俄羅斯朋友

某晚上，一如過去大半年一樣，伏在案前寫作。我有個唔知係好定壞嘅習慣，就係寫寫停停，唔會太專心。今晚，我上咗Facebook，尋找一下喺韓國認識、但冇再add返friend嘅朋友。

我唔係一個太喜歡喺Facebook add friend嘅人，因為我好怕俾人unfriend嘅感覺。喺我嘅字典裏面，如果你喺Facebook unfriend我，即係等於喺現實生活中unfriend我。為避免呢種不快，所以我甚少add人（甚少，唔係冇）。

言歸正傳。呢種大海撈針嘅尋人方法，成功率極低；其實我當年喺韓國認識嘅朋友，好多都唔鍾意玩Facebook；韓國人有自己嘅social media。但偏偏，我搵返一個當年喺韓國認識嘅俄羅斯朋友。

呢個朋友叫Igor；有睇《漢城》嘅朋友，可能會對佢有啲印象。佢係來自伯力（Khabarovsk）嘅俄羅斯人，係我嘅英語會話學生李先生嘅下屬，當日有份喺長漢坪一役隊冧我，結果要Chloe接我返屋企。

我哋嘅友情亦係咁樣開始。Igor住同工作都係喺長漢坪，呢個地方除咗係個比較老舊嘅舊區之外，其實仲係一個美食天堂；喺橫街窄巷之中，滿佈各式各樣嘅「食事」。每次當我同Chloe大塊朵頤之後，都會喺某間士多門口撞見Igor。最初真係撞見，後來就有意走去搵佢飲酒傾偈。

喺無事嘅日子，我同Chloe一星期總有一兩晚，晚飯後去長漢坪搵Igor；三個人就坐喺士多門口、揸住樽啤酒吹水。

我呢個朋友，係個爛酒鬼。幾乎每個晚上，佢都係同酒一齊渡過。有朋友宴客，固然飲個酩酊大醉；就算冇人請客，佢都可以一個人喺士多辦館門口，自斟自飲到三更。

有錢喺身嘅時候，Igor會喺東大門近乙支路6街一帶嘅小俄羅斯區，收購俄羅斯大媽偷運入境嘅貴價伏特加；一買就五六支，然後醉個好幾日。「莫財」嘅時候，佢就連韓國燒酒、甚至廉價啤酒都照殺；總之，無酒不歡。

識講流利韓文嘅佢做過好多工作，諗得到嘅佢都做過。共通點係：冇一份長工，就算喺李先生間廣告公司份工，都係冇底薪、有客就分佣嗰隻；佢唔鍾意俾人綁住喺office坐八粒鐘。佢每份工作都係賺夠就收工，從來唔會為明天而擔憂。

佢識美術、懂音樂、同埋多國語言（英、日、韓、俄、法）；呢啲長處都係佢「唔憂做」嘅板斧。有時候，佢無聊起上嚟，會帶埋支ukulele嚟我屋企；三個人鋼琴結他ukulele，我哋就咁飲酒jam歌，都可以開開心心一晚。

由於佢係一個好有幽默感嘅人、見識廣博、能言善道，所以我同佢當年都算深交。後來，我離開韓國；從此，我同呢個朋友分道揚鑣。

偶然再「碰見」（只係佢個Facebook），八卦嘅我當然唔會放過呢個機會，喺人哋個Facebook度八卦一番。

我睇過佢啲相，闊別十八年，佢基本上冇變。我見到佢做過二手車同改車生意、拍韓片韓劇做「茄呢啡」擔當外國人嘅角色、帶俄羅斯旅客去購物、帶俄羅斯圍棋代表團去南韓參賽、去中國採購等等等等。

一如以往嘅，就係冇一份長工，同埋好開心；起碼相中人嘅笑容，話俾我聽佢（哋）好開心。

這十年來做過的事

能令你無悔 驕傲嗎

那時候你所相信的事

沒有被動搖吧

當年，我離開韓國之後，同大部份遭受感情挫折嘅人一樣，我同自己講：我要寄情於工作，我要創一番事業！

十年來去匆匆。喺我離開香港之前，又好似真係乜都有啲；有事業、有愛情、有家庭。

但係我唔敢肯定，我離港之前嗰十年，一定過得比Igor開心。

大家唔好誤會，我唔係嗰啲，一味強調「心中富有」嘅正能樣；我覺得呢句嘢，就算唔係、都接近虛偽之最。咁多年嚟，同我講做人最緊要「心中富有」、「錢財身外物」嘅人，冇任何一個係窮人；有幾個仲係年薪過百萬嘅高管人士。

我覺得「心中富有」嘅大前題，係你首先要三餐無憂兼有瓦遮頭。唔信嘅，你試吓去修頓球場或者麥花臣球場，同啲搵紙皮當被嘅露宿者，講吓「心中富有」、「冇錢冇所謂」；你睇吓佢打唔打柒你？！

三餐不繼，無論你點樂觀點淡薄都好，都只能叫「苦中作樂」；唔係「心中富有」。

就算Igor，兩年幾嘅日子，我就從未見過佢真係赤貧：真係冇嘢撈的話，佢會去梨泰院嘅俄羅斯disco度捽碟，甚至做侍應，好好醜醜都有收入。

我嘅問題係，我呢十年間嘅拼搏、努力、犧牲，所換返嚟嘅「成就」，究竟有冇我想像中咁、令我真係開心？

究竟我嘅所謂「成就」，係唔係我嘅初衷？

抑或係跌咗個橙、夾硬執返個桔、然後說服自己「呢啲就係我嘅追求」；對住用磚頭鋼筋水泥堆砌出嚟嘅幾百呎空間、然後自我感覺良好、覺得自己係「人生勝利組」？

我開始唔係好識點樣去衡量得與失。

銀或金 都不緊要

誰造機芯 一樣了

計劃了 照做了 得到了 時間卻太少

還剩低 幾多心跳

還在數 趕不及了

昂貴是這刻 我覺悟了

坦白講，Wyman填《陀飛輪》填得太說教；其實真係冇乜嘢好「覺悟」。Come on James！唔好傻啦，無論我當時嘅選擇如何，我都仍然要返到去最基本嘅問題 — 生存。為咗生存，好多唔係「理想」嘅嘢都要去做。我唔覺得，嗰十年嘅努力係一場白費；「生存」呢兩個字，本身就係一張獎狀。

只不過，喺「生存」同「理想」之間，其實係咪有一啲比較兩可嘅做法呢？