獻給哈勃的退休禮物（第二季——續航至宇宙邊緣）（八）用第五維睇宇宙

獻給哈勃的退休禮物（第二季——續航至宇宙邊緣）（八）用第五維睇宇宙

第五維喺乜嘢呢？

三維空間係長濶高，第四維係時間。呢個睇法相信全個地球大部分人都同意架啦。

咁⋯第五維係乜嘢呢？

如果用 Newage 嘅睇法，第五維好似精神維度，當精神昇華到點點點⋯就會突破維度，好似（精神上）飛昇咁咁咁架啦⋯

呢種講法，有聊得很暫時未想研究住（不過如果元宇宙去到極致，相信非常接近呢種境界，遲 D 如果有聊得很靈感夠嘅話，先至另文再講一下^_^）。

另外一個最多人講嘅第五維，相信係超弦理論所講嘅三維空間膜與三維空間膜之間嘅關係⋯

甚至再高級 D 嘅卷曲維度同丘空間⋯

呢 D 相當程度算係數學上嘅解。喺實際世界操作上，呢 D 數學上嘅解未可以應用得到。簡單 D 講，仍然有 D 似神話一樣，高層次到令人摸不著（當然，有聊得很冇話係對定錯，五百年前講登月係神話，今日成真啦）。

咁⋯究竟有冇摸得著又有實質用途嘅第五維呢？

科學家講嘅唔同維度，通常有兩個唔同嘅要求：

第一個講法好簡單，各個維度係垂直嘅，就好似長垂直於濶、濶垂直於高⋯咁。

好明顯，呢種講法唔適合愛因斯坦嘅時空理論。所以，如果接受時間係第四維嘅講法，就同時要 modified 上面個講法啦。

另外一個講法，係每個維度係互相獨立嘅，就好似你向 X-軸走幾遠，對 Y-軸嚟講，本來係冇意思嘅，除非有一個關係式（方程式）將佢地嘅變化連接起嚟，例如：2x+3y=6，咁樣，如果 x=3 嘅話，y就會等於0。如果接受呢種講法，第四維係時間就完全冇問題啦！順便一提，呢個情形，時間就冇話需唔需要垂直其他維度啦。不過，劃圖嗰時，時間軸仍然可以垂直其他三維嘅，當然，呢個四維圖，就先要將三維降格成兩維先表達得清楚啦。

最後，實用嘅第五維究竟係乜嘢呢？

一百年前，多個科學家已經用過好多次啦！只不過冇講明嗰 D 係第五維啫。

最明顯係愛因斯坦用嚟解釋廣義相對論嗰幅圖，將三維空間降格成兩維平面，而垂直呢個平面嘅就係勢維度（gravitational potential）。所有質量，都會令三維空間扭曲（好多時 D 人淨係識話扭曲，講嚟講去都講唔出點扭曲法，加個勢維度軸咪清清楚楚囉），太陽重 D 咪令到三維空間向勢維度陷落多 D 囉，地球輕 D ，咪陷落少 D 囉。黑洞質量密度無限大，三維空間就向勢維度無限陷落成為一個向住勢維度嘅洞。

黑洞呢個詞，最初科學係咪咁諗呢？有聊得很唔太肯定。但係，相信係黑洞呢個詞嘅最佳睇法。

除咗引力勢，其實好多十九世紀嘅科學家都有類似睇法，例如電勢（electric potential ），正電荷嘅電勢向上，負電荷嘅電勢向下，呢種電勢亦都可以考慮成一個維度，如果中學 D 書係咁表達嘅話，咪清清楚楚解釋到兩粒正電荷點解會相拒囉（細正電荷係個大正電荷個火山口頂向外滾落去囉）。

咁咪解釋晒全部場（field）係乜囉。就係三維空間向勢維度陷落（或拱起）嘅程度。

乜嘢係等勢面亦清淸楚楚，就係同一個勢（勢維度嘅同一個值）嘅面。

點解會永動？係因為喺同一個勢度動係唔駛能量嘅。

有聊得很真係唔明白一百年前，愛因斯坦同其他科學家點解唔清清楚楚講明「勢」係第五維，如果講明，依家 D 老師咪唔駛講「場」講得咁辛苦 D 學生都唔明乜嘢係 「場」囉！

仲有播，點解嫦一號個登月軌跡咁奇怪，要升空後，喺地球大氣層外轉幾個圈再蛋形（其實有聊得很懷疑當年個圖係簡化咗嘅，因為理論上，等勢面係花生形而唔係蛋形）咁拋射過月球。因為呢 D 軌跡都差唔多係喺同一個等勢面上面嘅，咁⋯點轉點行都好，都幾乎唔駛能量嘅。

由呢個故事睇到，宇航⋯一定要知第五維——勢維度係乜。

如果唔係，就會好似獻給哈勃的退休禮物（二十九）planB製作後備地球咁，製作完個後備地球向住水星軌迹行都會彈返出去。

又或者，會好似狂想科幻應用系列（四）私人火箭大神話要研究用私人火箭撞擊威脅地球滅世小行星救世計劃淺談咁，撞到個小行星反向太陽方向飛，都會飛返嚟撞到你滅世。

科學上，真係好多人改唔到用更高維度睇宇宙（例如時間同勢），仍然用三維空間去睇宇宙，所以咪睇唔清囉^_^

作者：有聊得很（manbolo88)