《Argon》的記者從業道德

香港嘅傳媒從業人士都應該睇嘅一套韓劇

話說《Argon》係一套非常唔似韓劇嘅韓劇。

你班撚樣可唔可以唔好見到「韓劇」兩隻字，或者一啲你哋唔識嘅嘢就掉頭走咁門口狗好唔好？（講笑啫，講笑啫；我係門口狗囉。）

又寫埋啲又悶又小眾又冇人睇嘅嘢？我呢兩個星期，睇咗一百六十七篇黃子華打咭扮感性文，我一粒聲都冇出照拍手咪又係咁！你忍吓我我忍吓你，求求其過咗佢咪算囉！面斥不雅呀！

講返韓劇，點為之「非常唔似韓劇嘅韓劇」？（嗱，開始有劇透喇，睇唔睇落去，閣下自理。其實我覺得，嗰啲成日叫人唔好劇透嘅人，一半真係擔心透咗唔好睇；另一半根本就扮緊嘢。）

近年（特別係《鬼怪》大賣之後）韓劇嘅幾大要素：

• 偶像級主角；（冇：男一金柱赫靚唔靚佬見人見智，女一千玗嬉應該冇人夠膽讚佢靚；兩個都唔係當時得令嘅偶像明星。）
• 狗血劇情；（冇：就算死人冧樓，拍得一啲都唔煽情，好寫實。）
• 韓式super hero：即係有錢、靚仔、有超能力嘅處男；（冇：男一最多算中產，鰥寡有個女；對身邊發生嘅事情，好多都無能為力。）
• 感情線；（唔係冇，不過有等於冇；基本上，編劇冇喺呢方面著墨，只係略作交代。）
• 最後嬴家；（冇，奸嘅拉咗，忠嘅炒咗，最叻嘅女一都只不過係合約轉長工；冇最終得益者。）

就係咁，所以冇乜見到啲哈韓港女提過呢套劇。鬼咩，冇靚仔男一，冇得俾啲女意淫，經已係死罪（唔信上去啲韓劇谷度，睇吓啲女點樣意淫一眾偶像級韓星「歐巴」、「小鮮肉」，再睇吓佢哋啲profile相，包你隔夜飯都嘔埋，#metoo都嫌慢）；搵鬼睇都得喇。

乜都唔好講，凈係「冇感情線」呢樣嘢，TVB班編劇/監製投幾次胎都寫唔掂個劇本啦；唔信你問吓戚其義鄧特希王心慰！《壹號皇庭》咪講律師溝女囉，《妙手仁心》咪講醫生溝女囉，《刑事偵緝檔案》咪差佬溝女囉，《洗冤錄》都睇怕係仵作溝女喇啩。

「冇感情線，咁個男主角唔通溝隻狗咩？溝隻狗都有感情線啦！」

亦都可能因為係咁，《Argon》只係得八集，係一般韓劇嘅一半。但係呢八集，非常focus咁去講一樣嘢：記者嘅職責。

故事從一單人為災難開始，一幢叫做「中城大廈」嘅商場意外倒塌（映射95年三豐百貨店倒塌事故），專題新聞節目《Argon》（아르곤 ）奉命採訪。整個故事，亦係圍繞Argon呢team編採人員，包括男一嘅主播兼採主，同埋女一嘅新手合約記者（韓文：傭兵記者）。

其中嘅兩個case，引起咗我嘅注意。

第一個，係資深記者窮追不捨一單懷疑毒奶粉嘅新聞，迫得奶粉公司員工接受訪問、兼拎出化驗證據去指證奶粉公司。新聞出街，公眾嘩然。呢個時候，受訪者跳樓自殺。奶粉公司串同死者家屬，將訪問錄音剪接，反指記者為做新聞、迫死者製造假證據、間接害死死者。

公眾輿論相信悲情故事，指責記者同埋電視台。資深記者面對內外交迫嘅困境，百辭莫辯。成個故事，我最鍾意男一主播嘅一句說話。話說記者同僚感嘆一句：「點解啲人連移花接木嘅錄音都會相信？」主播答：「冇人會理會呢啲嘢，佢哋只會相信佢哋想信嘅嘢。」

的確，有咗smartphone之後，人人都係判官，個個都識「起底」、「瘋傳」、「推到見報」。你對上一次喺Facebook like或者share呢類「案件」係幾時？你有冇花一分半分鐘，去google簡單咁核實一下資料？定係慌死狗share遲咗like會少咗？

「民粹」呢兩個字，除咗害死好多人之外，究竟仲有幾多有份害死人嘅「網絡判官」，非但唔知自己嘅問題、瘋傳完拍下籮柚乜事都冇、仲不斷咁渴望下一次嘅「公審」出現？

最荒謬嘅係，我哋推人去公審，為嘅其實只不過係幾個like同share。坦白講，俾人審完死唔眼閉囉。

第二個case，亦都係finale嘅case，故事駁返落中城大廈倒塌意外。新手女一經過幾個月鍥而不舍嘅追查，包括將大量碎紙機處理過嘅廢紙還原，終於揭發咗一個龐大嘅貪污集團，牽涉到檢察官、地方官、城規部門、工程部門、地產商、同埋電視台社長（自己老細）。

由於呢單新聞牽涉嘅權力人士太多，電視台社長甚至出動保安封鎖直播室去阻止新聞出街。記者想將故事交俾其他傳媒行家報導，亦冇人敢/肯播。

與此同時，男一主播發現自己喺處理幾年前，倒塌商場由原來嘅醫院用地、更改土地用途成為商場嘅新聞嗰陣，由於喪妻之痛，令報導失實。如果主播決定將真相還原，咁除咗所有嘅涉案人士之外，佢自己亦都要負上報導失實嘅責任；廿年聲名一朝喪。

故事嘅結局係點，我諗大家都心中有數，否則點算係戲劇。令我最印象深刻，甚至有啲感動嘅，就係當新聞部本部長（大約等於我哋嘅總經理）嘗試說服主播唔好將呢單新聞出街嗰陣指出：主播咁做會自毀前程。

但係主播答佢：「我毀滅我自己，總好過我毀滅整個傳媒業。」

《Argon》呢套劇，冇超人，亦都冇好戲劇性嘅plot twist。有嘅係，記者喺工作時所面對嘅壓力，同埋無力感。記者都係人，記者都會犯錯。但一個有良心嘅記者喺犯錯之後，點樣撥亂反正，呢一點就足夠make a difference。

大家呢幾年「日以繼夜、夜以繼日」咁，睇住啲傳媒老闆點樣為咗向北京獻媚，爭先恐後咁攜手摧毀香港嘅新聞業。然後你再聽到上面嗰句對白，係咪火都嚟埋呀？

仇韓嘅讀者可能一句「挑！講到咁偉大，作嘢我都識啦！」就可以將所有嘢開脫。事實歸事實，南韓嘅傳媒，雖然都係良莠不齊，但無論近年嘅「世越號」事件，定係朴槿惠貪污案，南韓傳媒都仍然可以肩負到「監察政府」及「人民喉舌」嘅天職。

我哋香港嘅傳媒，呢幾年做過啲乜嘢「監察政府」及作為「人民喉舌」嘅嘢呢？

我相信，一個稍為仲有啲使命感嘅新聞從業員，都應該會鍾意呢套《Argon》。因為佢提醒你，做記者，除咗每個月打簿出糧之外，你份工仲有啲更重要嘅使命。