我想聽下你把聲

今日第一次響 Discord 聽嘢，聽鄒頌華分享探索廢墟既事。如果單係聽佢既自我介紹，貓奴，茶道，探廢，探墳場 - 我一度以為佢係我大學同學，一個我叫外星人既奇人。當然好快就知道唔係，但我真係好驚訝於原來我呢個大學同學既特殊喜好又唔係我一直諗咁特殊；至少，原來有另一個女人同佢有高度相似既喜好。

今日唔係想講鄒頌華 - 大家可以去睇佢個PAGE - 我想講網上社交。

早過武肺爆發，因為工作同埋性格，其實我已屈埋響屋企好耐。啲人猛咁嘈話響屋企返工見唔到人好抑鬱，我諗，一係根本佢地係無病呻吟，一係我已重度抑鬱。老老實實，起碼有六、七年 WFH 經驗，起碼連續四年冇返過辦公室開工。即時而家去左第二度，我都冇乜點出街，做野暫時仲係響屋企；而我覺得非常自在。

講嘢呀？

自在，因為我唔駛畀啲咩辦公室離奇潛規則影響，唔駛花勁多時間去 SOCIAL，唔需要顧住捽下鼻或者件褸少咁粒鈕都畀人歧視。雖然唔係程多猿，但同數據打交道既人，大概會好明白我；與其開會，吹水，不如畀時間我狂做DATA好過啦。

但係，咁唔代表我唔需要社交。我要。用我自在既方法低調咁社交。

前幾日我身邊人同我講，你就好啦，咁多朋友。我同佢講，玩野呀，我冇朋友架。然後佢話，唔係呀，你成日有朋友同你講呢樣講嗰樣。佢咁講，我突然發現，而家同我隔日聯絡下，得閒會 Ping 下我既，絕大部分都係冇見過面，連真名都唔知既陌生人。

之前打機識左好多人，然後又畀呢啲人玩弄於股掌，最終竟然有幾個可以繼續做到朋友，有啲仲見過面。因為鍾意某卡通人物（可唔可以咁叫？）我入左個群組，冇話同任何人成為朋友，但偶爾都會傾下計。響呢度寫文亦識左幾位，彼此有TG可以隨時傾計。

佢地算唔算係我既朋友？算。即使佢地冇見過我，唔知道我既名，對我啲身高年齡性別工作都一無所知；但佢地反而知道好多我啲『真人朋友』唔知既事。佢地反而好似更在意我。佢地會周不時PING我。當我 DELETE FACEBOOK ACCOUNT 時，唯一會搵盡辦法同我保持聯絡既亦都係佢地之中。

有時睇 YOUTUBE，好多人離開得好匆忙，冇機會同所有朋友道別，亦好可能永遠唔會再見，我覺得好心痛。有一刻，呢啲同我完全冇關既人反而令我感覺我地係響同一個維度入面，係朋友；然後，會因為咁而更加體會到佢地既痛。

人同人之間，冇左世俗既制衡，單純因為一絲共鳴或一個喜好而連埋一齊，其實好浪漫。

之所以突然有咁既諗法，因為我發現我咁憎開會，竟然會主動響CALENDAR 記低一個陌生人就某個陌生話題既分享會，然後乖乖準時入去聽。成件事係幾咁離奇，幾咁滑稽，又幾咁浪漫。

突然諗起曾經講過要搵日開CLUBHOUSE聊天室，同文友傾下計。可惜係不了了之，佢地亦各有各忙，差唔多絕跡馬特市。如果當初真係搞得成，都可以話係一段浪漫既邂逅。