力高
力高

鍾意周圍去,嬉山亦嬉水。 想幸福地吃秋刀魚、 心情亂七八糟時吃蕎麥麵、覺得輸給世界時被抱一下。

如無意外

(编辑过)
由我跟你被什麼傷害過的那一刻起,我們早已不在同一條路上了。

兩年之後,我同你竟然坐喺維園球場觀眾席,一人隊一件DONKI大拖,拎著枝梅酒,喺到拍拖⋯
「喂,下次我哋一齊上獅子山⋯」你夾起件大拖,冇端端講起。
「好呀,幾時?」 你知架,你開到口,我從來都唔會Say No。但,乜我哋仲有時間咩?
「下星期囉,夜晚上去⋯走之前,我想喺獅子山望下個夜景」
我冇乜意識咁點咗下頭。你繼續問:「你將來有咩Plan?」
你問完,我呆咗咁望著維園球場,
唔知點解,連大拖都未食,我就飲晒枝梅酒。





嗰晚,除咗獅子山同香港,其實你仲諗緊咩?

一九年之後,再踏足維園,望著空無一人嘅球場,聽著附近一對情侶拗交,
我諗起年幾前,有個星期日,冒著大雨,死都要踏足維園嗰份執著。
當時幾乎每星期都經過維園附近一次,得一樣嘢FOCUS,
冇嘢介意,冇嘢覺得仲可以失去,只想專心做一件事。


有啲嘢,直到呢一刻之前,我都仲好執著。
但原來呢份執著,由二零二一年起,或更早之前,經已變得好無謂。

曾經認為呢個地方,可以住到百年歸老,
又認為呢個人,或者可以陪自己耐啲。
但原來一早望唔到更遠。 唔信你,都唔信自己

你問我將來,我望著你,開唔到口
唔知同你講「我嘅Plan」定係 「我哋嘅Plan」好
「喂,最後呢件,你食定我食?」你問
我望著件大拖好耐,都係開唔到口
你見我面有難色,冇等我開口,就夾咗舊大拖塞落我個口



有時,我真係分唔清,你係了解我,定唔了解我。
亦都分唔到,我係對座城市失望,定係對住喺呢座城市嘅人失望。
又或者係,我哋都冇好好了解過發生嘅一切。

我知道,我哋點都冇時間追上大家Sync到嗰刻。
既然,個未來早喺年幾前已經變咗, 你應該係想聽我個Plan多啲

「不如我哋今晚就上獅子山⋯」

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论