翻譯文章；好懶，別預期這裡會有定期更新
大倫敦警務處長Cressida Dick鑊鑊金都想連任？
20210723著，原載立場新聞
（註：Cressida Dick 2022年2月辭職、4月下台。2月警察操守獨立辦公室公開報告，指責查靈閣警署警員涉及種族歧視、厭女、欺凌及性侵，並指這些並非個別例子。同月她表示不再獲市長信任繼而辭職。9月Sir Mark Rowley繼任大倫敦警務處長。譯稿時尚未有此等變化，故註之。）
近月唔少香港人赴英展開新生活。除咗曼城，好多人依然鍾情倫敦。執筆之日適值倫敦市長簡世德（Sadiq Khan）打算動用90萬英鎊（折合港幣962萬）協助移英港人就業、房屋、教育等方面。大家一面倒讚佢，但大家對佢以至佢管嘅倫敦，又認識幾多？首都警政近年醜聞一大籮，大倫敦警務處（the Met；倫敦分為倫敦金融城、大倫敦兩部）處長表現差夾厚面皮，簡世德居然仲曾經大讚。而喺近期再爆多幾單大嘢之後，都無下令撤換佢。呢個警務處長係乜來頭？畀少少背景資料先：
英劇 Line of Duty 至今播到第六季，依然極受歡迎，獲《獨立報》盛讚為「全英十年來最多人追捧劇集」。除咗情節緊張劇力萬鈞，差佬查差佬都係賣點，大談制度性腐敗（institutional corruption），口語啲講就係上樑不正下樑歪。
六十年代英警本來聲譽不俗，但六十年代尾一個倫敦犯罪分子竟然被一個督察兩個沙展要脅磅水，警隊聲譽開始一落千丈。「收茶錢、收規」（a drink）呢家嘢英港皆然，例如收規後淫褻物品審查隊收規後容許書商開業兼大賣鹹書，書商亦識做，「掃蕩」前書商亦獲通水，定期畀少少貨警方充公兼溶紙磨漿銷毀，警方亦好交差。
呢班以警隊為名自組小圈子、幫派（形容CID係「firm in a firm」）到有警察明目張膽話自己幾個電話可以擺平倫敦嘅事，幾沙塵，有錢使得鬼推磨也，於是有報館開始偷偷地錄音，揭發事件。例如拉咗個犯嘅警員會收到電話，對方問「有冇嘢可以鬆動下？」，企圖令啲證據變得冇咁可靠。卒之喺1971年成立咗A-10，希望令CID「捉到嘅犯多過政府請落嘅犯（即係差佬）」，解決腐敗問題。最後踢走500個腐敗警察，情況算係有改善。
1987年育有兩子嘅私家偵探Daniel Morgan喺倫敦一間Pub停車場被人用斧頭殺死，兇手至今在逃，但大倫敦警務處堅拒承認有制度性腐敗。有獨立調查委員會都可以抵賴，都可以將陰質嘢收收埋埋。
今年7月21號，獨調會結論係大倫敦警務處喺處理Morgan案上出現制度性腐敗，又批評警務處長Cressida Dick（下稱狄氏）嘅講話。警務處高層有足足七年阻攔獨調會成員喺適當、獨立同不被監視下進入最重要嘅調查資料庫HOLMES，狄氏又問「係咪真係要睇啊」，到畀睇又只係揀啲畀獨調會睇，又話要睇晒就要85000鎊，令獨調會主席感「匪夷所思」。副處長Stephen House之前仲打圓場話係「間唔中我哋可能會過分起弶（over-defensive）」，報告話遠遠唔止係咁。報告又斥警隊毫不誠實，無法直面腐敗、調查腐敗情況同喺過去嘅錯誤中學習。報告指調查此案嘅警員同犯案疑兇關係非常密切，斥責警隊收收埋埋好多嘢只顧公眾形象。
狄氏係188年來警隊首名女處長（以及係公開出櫃嘅處長），警界打滾38年、2017年上任、出年4月約滿，下個月打算鋪路，望之後續多一任。佢又話報告指「警隊就算出事亦極低調，因欲保全聲譽」係「踩緊得罪警隊嘅界」。Morgan個阿哥都力斥狄氏，要求佢辭職，不過狄氏早前已經話無意為此事辭職。
狄氏仲想延後退休，繼續做，但有無數敗績纏身，一切可會如佢所願？除咗纏咗廿幾年嘅Morgan案，今年7月11號Euro 2020英格蘭意大利大戰，警方未能喺溫布萊球場做好嚴密部署，搞到無飛嘅大舉衝閘入場，有飛嘅反為被人推咗出嚟，甚至傳到球場守閘機職員被無買飛球迷買通。有警員甚至話就算見到有人無飛，為咗警隊形象，高層下令要袖手旁觀。個警員都忟憎，覺得明明自己應該維持秩序又接到啲咁嘅指令。事後足總同「警方」會調查嗰日嘅亂象喎。
狄氏在位期間，用刀行兇（包括老謀、打劫等）罪案顯著上升，警方無法制止，單睇呢項都已經係好大劑，但似乎鑊鑊金之後，呢個狄氏都有得升。2005年倫敦一次恐襲造成52死700傷。同年佢率領過嘅小隊唔小心喺地鐵站七槍錯誤射死27歲巴西籍電工de Menezes，當錯咗佢係放炸彈嘅恐怖分子，歐洲人權法庭居然仲話唔好告英國警方喎。2008年被問返呢名電工嘅死，佢嘅回應係「佢哋無做錯到」。本身想喺北愛爾蘭做警務處長，撻Q之際遇到文翠珊呢個福星，派咗佢去外交部管保安事務。
拉返嚟今年。48歲外交人員保護組有組員Wayne Couzens本月承認今年3月籌劃並殺害33歲女子Sarah Everard，喺街度綁走佢，老謀綁架強姦（6月認罪）樣樣齊。7月中警隊先至炒佢魷，即係嗰4個月仲有糧出。市民梗係睇唔過眼，3月13號包括劍橋公爵夫人Kate等嘅千五人，喺倫敦南部Clapham Common為Sarah開追悼會。狄氏呼籲市民用其他方式哀悼，唔好去個追悼會，受唔少批評。差佬又捉人違反疫情限聚令，推撞女性追悼者，撳人落地、手踭窩面，踩落啲獻花度，兼拘捕4名追悼者，又堅持「保障人民安全」，「著重防疫」云云。手踭窩人面嘅警員仲陰陰咀笑，話「哎呀陰公豬囉」（that’s a shame innit）。悼念者又嗌口號，例如「拉返你哋自己」（arrest your own）同「警方可恥」（shame on you）。
倫敦市長簡世德同內政大臣彭黛玲下令要求警方交代。助理處長就話當時執法行動係有必要，咁多人好易傳染病毒，要為市民安全做嘢等等。狄氏都有致歉嘅，門面說話講足，不過對Morgan一家呢啲說話由狄氏口中講出相信係幾刺耳。自民黨魁直情叫狄氏辭職，話倫敦上百萬女性已經對佢失信心，工黨就無叫佢辭職，話佢去留都唔會令英國女性喺街度更為安全。就當日警務安排，首相Boris Johnson已經叫狄氏自己查自己，又叫內政大臣彭黛玲委任警務、消防及救援監督局（HMICFRS）檢討學到乜嘢教訓。
佢任內仲有好多單大嘢，例如警隊舊年7月高調截停搜查黑人女跑手Bianca Williams，搞到人考慮控告處長，佢先道歉並考慮檢視落孖葉程序，但已觸怒整個黑人社群。又對黑命攸關（BLM）示威毫不手軟客氣，譴責BLM示威者暴力，聲稱警隊冇種族歧視、截停搜查係「救緊黑人命」，示威者又叫狄氏落台。
2019年，促請政要重視環境同氣候問題嘅Extinction Rebellion（XR）兩度（4月､10月）喺倫敦示威遊行、佔領道路，雖然警方拉咗共三千人，但顯然令狄氏好頭痕。警隊起初畀佢哋喺特拉法加廣場舉行和理非集會，但之後喺全倫敦都禁止佢哋示威。狄氏2019年12月偷偷寫信畀彭黛玲，話呢個遊行畀咗機會警方可以獲得更多壓制示威嘅權力，請求更改1986年公安條例，令警方可以更容易禁制遊行。反恐警察又將XR放喺「極端思想名單」，令國際特赦組織英國分部極為擔心，被捕人士律師就斥責狄氏想借XR示威削弱人民示威權利，係想腐蝕民主制度，壯世界暴君同獨裁者嘅膽，因為佢哋本能就係要粉碎異見、令示威刑事化。
上星期三（7月14號），呢個狄氏居然仲獲威爾斯親王頒Dame Commander（Damn Commander就差唔多）榮銜。市長簡世德仲曾經讚大倫敦警方係「世界最精良警隊」，不過Everard追悼會之後已經無咁支持，但都只係召佢返市政府，話「唔滿意警方嘅解釋」咁唧。追悼會後，首相約翰遜都依然撐狄氏，對佢「滿有信心」，不過就有保守黨國會議員同大臣支持佢⋯⋯辭職啊。
如果話「屋漏偏逢連夜雨」，咁淋落狄氏嘅雨都怕且係鄭州級。本月中又再傳出警隊醜聞，《衛報》報道有外洩文件顯示Henley警校學警涉及暴力、欺詐等情況，例如舊年7月一個女學警隊酒兼啪丸後對一名警員手打兼頭鎚（已認罪及被革職），又指有部分應考人唔夠班但依然可以加入警隊，因為「唔夠人」（the Met needed the numbers）。今年4月22歲學警因加入新納粹恐怖組織，並喺申請表等謊報，終被判監4年零4個月。舊年5月一女學警喺入職後筆試（KRE-3）出貓，依然可以繼續警務訓練。舊年3月，又有學警承認喺落口供考試入面出貓，抄另一個學警寫嘅口供，而喺警告完佢之後，佢又可以重新開始訓練；同月又有兩名學警喺考試中出貓。今年5月大倫敦警員Kashif Mahmood因利用職權幫犯罪集團喺其他犯人度收錢而被判囚8年。
狄氏要不停闢「謠」，保證絕無此事，無降低招考要求，不過有警校消息人士同《觀察家報》講招考要求確有大跌，令想警隊保持質素嘅老差骨以及眾多學警都係極令人擔憂，原因係收唔到高質招考人，自然要對曳嘅招考人鬆手。鬆手仲因為約翰遜承諾要喺英格蘭及威爾斯增加兩萬警員。
呢支警隊姿勢多過實際，一刻話限聚令連放狗行下都要驅趕，偏偏狄氏自己就喺倫敦西敏橋（無任何社交距離下）盛讚衞生署（NHS）醫護人員，雙重標準啊可。似曾相識？做衰咗仲有得賞有得讚，哈！除非有人有痛腳被警隊揸住啦。嗱嗱嗱我講緊英國啊。
有傳媒分析指佢性格可親（對員佐級而言），面對其他人可能已經縮沙嘅難關相當「堅毅」，以及喺相當事務及觀點與內政大臣彭黛玲相似。英格蘭西北前總檢控專員就認為彭黛玲繼續用狄氏做處長，係可以將市民不滿完全卸落佢度，由佢做箭靶。《觀察家》認為狄氏對連任處長志在必得，但值得留意嘅係90年代得一個處長做得晒兩個完整任期。
有做咗30年、2018年離職嘅老差骨話狄氏最致命嘅就係不斷否認，之前話制度性種族歧視，而家到制度性腐敗，又否認。佢覺得總有一刻要清楚咁話「我哋做錯咗，我哋知錯認錯。」，唔好避。「無公眾信任，警務工作係唔會得。我擔心啲市民會唔再因受害而報警，唔再肯做證人。」
其他參考︰2021年3月及7月《泰晤士報》、《衛報》、《The Week》、BBC電視節目《Bent Coppers》等。
https://www.spiked-online.com/2021/07/21/cressida-dick-has-failed-upwards/
https://www.independent.co.uk/arts-entertainment/tv/line-of-duty/line-of-duty-real-b1839548.html
喜欢我的文章吗？
别忘了给点支持与赞赏，让我知道创作的路上有你陪伴。
发布评论…