性格決定命運

徘徊你性情缺憾 命運怎改造基因

是咁的，我有一種好奇怪嘅性格，既喜歡開始一事件情，同時亦害怕開始一件事情。

事情者，可以係認識一個人、開始一段新戀情、返一份新工、幫襯一間新嘅餐廳、去一個未去過嘅地方旅行；諸如此類，不一而足。總而言之，就係接觸/開展一件新嘅人/事/物。

喜歡嘅原因好簡單：人係貪新鮮嘅動物，我都一樣。新衫、新玩具、新電腦、新手機、新工（加咗人工）、新女（呢範我唔好㗎老婆）、新屋、新車。講真，有邊個唔鍾意新嘢？

但同時地，我又真係好驚，去開始一件新嘅事情。「萬事起頭難」係我最怕嘅感覺，沒有之一。當然，我唔係講緊喺床上面嗰種「起頭」啦。

我有時覺得，我害怕「開始一件新事情」嘅感覺，可能都係恐懼症嘅一種，跟咗我好多年嘅恐懼症。可能源自我從高中畢業開始、就「居無定所」有關。留意返，係引號括住嘅，即係唔係一般「踎街」嗰種居無定所。

打從高中畢業開始，直到我嚟德國之後嘅頭兩年，我平均每兩三年就會搬一次屋，有時會更密（有一段時間幾個月一次）。最初覺得好好玩，因為你會對一個新嘅地方、一個新嘅空間感到興趣，你會花好多心思，去諗吓點樣佈置一個舒適合意嘅新居。

電視的光暗 照著我 多麼分心

當你搬多兩三次之後，你就會開始對新居、新地方呢類嘅嘢失去憧憬。你開始會覺得：搬來般去咪又係咁樣！漸漸地，你會開始討厭搬屋。因為，搬屋對你嚟講，除咗成個執嘢pack嘢搬嘢拆嘢過程無限輪迴之外，根本冇任何其他意義。對我嚟講，「去一個新地方重新開始」仲難聽過粗口。

返新工又係咁。最初返工，之前一晚已經興奮到瞓唔著（係呀我係咁戇鳩㗎），揀好晒最靚嘅「戰衣」，襯好晒恤衫領呔靚brogue；然後第二朝滿心歡喜咁，準時九點正踏入新公司嘅大門口。你好期待，你份新工究竟係點嘅呢？你老細究竟係點嘅呢？你上司究竟係點嘅呢？你有冇靚女同事呢？靚女同事溝唔溝得嘅呢？

一隻初出茅廬嘅豬，對屠房同屠夫都會充滿期待；呢點其實唔係咁難明。

到你轉得兩三次工，你返一份新工嘅首日，最想知道嘅，就係廁所方唔方便打貓煲煙、茶水間啲零食可唔可以唔夾錢隨便食、食晏邊間茶餐廳冇咁迫人、準時收工老細會唔會西面、糧期準唔準、同埋喺你個位睇141會唔會有人經過會𥄫到。當然，你唔知道嘅係，IT同事已經mark低晒你睇過嘅囡囡嘅地址，準備放工嗰陣早你一步截你糊去㩒鐘仔。

總之，返新工對我嚟講，除咗一切又重新開始之外，冇任何特別意義。

女人就更加啦。我一直都認為，重新開始一段新嘅感情、重新適應一個新嘅女朋友，簡直係cruel and unusual punishment。又重頭開始打過啞謎、估吓對方鍾意啲乜唔鍾意啲乜、究竟我隻手仲要放喺櫈背幾耐先可以搭落佢膊頭、我究竟扮掃佢背脊幾耐先可以解開個bra扣；呢啲真係慘過酷熱天氣警告走去耕田。還好，結咗婚咁多年，呢家嘢唔會再有我份。

你小心 密雲下擁吻 水點衝擊破壞緣份

鳩噏咗咁耐，其實我想講嘅係：《漢城》仲有兩個星期四篇稿就乜前記後記史記都完晒。寫咗九個月，我好唔捨得呢個故事完結。畢竟，呢個係真人真事嘅故仔，投入嘅感情，同其他嘅長短文章都不可同日而語。

好不容易咁拎咗個故事出嚟、打掃乾淨俾大家睇，然後睇完就放返落去個心入面，繼續封塵；直到我歸老帶入棺材。

其實當故事過咗四十集嗰陣，我已經開始有呢種感覺；不過，當真係要完結嘅時候，嗰種不捨嘅感覺，就唔係三言兩語可以解釋得到。

以前做週刊記者，最開心嘅係星期二，因為乜稿都截晒，連書都出埋，我可以放心去PC同行家公關chit chat。最唔開心就係星期三，因為開完「鋤書會」之後，就要交下星期嘅故仔題目、一切又推倒重來；木馬也要去繼續轉圈。

其實過去九個月嘅情況都冇乜兩樣。每個星期，我有兩篇《漢城》要出，然後就係週末嘅一隻隨筆。《漢城》對我嚟講唔係問題，因為有晒大綱有晒方向，我完全知道要點寫要點編。所以全盛期嗰陣，我個draft裏面，閒閒哋有十幾廿隻《漢城》係度排緊隊等見光。我要煩嘅，都只不過係週末隻散稿。

雖然諗隨筆嘅題目對我嚟講，都係件頭痛嘅事。我係嗰啲寫文要check好多reference、盡我所能確保文章資料正確嘅人。寫一篇隨筆，除非真係好「隨」嗰隻，否則的話，連埋google大半日冇走雞。之前嗰堆韓劇韓星文，每一篇嘅製作，其實都好認真。

但係九月開始，一切又推倒重來。隨筆仍然係隨筆，新故事我唔係冇idea，只不過一諗起又要由個excel表開始，總係有一種揮之不去嘅厭倦同埋無奈感覺。有時候不禁「諗埋一邊」：點解當初唔將《漢城》寫成二百集呢？

咁當然唔可能啦，我寫二百集的話，你哋走晒啦，係咪？

對於我呢個小說新手嚟講，要完結一個故事嘅感覺，其實都幾難受。

在耳邊總響起 遺忘吧 別愁城坐困

P. S. 其實我唔知我呢個性格，決定咗我乜嘢嘅命運。只不過突然間諗起呢四個字同埋嗰句歌詞，就攞咗嚟做題；做吓標題黨係咪唔得先？

P. P. S. 我呢啲咁怕接觸新事物嘅性格，命運咪就係一世冇發達囉！又唔係完全標題黨喎。