拿哈哈

熊人熊人變呀! 拿哈哈變呀! HEY!

秒速0.25

發布於

疫情期間可謂三步不出閨門嘅我,早兩日不得已要出門一趟。途經鐵路站嘅時候,有一個廣告引起咗我注意……

某疑似偽德國品牌嘅自動泡沫洗手機,賣點係0.25秒速……秒速喎,但係無咗距離單位嗰部分嘅?

講到秒速,相信唔少人會諗起新海誠嘅《秒速五厘米》(係啩?)。戲名所指嘅,據聞係櫻花瓣跌落蒞嘅速度(不過又據聞有日本某博士證明咗唔係)。呢部機賣快,咁無理由喺秒速0.25厘米咁慢啩?

氣象學上,都好常用「米每秒」呢個速度單位,例如中國、日本、台灣等地嘅氣象部門,都會用呢個單位蒞報告熱帶氣旋嘅風速。秒速0.25米,即係每小時0.9公里,查下蒲福氏風級,係屬於0級風,即係等於無風,海平如鏡,煙直向上……咁又有幾快呀?

莫非係秒速0.25公里⁉即係時速900公里,一般民航機嘅巡航速度喎!咁就真係快嘞!不過屋企有部會將啲泡以每小時900公里嘅速度噴出蒞嘅機,即係好似一把氣槍咁,唔係幾安全喎……

睇返有關產品嘅介紹,原來只係話呢部機用0.25秒就可以自動唧到啲泡出蒞。咁擺明就係亂用「秒速」呢個詞啦!咁都算嘞,我再喺網上高求其摷下,發覺識得0.25秒出泡嘅洗手機周圍都係(例如呢度呢度呢度呢度),真係擺明呃無知婦孺……

係呢,我離開鐵路站嗰陣,見到呢兩個廣告放埋一齊……車站係咪驚人會嘔泡呢?


發布評論

看不過癮?

一鍵登入,即可加入全球最優質中文創作社區