紅歌唔紅人

歌，你好可能聽過；人，你未必知係邊個。

上星期寫完篇《那些年，我追捧過而又唔紅嘅歌星》之後，覺得意猶未盡，於是決定今個星期冧莊；不過唔係寫人，係寫歌。

一講到「紅歌唔紅人」，我腦海第一個彈出嚟嘅係梁漢文。但係呢篇文我冇寫佢，因為首歌比佢紅、個人比佢更加唔紅嘅，大有人在。

「紅歌唔紅人」無論以任何娛樂公式嚟計算，都係一個undesirable outcome。一來，咁即係話呢個project嘅投資有一半泡咗湯；二來，下次你仍然要繼續由零開始咁宣傳佢下一隻新碟，如果仲有下次的話。

每個人心目中，都可能會有一個playlist，裏面有好多其他人未必會視為至寶嘅歌；呢個係我個playlist。

《告別Barcelona》 — Fundamental

留意返，首歌唔係哥迪奧拿或者恩尼斯達嘅作品。

喺上世紀八十年代末期，香港曾經興起過一陣「夾band熱潮」。呢次唔係第一次嘅夾band熱，但好可能係最後一次。呢段短暫band sound嘅時期，應該係過去卅年，香港樂壇最精彩嘅時期。

點解精彩？因為絕大部份嘅band sound，都係原創歌曲。

八十年代嘅香港流行樂壇，基本上係俾日本壟斷嘅。張國榮、譚詠麟、梅艷芳呢三個big 3好大部份嘅主打歌，都係改編自日本流行曲。安全地帶、山口百惠、澤田研二、谷村新司、西城秀樹、德永英明之類；you name it。

可以話，喺香港除咗「輝黃」同埋盧冠庭，基本上冇乜人作曲（其實有，數量亦都唔算少，不過唔係呢篇文嘅主題）。

Band sound嘅興起，同時亦都帶嚟另一個好重要嘅產物：唱作人。夾band嘅熱潮來了又去，但係本地原創歌曲、唱作人就繼續喺香港生存落去。

鍾意《告別Barcelona》嘅其中一個原因，係因為佢嘅曲風 — 自八十年代中期開始，日式techno音樂喺香港，由hit一直去到接近泛濫。呢首歌所模仿嘅Flamingo風格正好係可以「沖淡一吓」嘅新嘗試。

熱唇裏 為著我咬花

舞著腰 為令我火化

動人處 汗如因我下

誰要這一刻告別Barcelona

份詞其實係講爭女嘅，雖然一首講外地一首講本地，但係同後來太極嘅《Crystal》異曲同功；不過，呢首歌啲詞就真係有啲牽強：「舞著腰 為令我火化」，好哥連臣角feel……

Fundamental呢隊樂隊亦都喺1990年解散。如今亦然活躍喺樂壇嘅，得返陳光榮一個。

《昨夜的渡輪上》 — 李炳文

莫講話你哋一頭煙，連我都唔係好知李炳文係邊位。

但係《昨夜的渡輪上》呢首歌，嗰個年代嘅𡃁仔，應該冇乜邊個唔識唱。差佬𢭃嗰陣問你識唔識，如果你答唔識，基本上可以即時遣返大陸。

夜渡欄河再倚 北風我迎頭再遇

動盪如這海 城在兩岸凝神對視

霓虹伴著舞姿 當酒醉如同不知

日後望這方 醉中一切無從抓住

渡輪上 懷念你說生如戰士

披戰衣 滿載清醒再次開始

莫問豪情似痴 今天醉倒狂笑易

夜盡露曙光 甦醒何妨從頭開始

純民歌嘅風格、編曲、配樂同埋歌詞；有時候，啲嘢簡簡單單就已經可以吸引到人嘅注意。

後來，劉華翻唱過一個比較man嘅版本；至於邊個版本好啲，就真係見人見智喇。

《也許不易》 — 李健達

就咁講《也許不易》呢個歌名，大家可能都仲要諗一諗；但係如果我講《阿郎的故事》嘅片尾曲、如果你係七十後或以上都唔識的話，又係要即時遣返嘅。

阿郎喺澳門格蘭披治電單車賽最後一圈嘅賽事裏面，喺出水塘彎嗰陣炒咗，佢負傷強行重新開車比賽，最後嬴埋；但係衝線後連人帶車炒埋防撞欄著火。老婆同仔就算衝出去跑道想去營救，都只能夠睇住阿郎喺爆炸中喪生。

呢段戲，試問當日令到幾許「男子漢大丈夫」喺戲院喊到劏豬咁出返嚟。

《也許不易》呢首歌就係最後呢段戲嘅配樂。就算唔講戲，首歌嘅歌詞都夠晒sad：

從遠處聽見歎息的詩 在呼喚著舊日名字

從遠處看見某個影子 在掛念著落日情義

揮不去抑鬱別離亂緒 力掩飾當中傷心的故事

思憶中彷彿早已失去 昨天的愛孤單一生又再開始

塵世裏至愛沒法相依 就算活著亦無意義

人遠去破碎是她的心 靜悄地在滴著情淚

驅不散空虛是誰後悔 但急風早吹乾她的眼淚

心飛絮今天雖再相見 但往日情隨著落日已消失去

哭泣灑淚 洗不去當天忘情的罪

擁抱著兒子 又再想起悲痛心事

空虛失落 傾出我一生情和義

撕破的前事 也許修補恐怕不易

慢歌快詞，典型嘅80s作品（譚詠麟最多「慢歌快詞」呢家嘢）。套戲同首歌，就算到現在，都間中仲有人會提吓；但係李健達，能夠搵到佢嘅近況嘅clippings，就只有「影音使團」。

喺香港，想靠一曲成名，真係也許不易。

《留給最愛的說話》 — 張麗瑾、鄭丹瑞（獨白）

上一篇文，介紹過蔡立兒嘅《絕戀》。今次呢首《留給最愛的說話》，亦都係同類嘅歌曲 — 都唔知幾多女，當年聽完呢首歌之後，恨不得自己條仔即刻撞車死，等自己有得慘豬一吓。

喺八九十年代拍拖，你死幾次都未到Y2K。《鐵達尼號》急凍你咪算仁慈囉！

呢首歌比 《絕戀》更「毒」，因為填詞嘅小美仲慌死你哋get唔到，再加多段獨白落去，等大家一次過喊過夠。

（終於我鼓起咗最大嘅勇氣 約你出嚟

因為 我想面對住你 講出我心裏面想講咗好耐嘅說話

可惜 嗰個落雨嘅晚上 嗰條濕滑嘅公路

嗰個粗心大意嘅司機 令我唔可以趕到嚟呢間咖啡室

親口對你講一句「我愛你」）

垂著無言倦眼心 只想你可能仍再返

（你攰喇 瞓啦 唔好再想住我）

想你從無改變 再渡這一晚

（我永遠永遠都唔會再返嚟 妳一定要嘗試習慣 渡過每一個孤獨嘅夜晚）

不懂如何習慣 驅走心裏苦雖然短暫

當你（我）長離此間便告別浪漫

歌詞獨白缺一不可，要兩者加埋先有催淚嘅功效。後來，張柏芝翻唱過呢首歌。至於邊個版本好聽啲，都係嗰句：信你自己對耳。

張麗瑾嚴格嚟講唔算歌星，佢係DJ出身。呢首歌之後，都比較少聽到有關佢嘅嘢。我知道嘅係，佢喺九十年代尾，曾經以mature student嘅身份，入讀港大嘅日本研究學系 —我知道， 因為佢係我ex嘅同學。

《絕》 — 高雪嵐（傅珮嘉）

咁多首「紅歌唔紅人」嘅作品當中，《絕》算係比較新嘅（但都有廿年喇）。點解我冇乜點提近年嘅作品？因為近年嘅作品，係「歌同人都唔紅」，屬於另外一個題目，所以今日唔講住。

呢首歌有幾絕？就係絕到我同N個朋友去唱K都一定唱、但係好多friend子連邊個歌手唱都唔知。

「阿邊個邊個，幫我插首《絕》吖！」

「《絕》邊個唱㗎？」

「高乜鬼嘢呀嗰個……你查歌名咪得囉！一字歌好易搵啫！」

就係咁，高雪嵐又好，傅珮嘉都好，統稱「嗰個邊個囉」。

還不夠絕望

尚可更絕望

留給我日後用來形容前面境況

能夠這樣

謝謝你幫忙

將僅有願望都風光殮葬

尚可更絕望嘅係，傅珮嘉咁多年來，其實都寫過唔少歌，點都叫做有啲才華。但係講咗廿年，講嚟講去，啲人識嘅，都係得《絕》。

《天若有情》 — 袁鳳瑛

我係講緊首歌，唔係講緊套戲。但其實有分別咩？《天若有情》套戲同首歌，基本上都混然一體咁滯。

喺八九十年代長大嘅𡃁仔，有邊個未扮過「華弟」㗎？據聞Frau Winnie當年嘅男朋友都係好此道之人。留意返：我冇扮過，我有深度好多，一嚟就Kurt Cobain。所以我係老公，佢係ex；呢啲叫做「型在起跑線」，冇得恨。

只求望一望

讓愛火永遠的高燒

青春請你歸來

再伴我一會

呢幾句歌詞，再加埋劉華嗰身牛仔褸牛仔褲嘅古惑仔做型，係當年「出嚟襯」必備嘅裝束；當年差佬𢭃身份證真係慳返好多時間：見到呢個款，搨咗入臭格先慢慢𢭃都唔會錯得去邊。

講返袁鳳瑛，其實佢又係一個典型嘅樂壇犧牲品。唱功、聲線都唔差，但係唔夠靚女。唔知從幾時開始，唱唔唱得要睇樣嘅，唱得冇樣一樣冇得撈。其實，我哋嘅膚淺，係跨世代嘅事情；所以，唔好淨係話「而家啲𡃁仔𡃁妹冇深度兼冇taste」，我哋當年都唔好得好多。

呢首《天若有情》，其實有兩個版本嘅，兩個都係袁鳳瑛唱。一個連埋Beyond《灰色軌跡》、《未曾後悔》等等嘅歌、收錄喺《天若有情》嘅OST；另一個係後來再翻錄嘅版本，配樂加入咗中樂，編曲亦有所不同。我自己就比較鍾意OST嗰個版本。

要講「紅歌唔紅人」，我冇可能唔提老母 — 我意思係，我唔可能唔講，韓國朴完奎嘅《 천년의 사랑 》（千年之愛）。

其實我唔係冇講過，連文都寫埋(有埋link㗎喇，邊敢勞煩各位大爺去我個front page度搵），不過啲claps仲絕過傅珮嘉嘅《絕》，好似連二百都冇。講到尾，呢個世界都係要人云亦云先搵到食，懶另類寫啲人哋唔多識嘅嘢，「爬逆水扮清高，收場就係揸兜。」

簡單講兩句：韓國歌手朴完奎喺1999年推出新歌《千年之愛》。呢首歌史無前例咁受歡迎，電台、電視台、卡拉OK、酒吧、以至任何公眾場所都日播夜播。大眾對呢首個嘅喜愛程度，日後嘅所有K-pop都超越唔到。

然而，朴完奎冇因為呢首歌而走紅，因為無論日後佢出咩碟、去邊度演唱，大家所記得、或者要求佢唱嘅，都係《千年之愛》。呢首歌之後曾經幾度被其他歌手改編翻唱，就連台灣嘅「信樂團」都改咗個爛版本；但係朴完奎亦冇因為咁而獲得任何利益。

原因係，當年佢唱呢首歌嗰陣，由於係初出道，所以同唱片公司簽下非常苛刻嘅合約，唱片公司據聞只係俾過十萬圜佢（約申港幣七百），而歌曲嘅版權就歸唱片公司所有，版稅方面朴完奎亦不獲分毫。

佢後來喺一個訪問中甚至慨嘆過，《千年之愛》嘅走紅，幾乎害佢一世。