係，開版相完全圖文不符，我只係想貼佢哋四個嘅相嚟呃吓click；就算呃唔到你哋，呃我自己click入嚟都夠晒盞鬼。

雖然，我仲有好多關於Fin.K.L、特別係李孝利嘅嘢，想同大家分享；但唔係今個星期。我覺得《夜信》係好適合講呢啲篇幅唔太長嘅話題，總好過好似以前咁，開隻專題寫幾千字，然後先發現原來大家冇乜興趣。喺呢封信寫就唔同，短短幾百字，我仲可以afford到大家嘅唔熱衷。

今個星期主要係想介紹吓，我個新地盤。

如果有Matters account嘅文友，歡迎你add返我，我亦會add返你。

大家可以放心（或者且慢開心），我仲未放棄Medium，喺可見嘅將來都唔會放棄呢度。開多個新地盤嘅原因，係想俾多個機會自己explore一吓Medium以外嘅世界，特別係華文嘅世界 — 老實講，不斷嘅技術問題、再加埋呢次改制，我經已厭倦俾Medium牽住走。

喺現階段，我暫時只會將呢邊嘅非小說舊文、每週嘅《隨想》同《夜信》，順時序兼延時搬過去Matters。至於我嘅小說會唔會喺Matters推出，暫時仲未有定案。主要原因係我喺嗰邊仲未能夠開展我嘅network，未有太多follower（得11個，話冇會更貼切）。如果我真係喺嗰邊推小說的話，我希望我會有一定數量嘅follower先。

Matters嘅最大優點，就係佢已經內置咗LikeCoin嘅拍手掣，所以喺Matters拍手俾作者，作者可以直接收到LikeCoin，有助「化讚為賞」呢個最終令文創人士受惠嘅概念。自從Medium改制之後，我覺得LikeCoin嘅重要性比之前更高，因為只有呢套system行得通，作者先唔會再受好似Medium呢啲platform嘅朝令夕改所影響。

（OT：下星期嘅《隨想》會同大家睇吓改制後第一個星期條數。截至呢一刻為止係災難級，嚇撚死人……）

換句說話講，LikeCoin係文創人士奪回主導權、唔再俾platform控制嘅重要一步。只要LikeCoin普及、更多人參與呢個「遊戲」，再加埋Liker.Land，咁無論你係喺Medium、Matters之類嘅platform寫嘢，抑或係自己買domain寫blog，大家都可以喺Liker.Land睇到你嘅最新文章，然後用LikeCoin鼓勵你。咁我相信，文創嘅世界會比而家嗰種「老奉無償」更好。

寫作係賣文賺錢，係「買賣」，唔係爭取「打賞」（所以我拒絕使用以「打賞」二字招徠嘅platform）。我係賣文，唔係俾嘢你睇、然後搏你醒我兩蚊。雖然兩者都係錢，但箇中分別，我相信有必要清楚。

本週文章：

中環遊戲（37）口爽荷包𣲷

……喺2009年，任何最19嘅公關公司，除非唔夠嘢撈，否則都起碼賣緊150%嘅最大輸出公率。因為班老細，從來都唔會理會夠唔夠manpower去做嘢，總之有生意就接，話撚之你死。當年喺Soliloquize，我一個人湊晒公司兩個最大嘅account，仲要俾人捽paperwork，都冇人會可憐吓我……

中環遊戲（38）撐起雨傘

……呢個係我贏咗Daehwa香港呢個大account之後，最大嘅感覺/感慨。雖然，開波之前，上述嘅缺點，其實我知得一清二楚之餘，仲已經領教過晒。「明知山有虎、偏向虎山行」係我喺香港工作多年嘅寫照。冇錯，我犯賤……

隨想（2019/KW44）記你老母毅進仔

……其實，有乜好驚呢？首先，中共真係要以言入罪的話，要拉嘅，排隊都未輪到你哋。大把有鱗有角嘅，真係要拉，淨係招呼呢班泛民大袋、左膠嘴炮之類，香港嘅監倉都未必夠位，可能真係要勞動到大灣區幫拖，先至招呼得晒呢班人，幾時輪到你哋啲魚毛蝦仔……

《中環遊戲》係我第一輯完全放喺Medium收費牆之外嘅小說，供讀者文友免費閱讀。作為一個全職作者，我喺寫作上面嘅收入，就只靠LikeCoin嚟支持。所以，希望各位「讚賞公民」能夠喺上面嘅LikeCoin widget拍滿五拍，等我可以維持收入。未加入成為「讚賞公民」嘅朋友，可以喺呢度加入：https://liker.land/Civic?from=herrfung 。

另外，如果你加入得夠早夠快的話，我仲會私人回返第一個月嘅月費、港幣卅八蚊俾你。只要你喺加入之後，去呢度：https://civicliker.typeform.com/to/YjFjqT 填返啲資料俾「讚賞公民基金會」幫我過數俾你就得。名額有限，先到先得，送完即止。

P.S.: 最近有文友反映，用「IF」呢個名，好難search到我嘅文章。所以，建議大家使用我嘅domain name 「@herrfung」 去search，比較容易搵到我嘅文章。