천년의 사랑 《千年之愛》 — 紅足廿年的狗血K-pop經典

大家唔好誤會，我唔係想踩呢首歌。相反，呢首歌係我聽咁多年K-pop最鍾意嘅一首，沒有之一。正如明哥之前所講，商業味同唔好係兩回事。灑狗血同唔好都係兩回事。《천년의 사랑》 （千年之愛）就係一個灑狗血灑得非常成功，甚至成功過頭嘅故事。

大家先聽一聽歌：

好耳熟，係咪？冇錯，N年前信樂團唱過中文版，叫《死了都要愛》；我就叫佢做《死了都要從棺材彈起來》。改篇歌我聽得多，改得咁衰，由篇曲到填詞都咁爛，就真係比較少見。襯埋信哥幾年後拍《金2》廣告嗰句「段正淳，納命來」撈埋一齊嚟做瀨尿牛丸就真係冇撚得頂。

咁究竟《천년의 사랑》 當年喺韓國有幾紅呢？或者咁講，喺1999年，如果你喺南韓逗留多過一星期，都未喺任何場合聽過《천년의 사랑》 或者劉承俊嘅《Passion》（即係Juno嘅《愛上殺手》）的話，咁好大機會你係去錯國家，嗰度應該唔係南韓，你check吓有冇行咗過三八線嘅另一邊。

當年喺漢城，無論係交通公具、商場、食肆、百貨公司，都播緊呢兩隻歌。喺網吧，個個都聽緊呢兩隻歌：玩緊捽碟game嘅就係捽緊《Passion》，抹緊眼淚嘅就係聽緊《천년의 사랑》 。

《천년의 사랑》 同《Passion》喺1999年嘅南韓，就等於《你沒有好結果》或者《好心分手》。你知唔知十年前喺香港，你話未聽過呢兩首歌，係連過堂都慳返，直接遞解出境㗎？

呢首歌hit到，作為一個外國人，我竟然可以將成份詞背默返出嚟 — 當你屋企有個人一日炸二三十次（仲要含住兩泡眼淚咁聽），兩三個月要識背其實唔難；我啲韓文聽寫就係咁練返嚟嘅。

《천년의 사랑》 紅到一個點，個歌手朴完奎喺唱完呢首歌之後，好長一段時間做乜其他嘢都唔紅，個個淨係記得呢首歌。最慘嘅就係，因為呢隻碟係佢嘅第一隻專輯，喺唱片公司惡晒嘅不平等條約之下，朴完奎幾乎冇任何額外經濟收益；歌有歌紅、佢有佢捱窮。喺後期嘅一個訪問中，佢都承認，《천년의 사랑》 幫佢嘅同時，亦都害咗佢。

點解首歌咁紅呢？或者大家睇吓份詞先：

이대로 널 보낼 수는 없다고 （我不能就這樣讓你離開）

밤을 세워 간절히 기도했지만 （我徹夜祈禱，但是）

더 이상 널 사랑할 수 없다면 （如果我不能再愛你）

차라리 나도 데려가 （你最好把我一起帶走）

내 마지막 소원을 （如果我的最後心願）

하늘이 끝내 모른 척 저버린대도 （上天最後都沒如願）

불꽃처럼 꺼지지 않는 사랑으로 （我的愛就像永不熄滅的火）

영원히 넌 가슴속에 타오를 테니 （你永遠會燃亮著我的心）

나를 위해서 눈물도 참아야했던 （為了我，你一直與眼淚共存）

그 동안에 넌 얼마나 힘이 들었니 （一直以來究竟你有多難受？）

천년이 가도 （就算再過一千年）

난 너를 잊을 수 없어 （我不能忘記你）

사랑했기 때문에 （因為我愛你）

好簡單嘅詞，但係一杆到底，一把痴心情長劍插入聽眾嘅心。

狗血K-pop有一個預設條件，就係歌裏面嘅男女主角，是但一個死咗；就算唔死都重創。而且唔一定係被唱嗰個死，唱緊嗰個都可以死，死咗喺天堂唱俾未死嗰個聽。

好似《바보에게 바보가》 （蠢蛋給蠢蛋）咁，唔死之餘仲要大團圓，其實好少有。

有呢個預設條件之後，你就會明份詞講乜。

《천년의 사랑》 喺過去近廿年間，被翻唱過N次，睇睇上面張iTunes嘅cap圖，你就知道有幾熱鬧。云云翻唱當中，最好聽嘅，個人認為係李成旭喺2012年嘅版本。除咗從新做過嘅音樂多咗時代感之外，李成旭版本嘅特點，就係慌你唔死，驚你仲未識喊，所以加多段女聲featuring：

슬퍼하지 마요 아파하지 말아요 （不要傷心，不要受傷）

당신의 마음안고 떠날게요 （我會留低你的心）

이세상의 단 한사람 （世上唯一的一個）

이젠 다신 볼 수 없어도 기억 할게요 （我再也見不到你了）

效果就似當年張麗瑾嘅《留給最愛的說話》中，阿旦嘅獨白；用一個死人嘅角度，對在世嘅情人留低最後「遺言」。

大家可以聽聽李成旭版，睇吓喊唔喊得出（應該喊唔出，除非你識韓文）：

同樣係2012年，李英賢喺《我是歌手》中，亦都翻唱咗另外一個版本；加入咗管弦樂，有種蕩氣迴腸嘅感覺。

李英賢《我是歌手》版：