My little detour - 《感覺之內， 意料之外》

琴晚4點幾比鼻鼾聲嘈醒， 點解個個新住客都咁夜先到。唉， 但之後嗰兩日應該無咩得瞓，所以都逼住瞓下醒下。 最後6:45am起身， 搞下搞下都要成7:30am先出到門口...而話說， 今日係我出發去Cuba嘅日子。 去到de gracia火車站好彩仲記得係platform 1, 等多唔使12分鐘就有車 （R2), omg, 上到車無位仲要幾逼下，唯有‘duck’正正係到阻住人地條路。 不過到左下一站就有位坐了， 無驚無險用左30分鐘就到左機場。 人生就好似競賽咁， 呢到亦都係， 個個趕住過橋去機場大堂， 而我因為用backpack所以可以行得比人快🤣, 瞬間我已去到shuttle, 仲等左2，3分鐘就有車添！

今次我揀左搭Air Canada由西班牙經加拿大去古巴。去到terminal 1, 見到架機AC1915係DE boarding定check in, 但我見唔到有英文字， 純粹係見到Air Canada的check in counter走過去。 企到埋去即刻有air canada人員嚟問野， 咦， 問得好詳盡喎！又問我去邊， 咩香港人可以有英國passport, 問古巴留幾日， 之後去邊， 咩公司做， 仲有點解本passport無出入境stamp嘅....問完我見佢貼左個通過安檢sticker比我！ 戲肉嚟喇， 條隊唔算長， 但點解排極無郁過， 我9點去到， 差不多10點好似都check in唔到20人😨， 等呀等， 終於10點多d到我了！ 其實本身我對今日的check in係有少少...驚有麻煩。因為我網上check in時佢話我無申請eTA, 所以整極整唔到， 唸住早少少嚟搞搞佢。可惜事與願違， 無論你預留幾多時間也總像不夠。 輪到我時，佢地攞我本bno check in 已搞左好耐， 我以為係我問左蠢問題（i.e 問air canada係咪包Cuba tourist card)。 後來我諗返應唔關事， 雖然佢地回應我話古巴好複雜... 到10:45多啲， 佢地終於肯出機票比我， 仲話我聽行李直送Havana添！ 

再望望隻錶， 得返一個鐘唔夠， 我唯有努力衝衝衝去安檢， 又真係第一次連對鞋都要除埋嚟check, 好搞笑🤣 ! 跟住當然係過海關， 我琴日先發現原來無西班牙入境印， 即係真係可以用EU自助過關機啦， 可惜.... 我又見唔到嗰條隊邊到入...所以最後都係經counter辦理。 any肥， 入到去見好多人排隊， 而基於我無野放行李架， 所以我決定等上機條隊散到咁上下先排隊！

佢地手腳果然好chill， 搞到差唔多12點先上到七七八八。 終於輪到我時， 架scan barcode機發出奇怪的聲音， 咦， 有啲野喎！我又係等等等的處境中無限輪迴。嗱！ 呢單野好明顯係關我事嘅， 但關我咩事呢， 我唔知， 我估都係不外乎我張eTA架啫。 佢哋篤左無限次電腦， 打過無數個電話， 騰左無數個圈， 搞左十幾分鐘佢地終於比我上機！ 有得上我當然唔再深究咩事， 只願快快步上機唔好咁樣衰！ 好明顯我係最後上機的一位， 為盡量避免怪異目光， 我一個箭步直衝去個位到， 當我搞錯以為45A係我個位， 仲問緊人之際， 後面有人叫住我😱😱！ 佢話我個agent (咩我個agent呢）叫返我出去有野同我講。 之後有兩個職員帶住我搭𨋢返去頭先個登機閘口， 佢話佢地打左去加拿大大使館確認， 本身係話我eTA無問題比我上機， 點知又再call返返嚟都係叫我唔好上機。 我同工作人員都一臉茫然， 而呢個時候我只係識問can i catch this flight? 佢地話唔sure, 無限個one moment 後， 我被通知飛機會起飛， 我的baggage已被offload, 個女仔帶左我出去， 經過海關睇睇我嘅passport， 再行去行李帶等行李， 但原來佢早已在失物處等緊我。孭住沉重的行李死跟難跟， 終於行到去check in counter。無限等待後， 我終於攞到張白紙打印的航班資料， 呢個就係明天的航班， 時間同今日一樣。 然後我問eTA嗰到明天係咪解決到， 佢話唔知架， 佢希望得！唔係掛， 唔得咁點！ 跟住佢話同事幫緊我搞free hotel arrangement, 終於， 我等到張酒店voucher! 佢地叫我明天早的到， 早的幫我搞， 應該搞到， 唔知呢係咩logic呢😪

最後都唔理得咁多， 我帶住張白紙印出的航班資料同埋酒店voucher, 跟住指示行左去parking G到等酒店shuttle。 呢到泊左好多唔同的車， 睇落又似私人出租車，都唔知邊架係。 或者今日係為左訓練我耐性， 一等就係40mins, 仲要唔係佢舉起個牌， 我都唔知係我要去的Alfa酒店！好彩無咩點等就開車， 原來開去T2先...點知上左客又要等， 今次係等換司機🤣, 一日真係發生太多搞笑事！

好喇， 終於到酒店， not bad wor, 裝潢幾modern, 間房好舒適。 我放低野後迅即係4點前趕去酒店餐廳食lunch 先， 因為話說....包晒三餐🤣🤣！我比左張餐券個待應， 佢話比左個餐牌我揀， 嘩， 個set €19.5, 豪過我平時食飯！我揀左鵪春蛋加nachos做前菜， 蕃茄凍湯同埋紅酒燴牛， 仲有cake with 朱古力醬， 好味喎！ 跟住返房hea下， 同friend交待下， 眨下眼又7點幾。 出去行左少少回來又吃晚餐， 其實唔餓， 但又唔想咁晏食， 所以揀左parma ham鵝肝沙律， 三文魚做主菜同埋生果做甜品（侍應Daniel超好人， 仲加左球雪糕比我添）， 好飽足的一天😋。btw, 我今日先知原來巴塞10點先開始天黑🤣

其實講真， 知道今日上唔到機我又無好唔開心， 可能真係唔趕時間， 而家咁對我嚟講， 總算係一個奇遇😝