中環遊戲（11）

清黨（下）

辦公室係一個充滿規矩嘅地方，每一間公司，都會有大量嘅《員工守則》、《公司規矩》之類嘅嘢。呢類嘅規條，可以話係一間公司嘅「法律」。

國有國法，家有家規；天子犯法，與「蔗」民同罪……講吖嘛。

事實上，所謂嘅「公司規矩」，係繼「江湖規矩」之外，最任噏嘅一套「規矩」。簡單而言，但凡你做咗任何嘢、班有權有勢嘅生物覺得唔啱睇；咁你就係「唔啱規矩」、「違反員工手則」。

觸犯公司規矩，同觸犯江湖規矩一樣，撇除所有嘅「五雷誅滅」、「三刀六眼」呢啲講就兇狠做就郁民嘅「家法」之外，講到尾就係死 — 冇錯，江湖同辦公室，都係非常缺乏想像力嘅地方，連諗吓點罰人都懶，動不動就死；儘管大家對個死字嘅傳譯並不相同。

江湖同公司最唔同嘅一點，就係出嚟行走江湖，你一定要舐咗啲嘢，先會俾人「家法」處置。但係公司打工，有時候並唔需要觸犯任何「家規」，都可以被處以極刑。

如今，Winnie 要面對嘅死角，就係咁嘅 situation……

3 月 2 日，星期一，Winnie office 嘅會議室。

「佢有冇搞錯呀！又病！」Anita 大聲咆哮。「身體咁弱，好心就辭咗份工返屋企養病啦！係度阻頭阻勢！家陣公司係搵食嘅地方嚟㗎，唔係請啲病君返嚟放病假㗎！」

「你咁勞氣做乜啫？佢有阻到你咩？」Brenda 冷冷咁答咗句。

「咁都係啫……」Anita 稍為收一收火。「Blogger event 唔蒲頭都算喇，公關公司都搞得掂。但平時推啲 clipping 都推到到喉唔到肺咁，我啲 marketing plan 靠佢食糊㗎嘛！佢唔幫我睇住啲 PR 嘢，咁我呢邊點算先？！」

「不過，你講得啱，公司唔可以因為佢成日請病假而荒廢正事……」Brenda 仍然好冷靜。

「咁你諗住點呀？」Anita 問 Brenda。

「唔……」Brenda 若有所思。

「仲使諗咁多咩……」Anita 繼續落藥。「炒咗佢請過個啦！」

「上次炒 Jennifer 你夠係咁講啦！」Brenda 望住 Anita。「結果請咗 Winnie，你咪又係唔鍾意！」

「唔係我鍾唔鍾意嘅問題，係佢兩個都做唔到嘢吖嘛！」Anita 解釋。「Brenda，喺公司入面，同樣係 skincare，我哋輸晒俾 Cleanique 同 La Ma。今年一月條數幾差，你都有眼見。你都知大老細啲脾氣，呢啲鑊，一係就搵 PR 孭咗佢、一係就我同你是但一個啃咗佢。」

「你可唔可以講啲我唔知嘅嘢呀？」Brenda 有啲火滾。「你大我冇用㗎！就算真係要抄 Winnie，都要搵個好啲嘅理由先得㗎！佢呢頭病完、嗰頭我就將佢落鑊，到時佢上勞工處咁點算？一陣搞個大頭佛出嚟，結果又係我孭鑊！你有冇幫我諗過㗎？！」

「咁我又唔係話要即刻兜佢出門口，你冷靜啲先；」Anita 安撫 Brenda。「係呢，佢個 360 搞成點呀？」

「同預期一樣，冇乜大問題喎，」Brenda 攞咗份 file 出嚟。「同事覺得佢整體上做到嘢，係個人比較靜啲，唔多鍾意同人傾偈，亦都唔多熱心參與公司嘅活動。但呢啲都罪不至死啫！」

「罪唔罪不至死，係睇你想唔想佢死啫……」Anita 語帶相關咁講。

「我的確唔係太鍾意佢，但我亦都唔一定要整走佢；」Brenda 明確表示。「如果你真係咁熱切想整死佢，你最好諗定點樣同大老細交代。呢隻鑊，我唔會幫你孭！與此同時，我唔想見到 Winnie 走咗之後，我個 PR department 吉咗個位冇人做嘢。你要係玩嘢的話，唔該你諗埋呢樣！」

「得喇，明晒！」Anita 面露笑容。「係我整走佢嘅，完全唔關你老人家事，好未？總之，我有我嘅辦法，你乜都唔知；ok？至於頂替佢嘅人選，我死唔信搵唔返個好過佢嘅！你 ok 的話，我就開始搵相熟 headhunter 搵人。家陣咁嘅時勢，你肯請人的話，外邊排晒隊啦！人工應該仲平過 Winnie 一兩成𠻹呀！」

「你搵時搵，低調啲呀唔該！」Brenda 皺一皺眉。「一陣走漏風聲就麻煩㗎喇！至於 interview，你同 Christy 夾時間啦！」

「得啦，放心喎！知點做喇，又唔係第一次！」Anita 講完後就起身、準備出返去。「冇咩事我出去做嘢先喇！」Brenda 點頭。

Anita 行出會議室之後，冇即刻返埋位；相反，佢行咗去 Brenda 房前面。然後，佢非常輕聲咁叫一個人：「Christy！」

Christy 抬起頭望住 Anita。然後，Anita 向佢點頭、再做咗嗰「ok」嘅嘴型；Christy 隨即會意、然後以一個點頭回應。

過咗一陣，Christy 打咗個電話：「喂，係我呀。我同事 ok 喇，你幾時可以上嚟 interview 呀？我老細冇乜嘢㗎，你唔使太擔心，到時你咁咁咁咁……」

Christy 係 Brenda 個私人秘書。

Anita 返埋位之後，打 intercom 俾 Wendy：「Wendy，可唔可以攞你哋今個月個 rotation 同media plan 過嚟俾我？」

五分鐘後，Anita 認真咁「鑽研」緊個plan。十五分鐘後，佢拎起電話：

「點呀你？衰嘢！咁耐唔搵我嘅？……係啦！早知就等埋你先開檯啦！……我輸咗兩底幾呀，仲好講！……真係好鬼邪嘅唧！……下次一定預埋你先約腳，我話嘅！……哈哈哈哈！……冇呀，我想問吓你，我哋個公關係咪派咗貨俾你呀？……吓？……唏，佢係咁㗎啦！……冇，想睇吓你方唔方便，我哋呢邊個 marketing campaign 仲未 ready 呀，你知老細啲嘢㗎啦！……哈哈，咪就係囉！如果你方便嘅話，幫我 hold 住篇嘢先吖！……唔使同佢講，佢都係聽我說話做嘢㗎啦！……哈哈……」

然後，Anita 再打咗兩三個電話，內容大同小異。

三月中某 working day，Winnie office。

「嘟嘟……嘟嘟……嘟嘟……你打嘅電話而家唔通，請你遲啲再打過。The number you have dialed……」

Winnie 滿面憂色咁放低電話。

每個月，Winnie都 有一定嘅 PR target 要追。呢啲 target 有好多種，其中最能夠去量化計算嘅，就係報章雜誌嘅 clipping。根據 Winnie 嘅 PR plan，今個三月，應該有三至四隻有關產品嘅專題面世。

問題係，到呢一刻為止，一隻都唔見。唔單只咁，Winnie 仲連有關記者都搵唔到。除咗一個覆咗話要遲一兩個星期先見報之外，其餘嘅就仲係未知之數。

無論係職場定商場，最折磨嘅等待，唔係放工或者出糧，係做完嘢等結果嗰種未知生死嘅無限等待，類同現在嘅已讀不回。其實，一句「唔得」或者「No」有幾難講呢？好難發音咩？點解係都要𨂽波鐘呢？

Clipping 不似預期，但老闆，mean 到死……

無助嘅 Winnie 行咗去 Wendy 個位。

「Wendy，」佢輕輕叫喚埋首喺 report 堆嘅 Wendy。「生果同敗報記者有冇覆過我呀？」

「冇呀……」Wendy 有少少唔好意思嘅樣。「要唔要幫你再追 call？」

「……都好啦……」Winnie 答佢。「都唔知做乜，個個都唔覆電話……」

呢個時候，Winnie 最唔想見到嘅人出現 — Anita 企咗喺 Winnie 嘅 partition 入口。

「Winnie，」Anita 木無表情咁講。「方唔方便傾幾句？」

Winnie 心諗：有得我話唔方便咩，八婆！

於是，佢返咗埋位。Anita 坐咗喺佢對面，蓄勢待發。

「我想問你，今個月啲 clipping，點解仲未見報嘅？」Anita 冷冷咁問。

「今個月係遲咗少少；」Winnie 平心靜氣咁解釋。「我追緊電話俾記者問緊㗎喇！可能係稿擠啫，或者等多幾日啦。」

「可能或者等多幾日？」Anita 發爛。「喂小姐，你哋做PR嘅就話返工等放工、月尾等出糧啫，我哋做 marketing 嘅冇咁多時間去等㗎！秒秒鐘都係錢，俾你咁拖一拖，公司喺 Easter 前都唔知損失幾多喎！」

「咁我都冇辦法㗎喎！」Winnie 開始有啲火。「報館又唔係我開，我又冇權篤住啲記者叫佢哋寫咗我哋啲嘢先。Clipping 嘅嘢有遲有早，今次都唔係第一次。你真係咁趕住個 hard deadline 的話，點解唔出 advertorial 呢？俾錢做客，你想點寫、幾時出、出幾大，全部都有得你控制。」

「咁我俾錢請你返嚟做乜？養個閒人當花樽擺呀？」Anita 越講越大聲。「做 PR 搞掂啲記者，係你嘅職責喎！收得幾皮嘢一個月，唔係連幾個記者仔都搞唔掂呀？係咪出聲囉，我幫你做又點話！」

「不如你教吓我，點樣控制個記者，按照我哋嘅 promotion schedule 寫嘢吖？」Winnie 雖然好嬲，但仍然控制住佢嘅怒火。

「你咁多年公關經驗，唔係連呢少少嘢都唔識做呀？」Anita 一臉恥笑 mode。「不如你出去叫你條𡃁教吓你吖！」

「如果你係嚟搵交嗌的話，咁我繼續做嘢，你坐喺度鬧到夠就自己走啦！」Winnie 冷冷咁答佢。「By the way，我份糧係公司出、唔係你出㗎！唔好調轉咗我同你屋企個印傭先得㗎！」

「家陣你係咪咁串嘴呀？！」Anita 開行 turbo。「自己做唔掂份內事，仲咁牙斬斬？！」

「我係咁㗎喇！你第一日識我呀？」Winnie 冇理佢，作狀 check email。

「你好嘢！我睇你點同 Brenda 解畫！」Anita 拋低呢句、攞個尾彩，然後就離開。喺行咗出 Winnie 嘅房之後，佢嘴角微微咁浮現一絲冷笑……

「阿姐，冇事吖嘛？」Wendy 見 Anita 走咗之後，立即埋去問 Winnie。「Ta 姐係咁㗎喇，唔使理佢㗎……」

「Wendy，」Winnie 望住佢。「點樣可以控制個記者，按照我哋嘅 promotion schedule 寫嘢呀？」

「我點知喎……」Wendy 一臉無知。「我識嘅話就開咗公關公司啦……」

Winnie 同 Wendy 笑咗一笑，然後安撫咗佢兩句，叫佢返埋位做嘢。

4 月 2 日，台北圓山飯店 coffee shop。

一個啱啱受咗重大挫折嘅人，散心係最好嘅心靈雞湯。

喺過去嘅兩日，Winnie 嘅腦海裏面，不斷重複一個畫面……

「Winnie，你都喺公司做咗一年喇。喺呢一年嘅時間內，我哋不斷觀察你，希望你可以同公司文化磨合到。但係經過咁耐時間，我哋都仍然覺得你仲未達到我哋嘅期望，亦都覺得 cosmetics industry 嘅文化唔係好適合你。經過我同 headquarter 商量之後，我哋決定同你解除合約。我哋會按照勞工法例賠償俾你，呢張 cheque 你睇吓銀碼啱唔啱，呢份係呢嘅 reference，我哋會當你自己辭職。冇問題的話，麻煩你喺離職文件上面簽返個名，一式兩份。你嘅 last day 就係今日，一陣你可以執埋你啲嘢。放工嘅時候，麻煩你擺低員工證同 key card。」

「我想知點解！係咪因為上兩個星期嘅 clippings？定係因為我同 Anita 嘈？」

「唔關事，其實呢個係最高管理層嘅決定。Winnie，你都無謂再追問喇，我哋嘅決定係唔會改變嘅。Wish you all the best！」

「你冇事吖嘛？」我輕輕叫醒夢遊緊嘅佢。「仲諗緊嗰件事？」

Winnie 大力點頭，眼淚喺面上流過。

「咁我點算呀……？」佢抹乾眼淚後問我。

「正路嘅諗法，開開心心咁玩埋呢幾日，然後返到香港疊埋心水搵工；」我答佢。「問題係，喺過去半年，其實我都未停過搵工；不過，個市一潭死水咁，好難有大公司肯開 headcount……」

「咁唔正路嘅諗法呢？」佢望住我。

「喺嗰度跌低，喺嗰度起返身。」我懶禪咁答佢，因為我係智慧型男朋友。

「即係點呀？」佢諗咗一諗。「你唔會叫我返入去做㗎……你想我搵返份咁上下嘅工、繼續做 beauty PR？」

我擰頭。

「Brenda 同 Anita 打爛你飯碗，所以，你要繼續做你做緊嘅嘢，等佢哋篤眼篤鼻；」我慢慢答佢嘅問題。「唔單只篤眼篤鼻，你仲要佢俾高於你人工嘅價錢，做返一模一樣嘅嘢，但佢哋冇權再炒你。就算佢哋發你脾氣，發完之後都仲要死死地氣俾錢你賺。」

Winnie 好認真咁諗緊我講嘅嘢。

「Welcome to the Infinity Communications！」我笑住同佢講。「喺你搵到新嘅工作之前，你就係我嘅 account director；以後 Brenda 個 account 就歸你。短期內，佢哋冇辦法賣甩你，因為 blogger event 嘅嘢，香港暫時仲未有好多 PR firm 識搞。喺可見嘅未來，Brenda 同 Anita 都仲要睇你面色做人。」

「但係……」Winnie 好似仲有啲擔心。「我咁樣坐落嚟，對你嘅負擔會唔會好大？」

「負擔一定有，所以我哋亦都要努力做 BD 搵生意；」我答佢。「你喺呢行咁耐，其實你啲 connection 好有潛質喎。」

我一路講、Winnie 一路思考緊…