又去完旅行，即係表示，我又會有幾日post-travel depression（唔係真係病嚟嘅，放心）。

大家有冇試過咁？每次去旅行，見到一個好靚、自己覺得好舒服嘅地方，幾日落嚟，你會開始諗：究竟我可唔可以喺呢度定居呢？

對於香港人嚟講，我覺得諗吓一定有。事實上，香港就算唔係好似呢期咁動盪、好人好姐冇事冇幹嘅平靜日子，其實都係個壓力煲。偶爾離開一陣去到一個陌生嘅地方、睇見當地人悠閒兼優雅咁過生活，就算更「短命」嘅人，都自不然會羨慕一下、諗吓「如果我可以住喺呢度就好喇」。

只不過，卅秒後你就會諗到，聽晚就要返香港，返到去篋都未unpack就要開電腦做嘢、因為第二朝一早返工就有六個會要開、其中四份presentation PowerPoint仲未寫完……。移民？仲難聽過粗口：「有時間胡思亂想，不如搵多啲錢好過啦！有錢邊度都係天堂啦！布拉格？連食碗雲吞麵都冇呀！」

我已經唔講，絕大部份嘅香港人，其實冇乜海外謀生能力。你有degree？但係人哋唔識你間U喎。你英文叻？地球上大約有廿億人都係；如果喺歐洲你唔識德法西以是但一種、即係等於啞。你廿年工作經驗？咁你有冇歐洲工作經驗？冇嘅話下世請早（Ok，唔咁悲嘅，不過差唔多啦）。

我哋比較好彩，九年前就作出咗呢個選擇，喺一個自己覺得好靚好舒服、得十幾萬人口嘅小城落腳。只不過，就算settle down咗，我哋間中都仍然會幻想：我哋會唔會搬去XXX再落腳呢？

XXX有三個地方：維也納、布拉格、同Berchtesgaden。最後呢個喺德奧邊境近Salzburg、希特拉「鷹巢」嘅所在地，係我哋諗住退休搬落去嘅地方 — 如果我哋搬埋Anmeldung（登記）落去的話，咁百年之後，我哋嘅墓地亦都會喺嗰區；有乜好得過百年之後、可以長眠喺風光如畫嘅阿爾卑斯山山麓？

如果真係要搵一樣我哋比大家幸運嘅事情的話，我諗我哋嘅德國籍會係最幸運嘅一樣 — 只要我哋喜歡，任何EU國家都可以係落腳定居嘅地方。維也納、布拉格、Berchtesgaden，只要我想就得。呢九年以嚟，我為自己建立嘅「事業」叫freelance。我搵嘅的確唔夠我喺香港搵咁多，但我可以隨時relocation，唔會三餐不繼、又要從頭嚟過。只要我想，我聽日就可以搬去布拉格。Winnie係科技公司嘅高管，要relocation當然要重頭嚟過；但佢已經有幾年solid嘅歐洲經驗，呢啲職位唔會冇人請、亦唔可以俾機器取代。

只不過，呢九年嘅歐洲生活，我學識另一樣嘢 — 好睇唔好食。當日我哋因為靚同舒服搬去Regensburg，咁多年嚟，雖然我哋對呢個小城嘅鍾愛不減，但係亦不無怨言 — 拜仁本身已經保守，Regensburg就更加係保守中嘅保守；我哋花咗好多時間去融入呢個城市，然後先發現佢嘅各種缺點。

畢竟，睇吓行吓玩吓，同住落嚟生活搵食，係兩回事。與其再次relocation去摧毀我對一個地方嘅美好回憶，倒不如保持返少少距離，留返一個每年可以retreat幾次嘅「秘密花園」，咁對我哋同個城市都會更好。

「留下一點距離回味猶自心跳」應該就係咁解。

本週文章：

中環遊戲（44）天下第一武道會

……另一方面，當我知道，Cindy會同我一齊去Vegas之後，唔知點解，我好似對呢件事有啲期望咁……作為一個負責任嘅成年人，我當然會提醒自己「有婦之夫」呢個身份，而我亦都對佢唔會有乜嘢非份之想；但係……總之就有種揮之不去嘅古怪期望……

布拉格

……話時話，第一次用Leica街拍，超唔慣、勁論盡……

飼鳥

……呢度仲有啲巨型天鵝（定係佢哋本身已經咁大隻？），會追住人搲嘢食。不過，有幾隻其實幾污糟；所以，天鵝一定白白淨淨應該都只不過係stereotype……

《中環遊戲》係我第一輯完全放喺Medium收費牆之外嘅小說，供讀者文友免費閱讀。作為一個全職作者，我喺寫作上面嘅收入，就只靠LikeCoin嚟支持。所以，希望各位「讚賞公民」能夠喺上面嘅LikeCoin widget拍滿五拍，等我可以維持收入。未加入成為「讚賞公民」嘅朋友，可以喺呢度加入：https://liker.land/Civic?from=herrfung 。

另外，如果你加入得夠早夠快的話，我仲會私人回返第一個月嘅月費、港幣卅八蚊俾你。只要你喺加入之後，去呢度：https://civicliker.typeform.com/to/YjFjqT 填返啲資料俾「讚賞公民基金會」幫我過數俾你就得。名額有限，先到先得，送完即止。

P.S.: 最近有文友反映，用「IF」呢個名，好難search到我嘅文章。所以，建議大家使用我嘅domain name 「@herrfung」 去search，比較容易搵到我嘅文章。