香港故事由誰寫：重訪歷史博物館香港故事展覽

前幾日去左香港歷史博物館既香港故事展覽，因為佢下個禮拜就會關閉重整。記得細個都去過一兩次，不過印象就唔係好深，所以今次嚟到，發現呢個展覽都幾有心思，值得花幾個鐘頭慢慢睇。

展覽既第一部分，係介紹香港既自然歷史，所以係由四億年前開始講起。呢個角度幾有趣，我哋成日覺得香港開埠到而家都只不過係百幾年到，但係香港嘅故事原來可以係由四億年前開始講起。喺呢四億年間，你見住佢介紹香港曾經由一個平原變成淺海，變成沼澤，有過火山，亦都試過變成荒漠，你就會有一種滄海桑田既感覺，相比之下人類嘅歷史真係轉瞬即逝。

講完自然歷史，之後就係香港有人類以嚟既歷史。香港故事展覽有一個特點，就係佢嘅歷史觀好混雜-- 佢有時會用一個中原文化既角度同你講香港喺歷朝歷代有啲咩角色，例如鹽場呀港口呀等等；有時佢又會好戀殖，詳細列出英國喺統治香港之後香港有咩發展，甚至將香港歷屆總督嘅畫像陳列出嚟；但係呢突然之間佢又會好親中，喺度同你講香港明天會更好之類。呢啲觀點呢開始會覺得好混雜，但係諗深一層，其實呢個正正就係香港嘅特色-- 就係我哋從來無一個官方嘅論述，唔需要同一口徑，而且容許唔同人有自己嘅觀點。相信呢樣嘢喺香港故事重修咗之後就唔會再有喇，可能變咗成個展覽只會有一個中心思想，就係回歸之後人人安居樂業，天下太平。

香港故事係一個好用心嘅展覽。例如當佢介紹香港民俗，佢就真係會搭番個實物原大既戲棚，幾個人高既盂蘭節紙紮神像同埋太平清醮包山。當佢講到殖民時代，就會搭座行到上去既洋樓，同埋重現番以前藥房、當鋪既樣貌。佢動線既選擇同樣有心思。我地平時行博物館呢，都會想有一個單一嘅動線，即係話我只要跟住嗰條線就可以行曬成個館；但係香港故事係冇呢個情況嘅，好多時候喺同一個展覽呢，佢會有幾個入口啦，同埋佢唔會好明確話畀你聽要點行，邊一條先係正確嘅路線。咁呢個同樣都係佢嘅特色，亦都係香港嘅特色，就係冇人話畀你聽咩叫啱同錯，好多嘢都要自己摸索，自己去探索出嚟。

不過當然啦，香港故事都有值得更新嘅地方，例如佢相對太側重香港戰前既歷史，反而對於戰後嘅事情講得比較少。我相信好多人呢其實對香港嘅集體回憶都唔係嚟自戰前嘅事物，而係戰後先出現嘅一啲標誌，例如公屋、電視節目、輕工業等等，所以歷史博物館都值得花多啲功夫講下。同埋當然啦佢都會花好多篇幅講回歸，最特別就係佢有一段片，同你回顧返香港由殖民去到回歸中間發生既事。其中我印象好深刻嘅，就係當佢講到中國同英國簽署聯合聲明，承諾香港會五十年不變，然後熒幕上面大大隻字寫住“五十年不變”嘅時候，幾乎全場都“唉”一聲嘆左口氣；然後講到回歸中英交接既時候，當英國國旗慢慢降落，中國國旗連住國歌升起嗰下，突然有個阿爸抱住既細路女“好野！”咁嗌出嚟。我心諗，呢個畫面都幾有象徵意義。睇嚟隨住香港故事既結束，我地一向所熟識既“香港故事”，亦都會慢慢消失。至於新嗰個故事係點既呢，就睇我地點寫嘞。

（十八區遊記之七）