超現實港故仔
超現實港故仔

香港文字創作人 一人分飾多角 創作多元故事 請多多支持

【亂世搵食記】 — 良知點心紙

人在江湖、身在亂世,生活不由己…


從2019年起,世界從此不一樣、生活從此不一樣;

以前嘅香港人,搵食艱難;而家嘅香港人,搵食、搵買都係一種表態,生活艱難,依然要行。

2020年【亂世搵食記】,重新起步,食落口嘅係…良知。


「一盅兩件」、「飲啖茶食個包」、「得閒飲茶」呢啲老一輩嘅口頭禪,相信各位土生土長嘅香港人都聽唔少,無他嘅,熱辣辣足料而又香氣四溢嘅蒸籠點心,對美食愛好者嚟講,的確好難抵擋嘅;萬一你抵受唔到美食嘅誘惑而又踏入咗茶樓、點心店嘅話,恭喜晒!你嘅耳仔將有機會承受到一輪又一輪猛烈嘅聲量轟炸。

如果你唔鍾意嘈,入茶樓會係你一大挑戰,因為茶樓一直以嚟都係打躉吹水嘅好地方;食客歎住點心高談闊論,已經係茶樓嘅日常風景;你有時會覺得自己身處緊城市論壇,聽緊維園阿伯嘅大激辯;有時就會覺得自己置身喺都市閒情,聽緊三姑六婆講茶餘飯後嘅娛樂熱話;當城市論壇已經搬離維園、都市閒情已經「壽終正寢」,茶樓依然係人氣旺盛、口水橫飛嘅旺地。


而喺呢一個寧靜嘅早上,距離工作時間尚有一個鐘,我路經一間不甚起眼嘅點心茶餐廳,被擺喺門外嘅外賣點心所吸引,抵受唔住,我竟然走入呢個「寧靜」嘅禁區…


其實曾經何時,我都幾鍾意走入茶樓或者呢一類點心茶餐廳,因為你總會聽到好多有趣嘅事…

「衰女嚟架!枉我對佢供書教學!」

嗱!左邊枱面上映緊一套辦公室「無間道」:部門主管個女潛伏咗喺老細身邊做秘書,點知個女做咗老細情婦,最後個女仲做埋阿爸上司,因為公司要開源節流,阿女仲裁走阿爸添,而家阿爸就坐咗喺度食住腸粉唱緊個女不孝嘞!

「唔係我想話人個女,但佢真係嬌生慣養,縱壞晒呀!」

呢邊鬧得激烈,右手邊嘅院線都唔簡單!「非常怒嬸審新抱」:真係一日地球未毀滅,一日「婆媳糾紛」嘅劇情都可以源源不絕咁開拍呀!今日講到新抱喺屋企幫好朋友搞婚前派對,請咗一班猛男大玩特玩,點知遇著奶奶約咗雀友開枱,兩大雀派互相對峙,道德審判!而家成班奶奶團就喺度食住奶黃包賽後檢討,繼續力數新抱!


嚟飲茶,就好似置身喺一個開放式、無區隔、幾十個環迴立體聲同步播放嘅影院一樣,令你好似一次過睇緊幾十部荷里活大片,總有一套啱你口味,一定值回票價!

飲茶食點心仲有大把花生,咁荀問你點忍?但係,如果你食到嘅唔係花生,而係腰心腰肺嘅腰果,咁到底會點呢…


「呢班後生有書唔讀,喺度搞破壞!」

「成班人俾人誤導,無知呀!」

「個社會俾佢哋搞到亂晒!」

「世代之爭」,喺每個時代我哋都會遇到:老一輩唔明後生一代嘅新潮流、新一代亦唔理解老人家嘅傳統智慧,而當「世代之爭」由家常便飯、生活瑣事演變為絕不退讓嘅價值觀問題嗰陣,就只能企硬,冇得退讓。

一枱人聚埋一齊,有得傾梗係可以慢慢傾,可惜,有唔少都係冇得傾,唔想反枱,唯有離開張枱…

就好似好多人都覺得茶樓、點心店係屬於老一輩,係站在對岸的一群人,但經歷半年,有好多嘢已經變咗;當你一路步入呢間店舖,睇到牆上的告示、睇到電視機上播映嘅電視台、周圍茶客嘅對話,心入面竟然會有一股暖流,令你覺得,原來努力同堅持係可以感染好多人、可以改變心態、改變世界。

或者,黑白是非其實係一種普世價值,唔會因為世代而受到扭曲。


我好放心咁坐低,拎起點心紙,點咗一籠久違了嘅蝦餃同糯米雞,慢慢享受。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论