趣香佳譯｜估唔到你係翻譯喎

語言係流動嘅， 好常因為人嘅遷移而受到影響。亦都因為咁，所以唔同語言入面，都有樣嘢叫做「外借詞」。1914年，有位仁兄胡以魯喺雜誌上面發表論文，進一步提出咗「借詞」同埋「譯詞」嘅概念。「借」又可以分為「借音」同「借形」。「借音」其實即係音譯，平時聽開嘅「巴士」、「士多」就係「借音」嘅例子。至於「借形」，大家主要知道嘅就係中文借用日文漢字，又或者英文借用法文串法，但發唔同嘅音咁，就係「借形」。而「譯詞」就係用中文本身有嘅字翻譯外來概念，例如用本來指祖先神嘅「上帝」指代聖經入面嘅「God」。雖然佢二元咁分咗「音」譯、「意」譯，但其實後來有更加多嘅字係音義並譯，出神入化到你未必知道佢係外來或者翻譯而成嘅。

以下呢啲外借或者翻譯得嚟嘅字，你又知道幾多個呢？

1. 以牙還牙

細個睇成語字典，見到呢個成語同其他同中國歷史有關嘅用語放埋一齊，一直都以為佢都係中國成語。大個之後睇《聖經》，先醒覺：「無理由耶穌抄中國人吖。」無錯，其實呢句成語係嚟自一個聖經故事，原句係：「若有別的傷害，就要以命抵命，以眼還眼，以牙還牙⋯⋯」（出埃及記21:23-25）呢句聽似殘忍嘅說話，有說嚟自人類最早嘅法律制度哈慕辣彼法典（Code of Hammurabi），亦有人話因為古時懲罰制度未完善，有時犯好少嘅錯就會處以死刑，因此呢句係提倡罪罰對等。不過翻譯到中文，漸漸變咗報仇咁解。

2. 世界

呢個字真係萬萬諗唔到係外來字呢。佢同「以牙還牙」一樣，都同宗教好有關係，不過唔係基督教，而係佛教。「世界」嚟自梵文「lokadhatu」，「loka」指「世」，即時間；「dhatu」指「界」，即空間，「世界」就係指宏觀宇宙同眾生所住國土。咁樣睇，呢個詞都係胡以魯所定義嘅「譯詞」。

3. 民主

呢個詞語唔使講，應該好多人都知道係日本嚟嘅「借形」字。但點解中文有咁多抽象嘅詞語（例如「自由」、「經濟」、「主義」）都係嚟自日本呢？話說喺五四時期，中國知識份子好多都從鄰近嘅日本學成歸來。當時日本經歷明治維新，已經引入咗好多西方概念，但中國嗰陣仲係吸收階段。喺呢班知識份子翻譯日本著作嘅時候，就將好多描述相關概念嘅日文漢字借咗嚟中文。

4. 幽默

講到「幽默」，就不得不提自稱「幽默大師」嘅林語堂。佢都係第一個將「humour」翻譯做中文嘅人。其實「幽默」一詞屈原早就用過，不過嗰陣係指完全靜默。至於點解林語堂會神來之筆用咗「幽默」嚟譯「humour」，眾說紛紜。有說佢講過「善於幽默的人，其諧趣必愈幽隱」，所以就譯幽默。不過佢都曾經喺《幽默雜話》一文入面話：「其實都係寫寫吓嘢諗到，唔係諗好耐選定嘅。」不過佢的確好成功，因為都應該無咩人覺得「幽默」係翻譯得嚟嘅。

5. 普羅大眾

「普羅大眾」講出嚟咁順口，都難怪好多人唔知佢都係翻譯。佢嘅翻譯淵源同「民主」有啲似，都係五四時期譯入中國嘅。係音義並譯嘅例子。不過更多人聯想唔到嘅，就係呢個詞同共產主義都好有關係。諗唔明？睇吓英文「proletarian」，再睇下共產黨中文「無產階級」，就即刻明曬。「普」同「羅」都有「多」、「散佈」嘅意思，全個國家最多係咩？就係無錢無身分無地位嘅人囉。以音譯嚟講，「普羅」都真係翻譯得算唔錯。

大家仲諗唔諗到一啲精警嘅譯入語 / 外來語呢？歡迎喺留言分享吓！

==========

人二譯社｜InBetween Translators’ Collaborative 🏠👯‍♀️

Translation | Transcription｜Proofreading｜Reviewing｜Copyediting｜Copywriting | Typesetting

.

Enquiries ✉️: inbetween.trans@gmail.com

Follow us on Instagram ✨: @inbetween.trans