你睇斜陽照住嗰包風薄萬
你睇斜陽照住嗰包風薄萬

無病呻吟7毫克/每支 鳩流流0.5毫克/每支

《喜劇之王》

喜劇之王係我重睇過最多次嘅星爺片,連對白都背到一大半。老套都要講,喜劇之王我真係由細睇到大㗎,從大家仲會喺飯檯前追cctvb睇到依家個個入晒房睇Netflix,我都仲睇緊。論卡士,又張柏芝又成龍咁,自然唔會係不斷重睇嘅原因。我係唔知第幾次睇,突然發現原來呢套唔係一套喜劇嘅時候,先真正鍾意上佢。

俗語有云:「婊子無情,戲子無義」。呢套戲唔同,就算柳飄飄係隻雞,佢都係隻有感情嘅雞;尹天仇係茄哩啡,佢都係個有義氣嘅茄哩啡。成段戲我最鍾意係一夜春宵後尹天仇追出去問柳飄飄唔返工得唔得,柳飄飄反問係咪會養佢,尹冇回覆後柳轉身走,而尹追上前大嗌「我養你呀」。大個咗次次睇都好大感觸,我有手有腳識搵錢養得活自己,不過聽到句「我養你呀」都係好開心。養呢家嘢其實好空泛,你一日剩係求其塞三餐我食叫養,你俾晒全世界嘅嘢我溺愛我又係叫養。但你講得出呢句,就算最後結果係點我感受到嗰刻你係愛我的。其實唔洗養我㗎,我同樣識賺錢,但我會當呢個係愛的承諾咁珍而重之地埋喺心底。

又,柳飄飄鬧尹天仇個嘴乾,錫返潤嗰下我都好鍾意。第一個ex我提唔起興趣錫,結果好快散咗;第二個ex鬼鬼地我估佢冇睇過,最後都係散咗;元旦嗰日C知我想做咩,但佢推開咗我,話唔鍾意潤唇膏咁黏答答嘅感覺喎。其實不過係因為我唔係佢鍾意嗰個啫。至於M,我估佢有睇過,亦估佢唔會推開我,但成段關係估嚟估去咁又有咩意思呢。

我始終都冇試過搽完潤唇膏後追住人錫。

寫於2020年4月8日

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论