勿當奴縮縮

https://www.facebook.com/mcdonslavehk/ 從2019年6月9日開始重新認識香港。 從今日起,為每一件事情加上問號,尋找哲理。 🤡🍟🍔🥤🧠🕵️👩‍💻👩‍🎓👩‍⚖️👳📚

歷史的故事


直到而家,相信偶爾都會聽到遊行無用,連儂牆無用,勇武無用,黃色經濟圈無用,議會無用等類似做咩都唔會有用,好絕望,改變唔到的觀念。

自反送中運動開始,係不同事件上經常會見到人類總要重複同樣的錯誤呢張圖。歷史,又係咪可以引導人類唔犯同樣的錯?歷史又可唔可以回應到上面的無力感?

如果唔知道歷史係點,又點可以講得出人類總要重複同樣的錯誤呢一句說話?所以老套一句,知己知彼,我地面對的係一個政權,的起心肝一口氣睇左中國近代史,希望可以從歷史中搵答案。

首先,原來所謂勾結外國勢力、分裂國家、顛覆政權等等,邊一樣野係中國政權無做過?無鬼佬引入馬克思主義會有共產黨?無蘇聯又會有中共?尋日美國宣佈制裁香港官員,例牌會話干涉內政。咁打一戰二戰同國共內戰的時候,中國的領導人又幾時無搵過美國介入?

去番重點,由孫中山先生講驅除韃虜,恢復中華,滿清被推翻、袁世凱開始軍閥割據、國民黨共產黨的出現,每一代中國人都係生活係威權之下。可悲的係,每一個皇朝都彷彿出現人類總要重複同樣的錯誤。以往俾鬼佬蝦,踩到上心口,俾外國人殺不特止,仲要不停內戰,自己人殺自己人。每一次維新自強運動,每一次進行政制改革,民主立憲往往都因為掌權者對自身利益的貪婪、對權力的戀棧,演變成狗咬狗骨,最後暴力解決,失敗告終。

歷史,係咪可以令人汲取教訓?係咪可以為未來提供答案?避免錯誤?

答案係唔會。

首先,要不得不承認歷史都係由人去記載,點樣記載,件事真唔真,其實某程度上無人可以確保到,歷史明顯可以成為政治工具。所以,歷史唔能夠提供到甚麼絕對答案,唔夠能話因為A曾經係咁然後係點,所以B佢而家咁將來都會係咁。

咁歷史有咩意義同作用?如果我地的皇帝太后、軍閥、蔣中正毛澤東能夠從歷史中反省自己,被外國人蝦同侵略的時候發奮圖強;唔係只顧自己享樂同利益;唔係只顧爭奪自己權力一味槍桿子出政權,會唔會有數以億計的中國人死亡,造就而家所謂「穩定」的政局?

回應番遊行無用,連儂牆無用,佔,勇武無用,黃色經濟圈無用,議會無用等等消磨意志的術語。相信睇番古人發生的事情,配合自己身處的時代同社會,從歷史中成長,反省自己會唔會好似自己討厭的人一樣只顧物慾、安逸同權力。我哋未必改變到別人,但一定可以改變到自己。

而我得到的反省就係兄弟爬山,各自努力,不分化不內鬥,團結一致對準政權。如果無一個極權係可以永續,如果人類只係一段歷史的組成,香港人又憑咩可以講無用?

有冇用,其實真係無人會知架。當我們成為歷史的時候,就再由後人係我們身上反省自身吧。

#人類總要重複同樣的錯誤

#遊行

#歷史

#香港

#近代中國史綱 郭廷以

#哲學有偈傾 2017 古今多少事

喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明

看不過癮?

一鍵登入,即可加入全球最優質中文創作社區