IF
IF

此 Matters 帳戶已停用,請勿加入。如有興趣閱讀我的文章,請前往: https://www.patreon.com/herrfung Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。

《阿媽上學去》點只C9喜劇咁簡單

識睇的話,一套師奶喜劇,其實唔會比開宗明義嘅專題劇/片嚟得膚淺。

要寫《阿媽上學去》(앵그리 맘 /Angry Mom/憤怒的媽媽),就一定要寫金喜善。我好難相信,自己會有喺呢度寫金喜善嘅一日。

有睇過《漢城》嘅讀者都知,我同金喜善嘅「淵源」。小說以外嘅小故事:99年某日,我同Chloe真係喺狎鷗亭某cafe,撞到金喜善;兩位金小姐仲合照過。當時金喜善仲同Chloe開玩笑,問佢喺咪大邱人(金喜善原籍大邱),又叫佢「姐姐」。所以,我唔會唔鍾意金喜善。

我覺得我唔會喺呢度寫金喜善嘅原因,係因為佢除咗紅足咁多年之外,佢另外一樣喺韓國聞名嘅嘢,就係冇乜演技。咁多年來,金喜善係一個國際級明星、係CM女王、但從來都唔係一個演員。

唔信的話,你可以嘗試搵返99年好紅嘅《忽然情人》(토마토 /Tomato)同2006年嘅《再次微笑》(스마일 어게인 /Smile Again)比較一吓;你會發覺,佢真係可以事隔七年、演技無吋進。

但最近有兩套佢嘅劇,令我對佢改觀。一套係去年佢同金宣兒(即係《我係金三珣》嘅女主角)嘅《有品位的她》(품위있는 그녀 ;我會譯「優雅的她」或者「有品味的她」。而我不知道乜撚嘢係「有品位」,有品定有位?你同酒樓門口個知客好熟㗎?);另一套就係呢套《阿媽上學去》。

(開始劇透喇,劇透撚自便。)

曹强疵(金喜善;台譯趙強子)係一個三十中、品味庸俗、粗口爛舌(係好撚粗口嗰隻)、經營一間地踎韓國食肆「豬媽媽」嘅草根師奶。某日,佢讀高二嘅十八歲女兒雅蘭(金裕貞;好靚女嘅明日之星)放學返屋企,被發現滿身傷痕,但唔肯透露傷痕嘅來源。於是作為媽媽,强疵決定向學校、甚至教育部投訴,均不得要領。

事情當然冇因為强疵嘅投訴而平息。某夜,雅蘭嘅同學喺學校天台跳樓「自殺」,在此之前雅蘭已經因為被恐嚇受驚過度、要入院接受治療。强疵為咗保護女兒,決定進入學校查過究竟。

編劇喺呢度留低咗三條伏線:第一條伏線,係强疵有一段不為夫家所知嘅往事。佢高中時曾經係釜山「有鱗有角」嘅「古惑女」,綽號「伐區浦刺身」,善於用刀;後來因為誤殺(冤案)而要接受感化、絕跡江湖。

第二條伏線,係强疵卅四歲,但係佢個女雅蘭已經十八歲,亦唔係同佢老公所生,身世成迷。强疵一直對夫家聲稱,雅蘭係佢去世家姐嘅女兒。但係無論雅蘭自己、定係老公奶奶,都唔係好信。雅蘭亦因為自己嘅身世問題,同媽媽關係唔好。

第三條伏線,係强疵決定入學校保護女兒。一個正常電視台嘅編劇,喺呢個位任你點寫,你都只會寫做老師入學校,甚至做校工入學校。呢套劇嘅編劇選擇嘅,係强疵嘅「逆齡」美貌,以學生身份混入學校,同女兒做同學。

完全係《逃學威龍》嘅格局。

呢套係2015年嘅劇,當時金喜善卅八歲,著起高中校服,化身為十九歲嘅「曹鈴鐺」(조방울;「방울 」即係鈴鐺掛飾,亦係强疵高中時嘅花名,意謂「大眼妹」),一啲都唔輸蝕戲中其他比佢細十幾年起碼嘅女同學演員;呢啲就真係金喜善嘅搵食本錢喇。

由於强疵本身並非善男信女,佢入到學校,自然唔會好似一般家長咁,用和理非嘅手段解決事情。於是返學第一日,佢就喺課室踢斷地拖做武器(開版相嗰碌)、以一敵幾咁同欺凌雅蘭嘅同學開拖、差啲連班主任都打埋。自後亦發生多次毆鬥,隻揪群揪都有;高中變成名符其實嘅「小童群揪會」。

講到尾,呢套都係喜劇+師奶劇,所以亦有幾多笑位。强疵嘅學生生活係其一,佢個女用盡方法想佢阿媽被踢出校係其二,强疵嘅好姊妹、一個有公主病嘅黑社會大家姐「韓公主」同佢嘅「哼哈二將」係其三。

我最鍾意嘅笑位,係强疵喺學校嘅頭號「敵人」高福東(Jisoo飾演)對佢日久生情,為佢屢次犯險之餘,仲鼓起勇氣對强疵示愛;最後發現强疵真實年齡同師奶身份之後,非常迷惘,自怨「點解我會愛上咗個大嬸」嗰段戲;係嗰類「佢唔笑你笑」嘅冷面punch line。

劇情嘅發展,當然唔會咁容易就解決到問題。强疵越揭越深,最後發現,整件校園欺凌同自殺(其實係謀殺)事件,竟然牽涉貪污嘅財團、黑社會、甚至牽涉同時係教育部長嘅總統候選人。强疵終於知道,單人匹馬嘅暴力,解決唔到問題;於是佢嘗試集合人馬,一方面訴諸民情、另一方面企圖以法律解決事情。

校園欺凌(我唔慣用「霸凌」呢個term,因為我會聯想到ING Barings)喺南韓並唔係咩新鮮事,當年我就「有幸」親眼見過我嘅學生Jenny(有喺《漢城》出過場嗰個)點樣恃住自己「有家底」而去欺壓其他同學,收取「保護費」(唔係錢,係請佢食嘢或者送偶像閃咭)。其他學生都間中會同我講,佢哋喺學校被欺凌甚至被打嘅事件。

校園貪污就更加係老生常談。教職員收取家長嘅「好處」,對學生嘅行為問題隻眼開隻眼閉、出賣考試試卷、甚至定期向個別家長索賄等等,屢見不鮮。《阿媽上學去》反映嘅,係貨真價實、每個有子女嘅家庭,每天要面對嘅問題。

好似我咁無關痛癢嘅補習社英文老師,都會有學生家長定期送上「小禮物」(米糕泡菜之類)嚟「拜託」我好好教導佢哋嘅子女;你可以想像,一個比我更關乎大局嘅高中教師,會受到點樣嘅「禮待」。「送禮」同「行賄」其實只係程度上嘅分別而已。

講返劇,不得不承認,近年韓劇嘅可觀性大增,已經脫離早年「生死戀」、「雞批」嘅狗血肥皂劇框框(雖然呢類劇唔係完全絕跡)。

喺marketing層面上,佢哋嘅植入式廣告(大部份係高級嘢,如Tiffany、Maserati、Volvo等)、包裝、OST、甚至premium(《鬼怪》嘅「蕎麥君」公仔、《和遊記》嘅全套主角公仔)等,都已經非常成熟。《阿媽上學去》有嘅,就係劇嘅logo,同埋Andriod手機遊戲

另外,現今嘅韓國電視編劇,經已摸索出一條路,可以令偶像、創作、新元素、狗血、煽情共融之餘,仲不時透過戲劇,反映南韓社會嘅弊病、甚至提出政治、道德、倫理等等嘅控訴。

  • 《經常請吃飯的漂亮姐姐》反映嘅,係辦公室欺凌及性騷擾;
  • 《有品位的她》反映嘅,係上流社會嘅荒唐同埋空虛;
  • 《Misty》同《Suits》反映嘅,係小圈子權力圈中嘅官官相衛;
  • 《Agron》反映嘅,係傳媒面對權勢欺壓嘅無力感;
  • 《我的大叔》反映嘅,係社畜人生同生活壓力嘅無奈;
  • 《阿媽上學去》反映嘅,係校園暴力、貪污及獻金政治嘅問題;

呢啲只係一部份嘅例子;我睇得太少,所以例子唔多。

呢個年代,電視劇喺南韓,經已唔係單純嘅「娛樂」咁簡單;佢哋同時亦肩負「反映時弊」嘅責任。呢啲韓劇同「逆權系列」之類嘅韓片唔同,佢哋冇開宗明義咁作一個專題嘅探討。佢哋將問題比較subtle咁融入戲劇入面,但係佢哋嘅發聲力度,一啲都唔會比專題電影弱,滲透層面亦更廣。

因為打正牌頭講某一件事嘅電影,遇到好似我呢啲已經清楚了解事情嘅人,就會選擇唔睇。喺劇裏面不具名咁滲透出嚟,冇咗「正經八百」嘅包裝,可能會吸引更多人嘅注意。

不過,韓劇要洗脫大家對佢嘅stereotype,談何容易。淨係兩岸三地各大小韓劇討論區嗰種「小鮮肉」、「歐巴」、「我的親」意淫言論,同埋無差別只睇靚仔唔理劇情喻意嘅「腦殘粉」狂迷,韓劇喺正常人心目中,都幾難有翻身之日。

情況同啲毒撚「龍友」一副猥瑣相去影𡃁模蘿莉crossplayer差唔多咁倒胃。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论