貼地中產的離地德國（二）

大家有冇讀歷史？仲記唔記得希特拉點死？歐戰戰敗喺柏林地下室自殺？

錯。

佢係因為cut唔到有線，俾畸寶啲CS監生激鳩死㗎！

希特拉cut唔到有線當然係個爛笑話。但係，如果希特拉佢老人家仲健在，仲住喺德國，你估佢cut唔cut到，德國公用事業嘅合約呢？

德國嘅公用事業，特別係電力同電訊，都係行合約制嘅。同香港唔同嘅係，德國嘅電力公司，唔需要跟區域去被捆綁。亦即係話，假設我住喺九龍城，只要我想，我可以幫襯港燈，唔一定要跟死中電。

德國有唔少電力公司。喺Regensburg，一般嚟講都係幫襯E.on、REWAG、RWE、Yello Strom呢幾間。

唔同嘅電力公司之間嘅競爭都幾激烈，但唔代表有人會玩割喉戰。德國電力公司之間嘅差價其實唔大，因為發電成本高。咁你會問，既然分別唔大，咁點解要轉公司呢？

答案係：Bundle。

德國電力公司，最好亦係最老撚土嘅生意模式，就係行套餐制。所謂套餐，即係一個價錢，包幾多度電，之後每度電點計，同埋每年交幾多個月電費。一般嚟講，係交十一個月，然後一個月免費。

不過我哋今年嘅新合約就連呢樣都取消埋，硬食十二個月。

每一間電力公司，都有佢嘅一套基本計費模式。簡單嚟講，就係睇你住嘅地區，再睇你嘅家庭人口，例如二人家庭，佢就預算你每年嘅耗電量大約2500kWh ，超出2500kWh嘅就喺年尾補錢。

E.on嘅2500kWh套餐，以我住呢個鎮嚟計，連新用戶優惠，每年609.44 €，即係頭一年每個月50.79 €；優惠完結後每月67.04 €。留意返，如果你係經常煮飯煲湯的話，2500kWh係唔夠嘅。我哋兩個，喺過去七八年，每年用量都係3000kWh。

至於每度電幾錢呢，就視乎你用咩電。冇指定嘅就平啲，指定要用再生能源嘅就貴啲。

「咁點老撚土呢？」

電力合約，正常每年檢討一次，即係每年十二月，你就會收到電力公司嘅statement，話你聽用咗幾多電，要補幾多錢，同埋下年個套餐點計。

我哋頭一年住喺downtown Regensburg，因為上手租客好少用電，而我哋新嚟唔識規矩，戇鳩鳩咁接咗上手嘅合約，冇按我哋嘅家庭人口開一份新合約；所以我哋個套餐係每兩個月25歐。好平呀可？

因為額外費用冇包熱水，屋企裏面有個大型熱水爐（香港用開嗰隻德國寶嘅儲水量，你凍到肺炎都未到聖誕）；再加上電力煮食，我老婆又鍾意煲湯，結果每個月都用到凸晒，最慘係唔到年尾都唔知。

到十二月，我哋收到份statement，嚇到下巴跌落地。我哋要一次過補成千歐電費之餘，下年度嘅套餐，要成百歐一個月。

年尾流流無啦啦要我跌成千歐，嗰陣仲係十算，老唔老撚土？

呢啲就係德國著名嘅「Shocking Bill」。

「俾唔起咁點呀？我實有幾千歐擺喺度等你攞㗎？」

德國唔係香港，呢啲位好多時都有偈傾。只要你帶埋你嘅Shocking Bill去到電力公司嘅credit department，佢哋就會俾個分期你，一般都係一年攤還。亦即係話，你喺之後嗰年，除咗每個月嘅電費外，仲要另外俾錢，還埋上年嘅Shocking Bill。

要轉電力公司，就算你係希特拉都好，要合約完結前三個月通知，係書面同知，一係寄信，一係fax（香港仲有冇人用？）；email恕不接受。

想喺合約生效期間轉公司？唔好意思，希特拉都轉唔到。除非你搬咗去，你用開嗰間電力公司唔覆蓋嘅地區。

講咁耐，咁德國電費有幾貴呢？

根據CLEW（The Clean Energy Wire）嘅報告，喺2018年頭，德國家庭大約平均俾緊0.2942歐元一度電，以今日牌價9.6算計大約兩個八毫二港紙。

呢個亦都係點解成個德國都冇冷氣嘅原因：冷氣你買得起，電費你俾唔起。亦因為電費咁貴，所以當德國人唔用某件電器嗰陣，係會連插蘇都掹埋；因為就算齋插唔開，其實都會耗電；小數怕長計。