IF
IF

此 Matters 帳戶已停用,請勿加入。如有興趣閱讀我的文章,請前往: https://www.patreon.com/herrfung Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。

《逆流大叔》沒有告訴你的中坑二三事

勵志?到你四十歲後再答我啦。

首先,呢篇文不含劇透,因為我連套戲都冇睇過。唔係唔想睇,只不過人在異鄉,好多理所當然嘅嘢,嚟到德國就連阿拉丁神燈都幫你唔到。

所以,其實我又做多次標題黨。因為我連套戲噏乜都唔知就先屈佢一繭,話佢冇告訴你。

然後,呢篇嘢講嘅係中坑之苦,同情緒病無關。講定先係因為費撚事睇啲閪人寫埋啲甚麼「在網絡或其他公共空間,無差別揭示自己有情緒病,那些人想得到甚麼回應?」嚟單單打打。係喇,我為咗一百幾十個paywall以外嘅claps詐癲納福喇,得未?盧海鵬試咪!

不過如果佢下一篇講「在網絡或其他公共空間,無差別揭示自己是個中坑大叔,那些人想得到甚麼回應?」的話,咁我都吹佢唔漲。所以我都係block鳩咗佢,冇眼屎乾淨盲。自欺欺人係喺呢冇乜符嘅情況之下嘅妙藥靈丹,逃避雖然可恥但好撚有用。


近期睇咗好幾篇關於《逆流大叔》嘅影評/感想,其實都寫得好好,起碼喺我呢個未睇過部戲嘅人眼中寫得唔錯;睇完啲文有去睇戲嘅衝動(我係個從來都唔怕劇透嘅人,有時甚至專登睇完劇透先入場睇戲,或者煲劇)。

只不過,如果你將電影比喻為香港嘅近況、喻意大家逆流而上嘅,我冇意見。但係,如果你認為睇完呢部戲,就會了解一個中年大叔嘅處境的話,朋友,你太年輕了。

「人到中年」呢家嘢,如果真係好似任何同類電影/電視劇形容咁嘅話,其實都唔係件壞事。

你可以話:「唓,講到咁恐怖,咁人哋啲真正嘅老人家咁又點呀?咪又係咁過日子!」你啱,但係一個人由中坑變成老坑,以退休年齡65歲嚟計,你起碼有廿幾年時間去接受現實。由年青到中坑,冇嗰喎;你一朝起身,發覺自己已經係大叔,咁就係㗎喇!

嚟嗰陣,你仲係事業上面衝緊,仲係忙到得閒死唔得閒病,仲上緊位,或者上咗位;總之,喺你毫無準備之下,boom!你已經係中坑喇。

幾時?唔知㗎喎!有啲人卅歲就光頭大肚腩,郭富城就五十歲都仲未算中年。咁容易講得埋就唔叫「中年危機」啦!如果我08年頭就話到你知,同年十月會有「金融危機」的話,呢啲就唔叫「危機」,叫「機遇」;你仲唔有錢借錢、有貨借貨咁做淡倉等派彩咩!

所以,當你見到啲中坑,面對住中年危機,著到大紅大綠,或者孔雀開屏,走去溝大陸妹;千其唔好見怪。說穿了,「中年危機」者,其實係唔忿氣啫 — 唔忿氣一朝醒來,發覺自己突然變咗中坑嘅制約反應。嗰啲polo反領、夏老威、花喱花碌恤衫、俾個素未謀面嘅「網上情人」滾晒全副身家之類,其實只不過係對歲月無情嘅強烈控訴、用力過度咁解啫。

既然《逆流大叔》係講爬龍舟,咁我就先講吓「身體」呢回事。

人到中坑,最易為人所察覺嘅第一件事,就係身體嘅轉變。光頭肚腩皺紋呢啲就梗㗎啦,我講緊嘅係體能。

作為一個朝九晚十嘅香港人,放假最大嘅娛樂,除咗食就係瞓。幾年下來,由於缺乏休息同運動,血壓自然高。醫生喺呢啲環境之下,一定開血壓丸要你長期食。如此一來,你唔運動由自可,當你想train返嗰陣,你就會發現,無論你點努力去做個「液流大叔」(汗液個液),你嘅心跳,永遠都上唔返最高心跳嘅90%。

90%以我44歲嚟計,即係大約每分鐘159吓。我以6 round eliptical HIIT嚟試,最盡都係152。

以上嘅心跳圖,係我訓練大半年嘅成果。

「挑!你廢啫!練多幾round,再跑快啲咪得囉!」

冇用㗎,同樣嘅圖我cap咗幾十張,第五round已經peak咗㗎喇!你再𨂽多幾round都好,係咁多就係咁多,冇得你硬頸。你可以選擇,戒咗血壓丸,等心跳同血壓一齊高返,然後轟轟烈烈咁爆血管;或者認命。

上唔到90%有乜咁大不了?即係話,我嘅peak performance已經封咗頂,唔可以再突破。即係話,我嘅VO2 Max係咁多就係咁多,唔可能再做好啲。我唔知呢啲對你哋嚟講代表啲乜,對我嚟講,代表all down hills from here。

「唔做到最勁,咁keep返個靚身型得喇啩?史太龍同阿諾舒華生力啤都係咁啦!人哋七張嘢咪又係咁fit!」

Well,有啲嘢,你可以即管做,亦都唔一定做唔到。不過,真係有人六舊腹肌加個大肚腩㗎:

點解?「全脂賢」有得收,胃腩冇㗎。食咗咁多年嘢,係咁㗎喇。唔係你以為人到中坑嗰陣,仲可以似吳鎮宇黃德斌咁型?諗吓好喇。


「男人邊係講外表㗎!事業為重吖嘛!」

事業,男人一生嘅成就;同時亦係男人一生嘅咒詛。每個男人打從畢業之後,除非佢一係好掂(即係老豆好掂)一係好廢;否則,佢都會全情投入,發展佢嘅事業。

先唔好去講你四十幾歲都仲係喺啲草根位置載浮載沉呢啲人間慘劇,我就當你事業有成,擠身中產階層,喺食物鏈嘅中上游位置,好未?

人到中坑,「事業」呢樣嘢,就變成一套「七傷拳」 — 傷人七分、傷己三分。傷人就好易明,正所謂一將功成萬骨枯,你要向上爬,自不然要踩住人哋上。傷己呢?人到四十,如果唔係太廢的話,你喺你嘅位置向上望,其實都唔會再有太多空間俾你上移。

事業就好似一場足球比賽,你一係就不停進攻,一係就打守勢波;冇中間嘅。人到中年,呢個係你開始轉攻為守嘅時刻;亦都係你「報應」嘅來臨時刻。仲記唔記得你廿零歲進入集團工作嘅時候,你係點睇嗰班四十幾歲嘅中坑管理層?

「老海鮮」、「老而不」、「死老餅」、「食古不化」、「做到退休直入棺材吖笨」、「阻住地球轉」、下刪一千字。

「他朝君體也相同」嘅「他朝」終於出現。輪流轉,幾多重轉;而家你終於成為班八九十後、甚至2Ker口中嘅「老海鮮」;點呀?感覺如何?頂得住冇?

「挑!俾人話兩句有乜所謂!佢哋夠膽當面串我咩?我但求每個月準時出糧,其他嘢話撚之佢!阿叔我大人不記小人過!」

Point taker!我就係想講出糧。有時間的話,打開你個online banking睇一睇,係咪好滿足?中產喎!有車有樓喎!人生勝利組喎!六位數月薪喎!

有冇計過,公司裁員的話,兜你一個出門口,足足可以cover下面幾多個比你年輕有活力有新idea唔離地嘅年輕同事?有冇諗過,公司裁你一個,然後升你條頭𡃁坐你個位,足足慳返幾皮嘢一個月?

呢個世界,咩都有可能發生,就係「我係公司重臣,冇咗我公司會唔掂」呢個諗法永遠唔會發生。除非你係嗰啲已經起晒躲嘅「打工皇帝」級中坑,否則,中年失業同提早退休,其實分別唔大。你能夠減薪一半降一級搵返份工,已屬萬幸。年中幾多中坑失業後搵唔到工,美其名走出嚟「創業」,實質上同班死𡃁仔出嚟爭生意、賤物鬥窮人,你又知唔知?

差啲唔記得提你,你係中產階級、人生勝利組、仲要供車供樓、個仔九月仲要入讀國際學校、要認購廿萬債券、同埋每年學費卅萬;你諗住幾時過數?

事業,其實係上帝冇嘢做整出嚟玩你班中坑嘅一個prank嚟㗎。


其實,人到中坑,究竟係咪真係好似上文講得咁恐怖、萬事俱憂呢?

講真,因人而異啦。有啲人,可能仲慘過我上面鳩噏嘅嘢。有啲人,人到中年都仲可以保持樂觀。所以,都係睇人。

對我嚟講,人到中年,最唔老嚟嘅,除咗係減肥好難(新陳代謝率減慢嘅後遺症)之外,就係俾人兜口兜面叫「大叔」、「阿叔」。

以前睇過篇文講過,原來「阿伯」呢個名稱,係一個褒義名稱;即係「我爸爸都要叫聲你阿哥」咁解。如此推論,叫我「阿叔」,即係話我係令尊翁嘅細佬。講到尾,一句阿叔,我都係「傑仔」、「阿Ken」,都係做人細嘅。

先唔去講大細嘅問題,我同你非親非故,你叔乜Q嘢唧!哥前哥後三分險,叔前叔後六分險呀!因為阿叔更年期近,發起老爛上嚟,仲小氣過方丈呀!

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论