人間は酒だ !

不經不覺已經9個月冇見我老婆啦, 今年絕對係"有趣"既一年. 雖然咁多年黎我成日都要出trip 去呢到去個到, 但從來冇試過今似今年咁,大家分開咁長時間. 今年呢個情況,係運定不幸? 到而家到唔可以下定論.

點解咁講呢,因為未有疫情既時候,我仲可以隨時返深圳個陣,每日我都會趕頭趕命一到6點就收工走人.然後腦細見我咁早閃左就唔高興.我老婆之後雖然唔會一夠鐘就收,但佢會係咁比我催.所以之前我成日投訴佢.

好啦,今年疫情之下,佢終於下定決心轉左工,點知,轉工之後佢仲忙.不過因為疫情既問題,我今年都冇返過去咁滯,所以都唔存在我要一到6點就閃人返去既情況.我而家每一日都係做晒手上急既野先走.腦細呢半年對我既同情,又有點開心,因為我可以投放更多時間係工作上面.

至於我老婆亦都一樣,因為冇左我係到催催拱,所以每日佢都係做到好夜先收工, 係新環境底下,佢係成間shop既in charge, 所以樣樣野佢都要去take care, 你都咪話唔攰.

自從佢轉工之後,每一日做到10/11點都係家常便飯,收工之後佢一般都唔會咁快返去,而係約左佢班舊戰友齊齊飲返杯relax下.

好似琴晚咁,佢又係做到9點幾10點先收, 不過依然無阻佢要同佢班姐妹飲返杯既雅興! 如果冇疫情個陣,佢日日做到咁夜仲要出去飲酒既話,我肯定嘈到拆天.不過而家咁既情況,我都好平靜,因為我知佢轉工後真係好辛苦,壓力比以前更大.所以都變得冇乜所謂囉.

香港自第三波疫情以來,我都唔係好敢出去,見到深圳情況比香港好,我都冇咁擔心,至少佢地可以回復正常社交生活,見到我老婆有一班好姐妹陪佢,內心都倍感安慰.雖然我唔飲得酒.但而家好有一從衝動,想等疫情結束之後,同我老婆仲有佢班姐妹一齊飲返一晚勁既,以答謝佢地呢大半年陪伴我老婆.

突然諗起己故歌手 Hide 既一句金句: 人間は酒だ ! 期待,快啲通關,可以同佢地不醉無歸.