love nature, love travel, love drawing, love photographing

My little detour - 《呼吸小鎮》

2022 年 5 月 14 日

31 Jul 2019, Wed (Day 62 晴, San Miguel de Allende, Mexico )

今日純粹閒遊，所以亦都唔需要咁早起身，可幸我今早8點幾先正式醒，算係瞓得好足了。刷完牙洗完面當然睇下有咩簡單早餐，個廚房仲未搞掂，所以今日hostal去左買牛角包同曲奇做早餐。係早餐時間識左個法國人，他已旅行一年半，期間都係用hitchhiker 方式遊走，太有型。之後有個美國太太加入，原來佢係educator, 所以成程變左佢主動發言，但萬變都不離講緊自己家庭同自己事, 所以我哋都借故走開。食完早餐同另一美國太太傾開香港的事，佢好願意聽，希望佢真係幫手share post。

之後我就去感受下呢個鎮仔，但第一件任務就係睇下去Guanajuato 的車費係幾多，琴日問左兩間，今日終於跟老闆娘介紹再問其他兩間，丫，點解嗰日唯獨問淨呢兩間呢? 可能係...我一睇premiere plus以為係貴野。望左premiere plus 164 peso, 唔平得好多。但另一間flecha Amarilla係119 peso, 大佬，差不多爭成半，我梗係搭呢架啦。本來都諗住買定飛，不過呢佢叫我唔使急，去到先買就ok。

好，重要事做完，我就繼續周圍行。係行返hostel途中，我見有的帳篷仔，於是朝嗰個方向行，原來係mercado同另一個再簡單少少的market, 正喎，最鍾意行market! 我見到好多蜜蜂縈繞住嘅生果檔，仲見到上次係Xochimilco 好想試的牛肚湯，機會難逢，問左60 peso each後就坐低等食，碗湯紅紅的，我本身都驚好辣，但其實佢無辣味的，斜對面個叔叔仲教我落洋蔥同香草，仲要加埋清檸汁，其實真係幾好食，跟湯仲有tortilla, 點湯食都飽肚嘅，離開時我仲係菜檔買左個牛油果添（10 peso)。

跟住行返hostal hea一陣又出左去，今次係出左hostal後朝住左手邊行，又比我亂行左去巿場，嗰到仲有好多檔仔提供餐飲，但我已食飽了。反正都係，行埋去琴日無去的超巿，超巿雖大，但由於廚房唔知搞掂未, 所以只買了可樂同nacho (30 peso) 就返去。之後又口痕再買多個朱古力包（7 peso) 就返hostal 休息了,真心好悠閒。