慢活森谷
慢活森谷

|酷愛與自然連結|亦是貓奴|正在適應新的環境文化|讚賞公民

山水之約|最喜愛的香港山嶺 – 馬鞍山(廣東話)

今次嘗試將之前嘅文章,用廣東話形式再演譯一次,唔知個效果會點呢?

香港嘅山唔高,頂盡都係得一千米。
因為佢有長長嘅海岸線同埋唔同嘅地質覆蓋,山嶺變化多端迷人。
朋友問我最愛邊座山,我嘅選擇唔係香港之巔大帽山,又唔係香港精神嘅代表獅子山
有人鍾情於大東山爛頭營嘅蘇格蘭高地風情,亦有人醉心於太平山頂俯瞰維多利亞港嘅璀璨繁華。

由左上至右後:大東山,獅子山,太平山,大帽山
而我嘅心頭好係馬鞍山
馬鞍山

地理

馬鞍山楝响香港東邊,比沙田西貢夾住。
主峰海拔702米,同牛押山由一個微微凹嘅山脊相連,因為外型似馬鞍而得名;同其他山峰聚埋,成為一個山系。

由馬鞍山及牛押山形成馬鞍狀

呢頭最高就係馬鞍山環迴360度無遮無擋
北望八仙嶺梧桐山;東面有西貢諸峰例如石屋山,蚺蛇尖
南面可以望到九龍群山及至港島部份崚線,西面由一眾圍繞沙田巿鎮嘅眾山例如針山大帽山

八仙嶺下嘅船灣淡水湖
西貢群山下嘅企嶺下海

佢嘅海岸線亦都非常優美,從沙田巿鎮城門河流出吐露港;再遠一尐嘅赤門海峽一脈相承
尤其响陽光映照之下嘅企嶺下海一片寧謐寂靜
東面嘅西貢海又經常千帆並舉,靜中帶旺

針山下嘅沙田巿鎮同城門河

風貌

除咗高山同海岸線,佢可以睇到昂平高原(拜託,400米海拔對於香港嚟講已經係高原㗎嘞,咪奢求)。
你好彩尐仲會睇到班人"飛上天上",因為喱度係滑翔傘嘅蒲點。
馬大石澗
源於馬鞍山,中游亦有爆紅嘅英雄瀑,絕對係渡過熱辣辣嘅夏天嘅消暑之選。
附近嘅鹿巢山亦都有全港最大嘅石林,保證你對各種多變嘅地貌睇到O咀

昂平高原,英雄瀑及鹿巢石林

杜鵑花

香港有六種原生野生杜鵑花,分別係香港杜鵑,華麗杜鵑,毛葉杜鵑,紅杜鵑,羊角杜鵑同埋南華杜鵑。
馬鞍山
嘅土壤偏酸性,山勢陡峭,無乜人搞,有利野生杜鵑花生長。
喱個山區竟然可以培育到全部六種,所以每年春季,沾寒沾凍濛查查,依然一大班友排住隊上嚟睇。

六種香港原生杜鵑花

有尐响路邊矮得得嘅灌木入面爭奇鬥艷,又有尐聚咗响高大喬木上面花枝招展,亦有尐响峭壁上絕處逢生。本土物種受到外來物種嘅競爭,要生存,唔容易。

不同形態嘅爭逐

人文

馬鞍山係香港唯一難得一見嘅工業礦山,山腰度有一個荒廢咗嘅鐡礦場,喺二十世紀四十至七十年代有興盛嘅採礦業務,產品曾經遠銷至日本
山中村落曾經聚居多達五千名礦工同埋眷屬。
宜家部分村落仍然有人居住,亦都有一間鞍山探索館導賞巿民認識當年嘅種種歷史。
而當中一尐地底礦洞雖然遭到政府圍封,仍然有唔少人入去探險。
其實政府根本漠視喱項重大歷史遺址,令到大家企晒响度。
而喺露天礦場外圍,依然可以搵到唔少嘅鐡礦石,我亦都好鍾意帶朋友嚟參觀同埋碰運氣。
唔該記住山野不留痕外,亦都唔好帶走一花一石

鞍山探索館,地底礦洞入口,露天礦場
馬鞍山能夠成為心中最愛,係因為山作為唔同經歷嘅載體,盛滿我深厚嘅情感。

成長

馬鞍山上遠眺嘅風景,無論係沙田巿鎮,中文大學,吐露港烏溪沙海岸,定係大埔巿鎮,我成世根本就响度住啦,返學啦,玩啦
企响度就望到鄉下,每個地方都有我嘅腳毛,臭汗同故事。

滿載記憶嘅暴大
自小長大嘅巿鎮

元旦行山

千禧年後無幾耐,每年元旦都會同朋友行山鬆下。
第一年就係爬馬鞍山,取道傳統嘅上山路線,由吊手岩一路撐到彎曲山,返番馬鞍山村,途中仲搵下啲奇石。
之後接近廿年,人事唔同晒,香港變天,唯獨此山不變。

馬鞍山的登山口
鞍山眾奇石

毅行者

有一年參加毅行者(香港經典嘅慈善行山活動,要响48個鐘內完成100公里嘅麥里浩徑,通晒頂咁由西貢北潭涌行到元朗大棠),中晒暑咁操練
响山腳嘅麥徑第四段,瀨晒野,腳都抬唔起:每上10級樓梯就要坐低抖10分鐘,好彩隊友無詐形。
D-day果日,摸黑頂住凛凛寒風步過彎曲山,四圍響起直昇機嘅盤旋聲,仲有人吱吱吟話有人誤墮山崖。
喱種經歷好似死過返生,邊會唔記得呢。

麥里浩徑第四段嘅登山口
毅行者
就係呢段路頂住烈風,摸黑前進,驚死跌落山

釋放

果年主子大病,整整兩個幾無抖過。
終於等到主子有尐起色,可以安排行程小休。
揀咗兩條無乜人嘅路線,登高遠望果一片色彩繽紛嘅企嶺下海,即刻覺得舒一口悶氣,等我有精神返屋企搏殺。

色彩繽紛的企嶺下海

雲海夕照

某年帶住西人同事望山望海,巧遇冷鋒襲港。
上山時天朗氣清,睇住雲霧由西貢海上慢慢漂過嚟,再昇上昂平高原,再冚過去沙田巿鎮
仲要撞正日落西山,睇到大家依哇鬼叫

海霧西進
雲海夕照

獨行觀日出

又一年心血來潮,約埋朋友到昂平宿一宵睇日出。
無厘頭搞到要獨自夜行:响山腳同村狗傾咗一陣先過到路;慢慢行又停响路間中靜靜睇星;營地前比幾到十隻飢餓鬼陀地牛睥實
就算唔能夠睇住太陽由海平面凸出嚟,不過攤响清新嘅草地上面,懶洋洋咁嘆世界,曬太陽
成晚嘅經驗幾咁舒暢,難忘

難得响香港睇到滿天星宿


難得响香港睇到滿天星宿
躺平
我曾經陪埋唔同嘅朋友,分享我嘅所愛。
直到宜家我都不時盤算點樣調整行程,希望帶大家行喱座山嘅唔同路線。
可惜齋諗,時間同行動力太少
要把握時間,做野嘞!


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

第一个支持了这篇作品
加载中…
加载中…

发布评论