IF
IF

此 Matters 帳戶已停用,請勿加入。如有興趣閱讀我的文章,請前往: https://www.patreon.com/herrfung Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。

LikeCoin包膠

創作有價?咩價先?!

自從去年六一二以嚟,因為香港嘅時代革命,因為幾乎每個週末都喺黑警恐襲嘅新聞中惶恐度過,所以一直寫開嘅專題文章都因此而暫停。雖然,九個月後嘅今日,無論香港定全球嘅情況比九個月前都更加惡劣,但生活唔可能無限期停止。

於是,我趁呢段封城踎武漢肺炎監嘅日子,重新開始不定期咁寫返啲專題嘢,等大家喺屋企吽菇嘅日子,都有啲嘢睇吓解吓悶。

以前應承咗有拖冇欠嘅文債,而家開始要找數喇。首先嘅,就係用咗LikeCoin九個月嘅心得。

好耐冇寫呢啲嘢,戴返個頭盔先:以下嘅文字,係純粹我個人嘅使用心得分享,如果你有唔同嘅睇法或者經歷,歡迎寫文分享,但唔好喺度駁嘴駁舌;ok?

又:呢篇嘢毫無斗零技術成份,要搵啲寫得頭頭是道、開口區塊鏈、埋口演算法嘅吹水文,可以自己去搵,大把「LikeCoin自乾五」(自備乾糧嘅五毛;港譯:真心膠。LikeCoin自乾五唔一定係大陸人。)寫定海量吹水文,所以請自便;唔該晒。


First thing first:

由去年六月開始、直到今年三月《中環遊戲》連載嘅結束,非常感謝LikeCoin Foundation嘅 @黃牛山人 有關LikeCoin嘅技術上協助。呢段時間唔係Edmond的話,我可能要兜好大個圈、花多好多時間去摸索LikeCoin嘅周邊運作。如果冇Edmond嘅熱心幫助,可能我未必會用LikeCoin作為主要寫作收入九個月。

事實上,作為一個冇乜cryptocurrency知識嘅普通作者(我有IT底,但唔代表我識cryptocurrency),要一條龍咁樣trade LikeCoin,基本上喺唔可能 — cryptocurrency嘅運作同技術知識係其一,匯市運作、財經新聞同圖表基本分析係其二;缺一不可(如果你唔介意每次交易都蝕錢的話就毋須任何知識,合埋眼㩒sell all就得)。

有關點樣「化讚為賞」嘅嘢,我諗大家都聽咗好多,而且LikeCoin Foundation又唔係我個客,所以唔幫佢哋再宣傳喇。咁不如等我講吓,點樣technically化讚為錢。

貨幣交易

由於有啲私人贊助(即係唔涉及業配文同廣告,基本上同讀者冇任何關係)嘅朋友用LikeCoin嚟俾錢我,所以我每個月都有大約五百歐左右等值嘅LikeCoin要兌換。與絕大部分嘅LikeCoin用家唔同,由於我身在德國、亦冇任何亞洲銀行戶口;所以,要trade LikeCoin的話,就俾你哋任何一個都更麻煩、要更多手續。

Cryptocurrency話就話係「貨幣」嘅一種,但交易本質上比較似股票 — 貨幣無論係交易好、兌換好,就算幾小眾嘅貨幣,銀行基本上都會照殺 — 冇人會唔要錢,爭在俾個咩匯率你同幾多手續費;作為一個參與外幣炒賣卅年嘅人,呢一點我非常清楚。但cryptocurrency嘅運作就比較似股票,你只可以喺特定有「掛牌」嘅交易所買賣,情況就好似你唔可以去紐交所買賣長實匯豐一樣。

而喺地球上LikeCoin有掛牌、而又接受非本地(港、台)居民玩嘅交易所,喺去年十二月前就有兩間 — 日本嘅Quoine Liquid(下稱Liquid),同台灣嘅BitAsset,而家就只剩一間BitAsset;香港嘅交易所非常門口狗,只限有香港銀行戶口嘅客戶開倉。

Liquid係一間幾大同幾國際化嘅交易所,佢哋甚至有SEPA(Single Euro Payments Area)嘅戶口、方便EU嘅客戶。喺佢哋嘅倉「勾金」(或曰out金;炒外匯術語,即係提款),最快可以即日到我嘅德國銀行戶口,都算幾方便。相反,BitAsset就有條好戇鳩嘅規矩,要有一千美元先可以勾金;所以,BitAsset先天經已輸咗。

外匯買賣,對好多香港人嚟講都非常熟悉;特別係有子女喺外國留學的話,好多時都會趁低吸納一啲外幣,方便子女交學費同生活費。雖然港幣對任何美元以外嘅貨幣都屬於「交叉盤」(Cross-rate),但由於香港嘅金融體系龐大,就算係交叉盤,成交亦都非常活躍。但兌換/投資/炒賣cryptocurrency、特別好似LikeCoin呢啲唔太活躍、或者認受性唔高嘅crypto,就完全唔係呢回事。

簡單嚟講,就係如果你諗住以LikeCoin作為主要收入、每個月都要兌換嚟做生活費的話,你最好買定多啲驚風散喺屋企,以防萬一。

首先、亦都係最大鑊嘅,就係上述兩間交易所,都冇LikeCoin直接兌換法幣嘅服務。即係話,你放甩咗啲LikeCoin,你收到嘅並唔係法定貨幣,而係其他虛擬貨幣。LikeCoin可以兌換嘅,就只有比特幣(Bitcoin)同以太幣(Ethereum)呢兩隻波幅奇大嘅crypto。

我明明喺橫頭磡邨某座球場收吓陀地、坤吓啲𡃁仔一個幾毫汽水錢啫,你要我去砵蘭街、去旺角街市收數?!

我試過兌換價值五百歐嘅LikeCoin,轉Bitcoin後突然間一個全無原因嘅day trade浪冚埋嚟,幾秒鐘就唔見五十歐,即係收入嘅10%。

喺Bitcoin同Ethereum入面停留越耐、你嘅風險就越高。情況就好似你打份普通嘅工,但你老細用「泥碼」出糧俾你一樣 — 泥碼唔可以直接cash,你點都要拎佢去賭一煲、贏咗先有糧出、輸咗你可以放心食一個月榖種。一份支撐生活嘅薪金要涉及高風險嘅兌換方式,我覺得係個悲劇。

好似呢一兩星期嗰種冚球剷式嘅crypto洗倉盤,如果你等住啲錢嚟開飯的話,你真係渣都冇得剩。喺呢啲位,總會有啲唔知米貴嘅人會同你講「跌咪唔好賣住囉!等吓先囉!」 — 老實講,呢啲係何不食肉麋嘅風涼話嚟,講嗰個一來冇切膚之痛、二來未必真係等住啲錢開飯。

但唔好忘記,你係個靠LikeCoin化賺為錢嘅窮作家,你冇呢啲奢侈去等。就算你餓得起,你嘅業主都會鎖你鐵閘。所以,唔好用「投資」嘅眼光同理論去看待別人嘅基本收入,你咁做其實係鼓勵緊人地去投井。(CC: @高重建 、 @黃牛山人 ;呢幾句嘢應該係LikeCoin Foundation未來發展嘅主要方向。)

正所謂「貨幣價格可升可跌」,九個月以嚟,我蝕過亦都賺過(肯定蝕多過賺);對於唔係等住啲LikeCoin開飯嘅我嚟講,呢個位真係冇乜好怨。但就算LikeCoin兌Bitcoin/Ethereum難你唔到,LikeCoin靜靜似是湖水嘅成交量,就一定難到你。一個炒賣嘅高手,能夠喺任何嘅市況都有利可圖;但一個冇成交嘅市況,就神仙同索羅斯都難變 — 冇人刮你平唔到倉你賺條毛呀?

我試過,喺BitAsset放大約廿萬LikeCoin(當時都係等值五百歐左右),結果要分五日蝕讓。就算大幣所Liquid,都要分兩日。呢點亦都係cryptocurrency交易比較似股票交易嘅實例。如果真係外匯貨幣交易,就算當年英鎊俾索羅斯狙擊、脫離歐洲貨幣匯率機制呢啲大上大落市,你掟貨都唔會冇人接 — 因為錢唔會冇人要。

(OT:千其唔好用market price呢個function一次過放晒你手頭上嘅LikeCoin,保證蝕到入肉見晒血。)

交頭淡靜固然係個死結,但亦屬非戰之罪 — 當LikeCoin開始popular之後(唔好問我幾時),交頭就自然會多,所以呢個唔係任何人控制範圍之內嘅事。但下面講嘅呢樣嘢,就絕對係人禍:

幣所/兌換公司嘅黑箱作業、LikeCoin喺交易時嘅「擘價」(買賣差價)同交易費用太高、同搶劫無異。

(按:無論Liquid定BitAsset,交易費用其實明碼實價,好似Liquid呢啲有自己虛擬幣嘅大幣所,如果用佢嘅QASH交易的話,仲有半價。所以狹義嘅「交易費用」並唔係問題所在,開價、擘價、甚至「晾價」呢啲黑箱作業嘅操作先至係真正問題所在。)

喺去年嘅十二月,LikeCoin由原本依附Ethereum blockchain嘅ERC20、變成有自己獨立blockchain嘅crypto。咁做有乜嘢好處呢?如果你去問阿高總的話,佢可以頭頭是道咁同你講足七七四十九日,尾七過埋都未講完。但喺我呢個純用家嘅角度出發,LikeCoin轉blockchain,即係我以後唔可以喺Liquid做trade……(P.S. 我冇fact check而家用得返未。)

呢個對於我嚟講,係deal breaker;因為喺BitAsset度trade,一來我要等夠一千鎂先可以勾金,即係將幾千港幣擺喺一間非銀行物體成個月,我對佢哋仲未有呢份信心。二來BitAsset個價真係好差,同Liquid或者CoinGecko嘅參考價差好遠。三來亦都係最老撚土嘅,就係佢哋掛牌嘅「成交價」,同佢哋自己嘅「買入/賣出價」,都有好一段距離。

點嘅距離呢?我試過用交易價作準嚟收一批(都係五百歐,呢個價係我條線)LikeCoin,然後喺BitAsset用佢嘅買入價放,結果即場蝕140歐!喺個市冇任何郁動同成交下,我要蝕140歐離場!

咁都未算離譜,由於Liquid再trade唔到LikeCoin,於是第一個月我托有香港銀行account嘅朋友幫我喺香港某兌換公司放LikeCoin,結果同牌價比即蝕180歐!500歐嘅LikeCoin兌換港幣,擘價連交易費用180歐!我DKLM呢啲好撚過去搶吖!葉繼歡張子強季炳雄笨撚柒咗啦!使乜揸鎗搵命搏喎,開幣所或者兌換公司咪好囉,攞正牌坐喺冷氣房打劫!

如果揸筆搵食係個低收入行業的話,幣所同兌換公司呢啲絕對係喺乞兒兜度𢲡飯食!我只係希望,呢班仆街喺武漢肺炎嘅恐慌性拋售中,個個好似《大時代》咁跳樓都唔掂。

幣值

大約一個月前,我喺FB見到Edmond叫LikeCoin用戶們寫一啲有關LikeCoin嘅關鍵詞,然後佢將嗰舊關鍵詞雲貼出嚟。呢啲咁嘅活動,當然有海量LikeCoin自乾五參與 — 唔怕得罪講句,呢班人寫有關LikeCoin嘅文章嗰種單邊思想同膠質,經已去到令我作嘔嘅地步。

Anyway,詞雲出咗嚟,我一睇:

唔睇由自可,一睇屌一聲;乜撚嘢叫「創作有價」呀?

我㷫嘅原因,係因為我過去半年喺LikeCoin嘅合作伙伴Matters度、貼咗90篇文(Non-fiction)、總字數達廿一萬字。雖然呢90篇文都唔係新嘢,但Matters對我嚟講係個新場,大家未睇過就係新嘢啦!呢90篇文嘅文創,究竟有個咩價呢?

90篇文,總共收得29539個LikeCoin,價值126鎂!每篇文約申美元1.4元正;如果以寫作常用嘅字數嚟計,每隻字價值0.0006鎂!

小數點後四個位,真係好有炒孖展feel囉……

(當然,呢個亦同一眾華文平台、如Matters、方格子等嘅閱讀行為文化有關;不過按下不表,不日我會另文探討呢個問題。)

你班自乾五講撚完創作有價而唔撚面紅嗰吓真係叻!

我哋自從Medium改咗制之後,三不五時都會寫文圍剿呢個平台嘅涼薄,將我哋當condom咁用完即棄blah blah blah(下刪三千字)。Medium更仆街更無良,我上個月寫咗十篇星星文,都有235鎂收入,逐篇計醜醜哋都有廿三鎂一篇。串嘴啲講句:你LikeCoin憑乜同我講創作有價?有咩價呀?賤價呀?

內容變現?呢126鎂要變現,分分鐘仲要俾啲仆街幣所兌換所分咗一截呀!變現進貢幣所呀?!

我勞氣嘅係,呢班人唔好瞌撚埋對眼嚟讚好得唔撚得呀?以目前LikeCoin嘅幣值,你四隻手腳一齊24 x 7咁寫作,都未夠你買廁紙呀創作有價!

我偏激?我以偏蓋全?咁麻煩你答我呢個問題:

LikeCoin Foundation喺去年年底達到1000個讚賞公民(即係付費會員)嘅milestone — 1000人每人付費5鎂,即係每個月5000鎂,再加基金會「貼」出嚟嘅5000鎂等值LikeCoin,即係一萬鎂等值LikeCoin。七萬八港紙,我當嗰一千人得一半會寫文賺LikeCoin(其實一定唔止),七皮八500人分,每人最多港幣156。就算俾你叻豬到賺足十人份,都係一千五百六;咁你係咪想話俾我聽,「創作有價」就係寫到咳血都係得咁多?

唔好誤會,我唔係想踩LikeCoin,呢篇嘢有九成以上內容,並唔係LikeCoin Foundation控制範圍之內可以干預嘅事。事實上,喺一年多前、我開始join LikeCoin嗰陣,我已經講過,cryptocurrency唔可以淨係俾啲礦機農場玩晒,我哋做creative工作嘅,其實都可以有自己嘅blockchain、唔需要俾Medium或者任何平台牽住個鼻走。我寫呢篇嘢嘅尖刻,其實係恨鐵不成鋼。

幸好,LikeCoin嘅發展,雖然路長,但仲有好多時間。我希望有朝一日,佢哋真係可以做到「創作有價」呢個終極目標;不過唔好問我幾時。

Bonus Track:委託驗證人

LikeCoin有個好unique嘅function,叫「委託驗證人」,呢個係另一個可以俾高總講足七七四十九日、實現人類科技民主團結大和諧嘅function。不過,由於本文只講述化讚為錢嘅technical details,所以有關區塊鏈同普世價值嘅嘢,大家可以去FB或者Matters搵Kin Ko慢慢傾(話說佢早幾日已經宣佈放棄Medium,我喺上面tag佢其實係tag風)。

(OT:我可能係地球上最唔願意講政治及有關話題嘅PolSci PhD,希望大家唔好誤會我挖苦緊Kin Ko,我真係冇。)

用一個no gimmick嘅說話嚟講,「委託驗證人」喺banking角度而言,就係一個有息收嘅「T+21」活期儲蓄功能。LikeCoin有十二個「驗證人」(機構),每個都會開出現時大約2% p.a.嘅息口。你只要將你手頭上嘅LikeCoin委託俾佢哋,咁你就可以收取承諾嘅利息。

喺呢個零息嘅世界,有個地方可以俾你收兩厘息,其實真係唔錯。不過,大家有冇留意到我上面寫嘅「T+21」?冇錯,筍嘢背後個catch,就係當你想停止收息、將啲LikeCoin由驗證人手上取回的話,係需時廿一日。

冇錯,係廿一日。可能LikeCoin Foundation發現冠狀病毒可以經blockchain傳播,為大家健康著想,於是LikeCoin回流需要隔離廿一日。(希望大家識笑)

我唔知道喺我哋呢個時代,究竟仲有乜嘢IT嘢需要廿一日去完成程序。我唔知道銀行定期存款到期後要廿一日先至回水、仲有冇人肯幫襯。我亦都相信,高總會有好大條道理去解釋呢樣嘢係絕對有需要咁做。不過對我嚟講,呢廿一日同LikeCoin轉blockchain唔可以繼續喺Liquid trade一樣,係個deal breaker。

因為廿一日,實在太多嘢可能/可以發生。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论