慢活森谷
慢活森谷

|酷愛與自然連結|亦是貓奴|正在適應新的環境文化|讚賞公民

森林之約|我同山林療癒嘅緣起(廣東話)

森林浴? 森林療癒? 山林療癒?

你聽過山林療癒未?佢同森林浴或者森林療癒又係咪一樣?

台灣大雪山高海拔嘅黑森林

森林浴詞源於日本。二十世紀八十年代,日本政府發現都巿人隨時跳掣,但係只要行入森林同自然接觸,就會啹番晒。所以日本政府就發明呢個詞語去友仔走入森林。大約十年前,有人喺美國砌起呢個諗頭,創辦美國自然與森林療癒協會,去認証森林療癒嚮導。香港慈山寺希望透過寺內嘅安逸環境同祥和氛圍,比香港人有機會接觸森林療癒,於是就建立咗一個山林療癒活動。

慈山寺—入解脫門嘅不二法門

慈山寺起好咗幾年,縱橫山野,望向八仙嶺,發雞盲都見到一尊白色觀音像楝响山下面,以前總係覺得好突兀。自從今年有緣走入慈山寺,行近睇真尐呢尊觀世音菩薩造像,就會感受到佢嘅慈悲祥和。上網挖多尐慈山寺嘅一切緣起,依家見到佢直頭好似太陽咁溫暖。同一幅風景,心念一轉,感受唔同晒

坐山佇立嘅觀世音菩薩像
慈山寺內受著觀世音菩薩嘅慈光普照

因為關注慈山寺𥄫到慈森.山林療癒呢個活動。報名難過搶購Mirror演唱會飛,或者搶BAYC NFT空投。事後得知總共八十萬個IP Address爭奪大約一千個參與機會,連主辦機構Server都跪咗一粒鐘。玩唔到,反而睇到佢有一個山林療癒陪伴員嘅講座。橫掂無野搞,又可以乘機入多次慈山寺參觀,心諗聽吓無壞,所以就報咗名。

山林療癒陪伴員嘅講座

究竟有乜體會,賣個關子,下回分解。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论