【亂世搵食記】 - 寒夜中的圍爐取暖

人在江湖、身在亂世，生活不由己…

從2019年起，世界從此不一樣、生活從此不一樣；

以前嘅香港人，搵食艱難；而家嘅香港人，搵食、搵買都係一種表態，生活艱難，依然要行。

2020年【亂世搵食記】，重新起步，食落口嘅係…良知。

小學雞IQ題：「到底食乜係最殘忍？」

1…2…3…開估！「咪煲仔飯囉！煲咗人個仔，仲唔係最殘忍？哈哈哈」

我諗，而家連年紀輕輕嘅小學生都心寒到唔敢再講呢個笑話，因為每日喺電視機見到嘅，都係打人個仔、射人個仔嘅新聞同畫面…

寒，唔係因為最近嘅天氣；係因為人、因為無良知嘅人…

走喺天后呢個小區尋找美食，本來唔係一件難事，但係喺亂世搵食，「色香味」嘅定義已經改寫，「黃色」係必備嘅一個要素，其次先係香同味。

見最近寒寒地，就梗係要食得暖笠笠啦！喺腦袋分泌出嚟嘅飯香支撐下，我終於摸到嚟呢間煲仔飯小廚；人少少唔想打邊爐，就去歎返個炭爐煲仔飯啦！

話說「煲仔」嘅出處，當然就唔係咁殘忍煲人個仔、亦唔關張保仔事啦，純粹因為佢係用細瓦煲煮出嚟嘅飯，咁叫下叫下就為咗「煲仔飯」喇！而因為瓦煲傳熱傳得慢，保溫能力強，食物嘅味道自然keep得更好，特別香濃！

通常等一個煲仔飯閒閒地都要廿分鐘，少啲耐性都會拍枱走人，但今時今日我哋都明白一個道理：「值得嘅嘢唔怕等，等得耐咗都唔會忟」，當你見到夥記將一煲冒煙嘅煲仔飯拎到你張飯枱前面，你就會覺得一切都係值得。

每次煲仔飯嚟到枱前，都需要再焗一焗，睇住啲煙喺個煲度升上嚟，你下意識都會想哄近索一索香氣！但請留意，而家你可能會先窒一窒，咁係好正常嘅，因為你嘅腦袋係需要一啲時間，透過精密而繁複嘅process去重新話畀你聽：「你眼前嘅煙，為你帶嚟嘅，只係煲仔飯嘅香氣…」

打開煲蓋，香氣撲鼻而出，香噴噴嘅鴛鴦腸配埋黃金到燶嘅飯焦，即刻醒神晒！在座嘅人無不立即交出飯碗搶食！

喺呢個時勢食煲仔飯有兩大意義：

第一）可以圍爐取暖

圍爐，簡單嚟講可以分大爐同細爐，大爐可以係火鍋爐或者燒烤爐，一大班人飲飲食食，呢個就係大爐；但係大爐唔係個個人啱，好似我呢啲有輕度級社交恐懼嘅，遇到一大班人就會窒機，周身唔自在，所以，我呢類人，就傾向細爐…人少少，放鬆啲，傾計都自在啲！

其實，約朋友圍爐可以好簡單，吹下水、搞下gag，開開心心又一晚，但呢一晚享受住呢幾煲炭爐煲仔飯嘅時候，大家都有一種心照不宣…

我哋唔會問大家最近點，因為可以見到大家已經足夠…

我哋唔會有特定話題，鍾意笑鍾意喊鍾意鬧，冇所謂…

我哋唔習慣約埋下次，但我哋都好想下次繼續齊腳…

第二）夠晒warm

傾傾講講，時間過得好快，個煲都只係淨返一塊塊飯焦，老土啲講「寶物尋歸底」，咪以為煲仔飯嘅飯焦又硬又乾，其實外脆內暖，一啲都唔凍…

就好似一班朋友咁，平日串串貢，其實講心唔講金；平日唔聚頭，一聚就雞啄唔斷；平日好cool，其實個心…好warm架！

咁多年友情，你話會唔會咁易降溫？

呢煲圍爐煲仔飯，唔係三分鐘熱度；

呢份友情，亦唔係三分鐘熱度；

呢度嘅香港人，其實都唔會係三分鐘熱度。