇d自己認為係真、對自己立場有利的事就算,甚至乎覺得無所謂啦,都係各派各說,都無所謂真相既,都係玩喝玩樂比較岩我,唔好再煩我喇。你又有冇試過咁諗呢?

正值「指鹿為馬」事件、831一週年、陳彥琳的死因庭亦已經展開。《1987:逆權公民》入面有一句說話,「我們剩下的武器,只有真相。」

1. 究竟咩係真相?

首先,事實係構成真相的首要條件,而事實即係客觀存在的證據。我地只能夠嘗試用我地獲取到的有限事實去拼湊真相,就好似解迷遊戲一樣,越多線索越容易得到答案,越少線索就越難得到答案。

其次,事實同事實之間的前文後理、眾多事實之間的關係,就需要我地客觀理性咁去理解同思考。不過,我地有時候未必可以完全叫自己理性客觀。點樣去拼湊事實、點樣去理解事實之間,點樣去演繹不同事實,其實都會被我地的內在意識或第一印象所影響。

所以,真相必需經過一個追尋的過程,有時我地會岩,有時會錯。

以831做例,事實包括︰1. 大批警賊衝入車廂毆打市民、關閉車站、趕記者離開現埸。2. 從來都無「死者」的家屬出黎要求討回公道,追究警賊責任。

結果,當我們錯過了目睹事實、無法親身接觸到事實、無法透過媒體觀察到事實、無法得到紀錄事實的資源,係事實不足的情況之下,我們其實係唔能夠得知831有冇死人。而呢一連串不公開不透明同我地以往對香港的認知有好大落差;加上警賊上年6月開始濫權濫暴的背景之下,往往只會令我地將有限的事實拼湊成我地認為的「真相」。

李立峯教授指傳媒有種學說叫事實性之網,指事實從來都好依賴權威。例如暴雨,場雨有幾勁,我地要靠天文台話俾我們知;例如火警,火勢有幾嚴重,我們要靠消防話俾我們知。如果我們唔信天文台,唔信消防,咁我們點去查證,從何去查證? 當下的香港就係大部份人都對傳統權威,政府同警察失去信任,無論政府同警賊再講咩都無法相信。係傳統社會我地需要依靠各種各樣的制度去印證事實,但當相關受信賴的制度崩潰果陣,就再無辦法共識到所謂的事實,繼而追尋真相。簡單講,即係狼來了的故事喇。

2. 點樣可以活在真相中

一年過去,不如我們嘗試問下自己,究竟自己炒過幾多次車? 有無做好fact check? 有無誤信過假資訊,然後轉發出去?

係呢個科技世代,攞著手機的我地都可以輕易變成傳媒,一張相一段片加caption就可以係一篇報導,我地可以好似警賊咁拎住張相就話係喝令而唔係搭膊頭,我地亦可以拎住一個死者的相片就話係彥琳呀媽,指而家果個彥琳呀媽係假。

但真相又係咪咁呢?

作為一個公民、抗爭者、香港人、中國人、黃絲藍絲熱狗好,不論係做個資訊消費者定係資訊發佈者,我們都要決定,我們係選擇將判斷真相的責任外判,純粹靠其他人去消化資訊,定係我們要為真相負責任,唔係人講乜我就信乜?

而當極權黎臨的時候,真相可能會變得寧靜。例如我地POST的野會被「河蟹」、我地有機會因為POST某D資訊被警賊拉被政府用國安法告、我地會上唔到FACEBOOK, YOUTUBE、我地會面對更多更多「指鹿為馬」事件、我地會不停見到只有好事,沒有壞事的「新聞」、我地只會睇到祖國點樣優秀強大、外國點樣邪惡黑暗,點樣想加害我地。

因為極權需要撰寫屬於自己的「真相」,令下一代人認同自己的威權,並甘於臣服。

我地或者漸漸會變得好似唯有相信同擁護極權,先可以有安穩的生活,但其實我地知道呢一切一切都係虛假,係某一個角落可能就有人因為一句踩界的網上言論又被人拉左。當我地內心知道自由同真相係點樣,我地就唔會忘記。而我地仍然可以同下一代講,我地曾經擁有過的自由係點,我地曾經花時間同心力,理性思考,追尋真相的過程係點。

追尋真相係艱鉅的過程,真相得來不易,但當搵到真相之後,我地就會非常滿足,我地會覺得終於可以放低心頭大石,同一時間我地亦會盡力追求自由,因為我地知道,呢個係唯一一個可以令我地搵到真相的世界。

啟發自

#哲學有偈傾 2017:假真相之名

#哲學有偈傾 2020:活在真相中

#李立峯

喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明

看不過癮?

一鍵登入,即可加入全球最優質中文創作社區