生活可以好簡單

星期五，老婆放假，所以我哋落咗Munich住一晚。其實我哋一年都會落Munich幾次，主要都係探朋友同食中菜。不過，今次落嚟嘅主要原因，係老婆有個剪頭髮嘅appointment。

喺德國，剪頭髮可以係釀成血案嘅大災難，特別係Regensburg。八年半嘅時間，我哋都未能搵到一個完全滿意嘅hair stylist。遇見過嘅，唔係自我到你講乜佢剪乜完全兩會事、就係連剪1cm都好似慌死你會痛咁唔敢落剪；總之就係勞氣。對話通常都係：「你做乜剪到個頭一忽忽呀？」（答：因為我覺得好睇。），或者「你剪落去啦，唔痛㗎！」（答：我驚剪得太多。）

後來，「佬系飛髮鋪」嘅興起，解決咗我嘅問題 — 剷青剃界起碼唔會手軟。但係Winnie嘅問題就比較嚴重，因為佢長頭髮，萬一搵著個神神哋嘅髮型師，幫你嚟個後面留長則邊剷青（唔係未見過呢啲藝術家或者成品），咁就喊都無謂。還好，Munich嘅朋友介紹咗呢對日本嚟嘅髮型師夫婦。

Make appointment係麻煩嘅，因為佢兩公婆就係每日做八個鐘，叻晒都係每人八個客一日。所以，Winnie要請假剪頭髮。鋪頭位於一個唔起眼嘅住宅區，入面就係得兩個位、一個洗頭盤。由於空間足夠，你可以睇得出，佢哋對「簡約」有一定嘅追求。

老婆埋位剪頭髮，我就無無聊聊玩手機兼睇吓人哋點做嘢 — 話說喺美國讀書嗰陣，我有做過兼職洗頭仔，所以都會留意吓啲髮型師嘅手法。睇住女師傅幫Winnie剪頭髮，我起碼知道，佢真係識剪 — 唔係講笑，喺Regensburg我真係見過啲所謂髮型師、將長頭髮喺背後梳直然後打橫一嘢剪落去就當剪好！

最緊要係，佢識剪Winnie恨咗好耐嘅韓系髮型；呢啲頭你打死幾個德國stylist，佢哋都剪唔掂。

剪髮嘅過程中，除咗有預約咗嘅顧客之外，亦有一啲walk-in客想幫襯，但係都俾佢哋一一婉拒：「唔好意思，今日appointment滿咗。」喺香港甚至德國，個髮型師為咗接多個客，叫你坐喺間鋪度白等就試得多，話咗係咁就係咁呢啲咁堅持原則嘅人，真係買少見少。

臨走前，又聽見其他客人問師傅，星期一開唔開？師傅答：唔開，星期日同一都唔開，因為要陪屋企人同打golf。

喺等待嘅一個多鐘期間，我見到佢哋兩公婆總共剪咗三個頭。以我嘅觀察，佢哋嘅手藝絕對係專業級數；如果去盡啲、做多兩轉、或者收貴啲的話，應該會賺多好多；但係佢哋並冇咁做。

事實上，亞洲人嚟歐洲生活，某程度上，唔係因為羨慕呢邊嘅人文氣息、同埋work life balance嘅咩？呢對日本夫婦，就正在示範，生活，其實可以好簡單。搵錢，只不過係生活嘅一部份，唔係全部。搵錢嘅同時，亦應該享受生活。

相反，好多香港人嚟到德國後，仲一個星期踩足七日（呢個多月，其實我都係咁）；我認識嘅唐餐館老闆，除非餐館開喺商場、每星期「焗休」一日，否則一般都會做足七日。搏盡老命去搵錢，忽略咗眼前或者身邊好多都equally重要同寶貴嘅嘢，只係為搵而搵，其實為咩呢？

生活，其實可以好簡單，亦唔需要太多錢 — 真㗎，其實我哋兩公婆是但一份人工，都已經足夠我哋生活有餘；搵多啲，其實都係為咗享受（乜福利退休金都有齊啦）。搵多啲為享受，絕對無可厚非；但係搵到連休息都唔休，每日都錢錢錢錢，會唔會都係對生活嘅唔尊重？

有時候，我真係需要一啲時間去諗吓，究竟最初嚟德國生活嗰陣，我究竟想要啲乜。