《 SKY 캐슬 》 — 「精英主義社會」之城

一套所有父母都應該睇嘅韓劇

我又寫劇喇！其實我真係幾唔怕死，或者嫌錢腥。

寫劇，特別係寫韓劇，對我嚟講，係票房毒藥。收得嘅千五claps，唔收得嘅隨時一千唔到。如果我真係立心只向錢看的話，我應該多寫PR & Marketing嘢，冇煩惱兼實收得。

咁點解我仲要寫韓劇？

因為你哋對韓劇嘅有色眼鏡，令你哋睇少咗、知少咗好多嘢。

喺呢個年代，如果你仍然抱住「韓劇咪又係狗血催淚煽情嘅港女偶像劇囉」嘅心態對待韓劇的話，你個世界除咗細之外，仲好灰暗囉。

韓劇同港劇最唔同之處，除咗唔同明星同埋製作比較認真之外，韓國嘅編劇，好多時都會係劇裏面，滲入唔同嘅message。有啲係開宗明義嘅，如《漢摩拉比小姐》呢啲，聽劇名就知佢想點（當然，你首先要知「漢摩拉比」點解）。

另外一啲，表面上係愛情或者偶像劇，實質上都係探討緊某個話題；如《經常請吃飯的漂亮姐姐》，表面上係講姐弟戀，實際上非常深入咁探討辦公室性騷擾呢個#metoo惹火議題。

《 SKY 캐슬 》（Sky Castle/天空之城）就係後者。

一反常態：呢篇文只係有適量劇透。不過我嘅「適量」，同你嘅「適量」，把尺係咪一樣呢？我點Q知呀。

對比起近期比較熱門嘅《李屍朝鮮》（ 킹덤 /Kingdom ）， 《 SKY 캐슬 》呢套劇係處於一個下把位 — 冇火熱嘅偶像明星擔綱，亦冇愛情劇元素。就以開版相呢張JTBC網頁嘅宣傳照而言，五個 아줌마 （AJumMa/大嬸）加四個 아저씨 （AhJuSsi/大叔），雖然其中都有型男索女，但對於會追韓劇嘅港女而言，呢套劇嘅吸引力真係唔大。

所以，就算好多「韓國KOL」，都唔知套劇想講乜。

但係，喺韓國，呢套劇就打破神劇《鬼怪》紀錄、成為韓國有線電視史上歷來最收得嘅電視劇。劇中嘅幾個女演員亦因此再次走紅（其實一直都紅，不過呢期風頭好勁）。

劇情方面，維基如是說：

此劇講述韓國上流社會的「SKY Castle」中，一群欲扶助丈夫事業和培育子女成為二代貴族的貴婦故事。

即係話，連維基都捉錯用神。

事實上，張劇照又的確幾誤導觀眾 — 驟眼望落去，會以為又係豪門爭名奪利或者爭產劇，即係港式「時裝商戰」劇。

首先，講講個劇名。喺落筆之前，我睇咗好幾篇有關嘅劇評，包括某位喺FB同呢度都有寫作嘅韓國KOL，竟然只有少數人睇得出（或者人哋睇得出唔寫啫），劇名其實已經開宗明義話俾觀眾聽，呢套係講述韓國教育嘅劇，而唔係乜嘢「貴婦故事」。

應該咁講，韓國人一眼就會睇得出，未喺韓國住過或者對韓國文化唔熟悉嘅，俾你睇四年都拆唔掂。

要幫劇中嘅夢幻豪宅起名，選擇可以好多。「天璽」又好、「凱旋門」又好，「岸。久舞。若衣」都好，點解咁多名唔叫，偏偏要叫「 SKY 캐슬 」（ 캐슬 係castle嘅音譯 ）？唔通又係樓盤植入式廣告？

SKY，係韓國三大名校「首爾大學」（Seoul National University）、「高麗大學」（Korea University）同「延世大學」（Yonsei Univsrsity）嘅統稱。喺韓國，就算好多人唔識英文，都唔會有人唔識「SKY」呢個名稱。

唔識英文，你最多唔聽Lady Gaga；唔識SKY，小心跨代貧窮。

「SKY」係韓國，係「精英主義」嘅代名詞。SKY校友長期佔據國會議席，甚至青瓦台（總統府）。SKY總統、SKY總理、SKY議員比目皆是。喺一屆國會入面，來自SKY嘅議員，可能有八九成之多。可見，進入SKY就讀，亦即係成功嘅第一步。

SKY，其實就係韓國嘅Ivy League。

韓國仍然係一個著重裙帶關係嘅社會。你諗吓，作為一個喺SKY畢業嘅後輩，當你入到一個一個嘅「精英衙門」（司法部、檢察署、法院、律師行、醫院），喺你之上一個個同校師兄學長不斷提攜你；你嘅士途，真係會比一般人平坦好多。

劇名《 SKY 캐슬 》嘅意思，就係講述要進入「首爾、高麗、延世」呢個「SKY Castle」成為精英份子嘅故事。

「SKY有幾難入呢？」可能大家會問。

答案：每年喺韓國應考「大學修業能力考試」（即係高考）嘅所有學生當中，只有最top嘅1%可以進入SKY。

劇情以首爾市郊一個名為「Sky Castle」嘅超級豪宅為背景。某日，女主角韓瑞珍（廉晶雅）正在準備為鄰居兼好友李明珠安排一場盛宴，幫佢慶祝佢嘅仔朴英才成功考入首爾大學醫學系。

韓瑞珍之所以咁熱心幫人搞party，完全係因為想李明珠將兒子考入首爾大嘅「秘訣」（即係朴英才嘅notes同考試論文等等）相授，咁佢就可以送佢個大女姜藝瑞（金惠允）入首爾大、完成佢奶奶嘅「三代醫生」夢。唔只韓瑞珍，「城堡」嘅其他女主人，亦都對呢份「秘笈」虎視眈眈；希望李明珠傾囊相授。

最後，李明珠選擇對韓瑞珍講出秘密：英才考入首爾大嘅秘訣並唔係佢嘅notes或者論文，佢將一張參加某個「教育研討會」嘅VVIP卡俾咗韓瑞珍 — 只有憑呢將VVIP卡，先可以入去會見韓國最top嘅老師；而其中一個「傳奇老師」金珠英，擁有「100%成功考入首爾大」嘅彪炳戰績；金珠英就係幫朴英才考入首爾大嘅老師。

（OT：飾演金珠英嘅金瑞亨，同《女王的教室》裏面嘅天海祐希，無論外形同造形都非常相似。）

覓得名師嘅代價不菲，劇中冇透露價錢，但喺主角兩公婆嘅口中，藝瑞嘅學費，需要「幾十億」。

大家有睇拙作《初雪》都應該記得，小說中一個脫北者嘅使費，大約係唔夠二億韓圜。大家可以想像得到，幾十億學費究竟喺咩一回事。

當韓瑞珍滿以為幫個女搵到天王級補習老師，就會扶搖直上之際，慘劇發生 — 李明珠喺party幾日後嘅深夜，喺屋苑附近吞鎗自殺、兒子朴英才失蹤、老公亦都辭去醫院骨科主管嘅職位、消失於世上。

究竟發生咗啲乜事，會令一個「人生勝利組」嘅家庭，幾日內變成家破人亡呢？朴家嘅不幸慘劇，亦都帶出咗成套劇嘅主線：為咗子女嘅教育，你可以去幾盡？

最近睇到好幾篇唔同嘅文章，都係講述中國如果唔係共產黨阻頭阻勢，經過幾十年民主進步嘅發展，會變成點？

我個答案係：會變成韓國 — 一個由自悲演變成自大、進而矯枉過正嘅國家。其實，撇除語言，呢兩個國家真係何其相似。

喺表面上，韓國擁有一個令人羨慕嘅教育制度。幾年前，甚至超越芬蘭，排行世界第一。（雖然，喺同一個排行榜上面，同樣屬於教育地獄嘅香港，都排行第三）

從數字上嚟睇，韓國教育制度，的確有令人羨慕嘅一面，應屆高中生入讀大學嘅比率，有55％（香港70%，但計晒所有high dip同副學士。我覺得如果韓國都將所有「鷺梁津大學」、即係私立非學位學院都計埋的話，肯定唔只70%）；而卅四歲以下擁有學位嘅比率，更高達64%。

同香港一樣，韓國教育非常著重考試。由初中開始，每年嘅校內試都會搵出每一級嘅「精英」，然後將佢哋編入最好嘅一班。高考就更加係地獄級，一日之內要考晒考生報考嘅八門（五個科目共廿四門，跟規矩揀八門嚟考）！近年，呢個full day嘅考試連韓國人自己都覺得唔人道，於是將佢分為兩日，每隔十五日考一次；科目亦由八門減到四至五門。

但係「一考定終生」呢個悲劇仍然改變唔到。每逢高考季節（每年十一月），都係韓國自殺率嘅高峰。

考得好就有機會參加大學嘅「複試」。入到有名嘅大學，畢業後就入大機構或者政府工作，跟從社會嘅「長幼有序」，希望喺「三八線」（即係卅八歲前），成為部長級主管。考得唔好嘅，就只有喺中小企打工，希望自己唔會成為「四五正」（四十五歲被迫正式退休）。

「地獄朝鮮」就是這樣煉成的。

不過大家唔好笑得咁開心，其實近年香港都差唔得幾多。

喺韓國教書嘅兩三年日子裏面，我就唔只一次俾家長投訴，話我教嘅英文班功課唔夠多，「鍛煉」唔到佢哋嘅子女。一般家長都認為，高中學生，特別係高三，一定要晚晚做功課或者溫習到半夜，先至算係「勤力」。（留意返：一般韓國高三，基本上都要夜晚八九點先放學 — 喺學校集體自修）

我仲好記得當時我個「寶貝學生」Jenny（《漢城》有出過場）嘅爸爸，就曾經私下俾錢我，想我喺佢個女放學後，捽多佢兩粒鐘英文。後來Jenny入咗UCLA、做咗我師妹；為此，佢屋企就好似《 SKY 캐슬 》咁，搞咗個party慶祝阿女「光宗耀祖」。

咁係咪入到有名大學就一定士途順利呢？

Chloe本身都係「SKY門生」，作為延世大學英文系畢業生，佢都花咗兩年時間，先至搵到佢嘅career；咁當然，亞洲金融風暴都係佢生不逢時嘅原因。

除咗教育問題，《 SKY 캐슬 》另外一樣俾編劇大肆鞭撻嘅，就係所謂「上流社會」、「精英社會」嘅虛偽。

其實喺之前金喜善主演嘅韓劇《有品位的她》（ 품위있는 그녀 ）當中，編劇已經將上流社會呢個圈子，鞭撻得體無完膚。《有》劇借金宣兒「朴福姿」呢個角色，將上流社會同草根階層畫上等號。如今，《 SKY 캐슬 》直情將上流寫會嘅離地、無情、精英主義同埋互為利害，無情咁暴露出嚟；喺編劇眼中，所謂嘅「上流社會」，其實比社會嘅最底層更加卑鄙無恥。

女主角嘅老公貴為醫院骨科嘅主任醫生，唔單只一啲都唔「仁心仁術」，佢仲為咗前途，不惜濫做手術（要快要多），希望成為醫院中最賺錢嘅醫生。而醫院院長對下屬嘅亦都親疏有別，晉升下屬嘅條件，就係睇佢嘅裙帶關係可唔可以幫助自己喺政府裏面升官。

女主角自己亦都為咗女兒能夠進入首爾大醫學院，不惜將個女交託俾有殺人嫌疑嘅補習老師。為咗咁，佢甚至喺掌握咗補習老師嘅殺人證據後，無視自己嘅高中同學兼鄰居嘅兒子因此成為嫌疑犯、身陷囹圄，企圖將證據收起，直至個女考入大學為止。

有其母必有其女，劇中女主角嘅大女，差唔多係我睇咁多韓劇當中，最乞人憎嘅角色（因為金惠允將角色嗰種衰格演得七情上面）。我唔想逐點列明佢點乞人憎；總之，勢利港女所有嘅缺點，呢個角色都基本不缺。

劇中去到接近尾聲，醫生男主角對佢阿媽嘅一句說話，亦都係呢套劇嘅精萃：

「你栽培咗我咁多年，我雖然成為精英，但咁多年都只不過係個軀殼；點解我要按照別人嘅期望生存？」

成為金字塔頂尖嘅「人上人」，究竟喺咪幸福生活嘅保證？

《 SKY 캐슬 》呢套劇喺韓國大受歡迎，其實唔難理解。我覺得，香港嘅父母都應該好好睇吓呢套劇，領略一下劇中故事背後嘅微言大義。

做父母，係咪無所不用其極咁將仔女送咗入最高學府，就代表成功？