IF
IF

此 Matters 帳戶已停用,請勿加入。如有興趣閱讀我的文章,請前往: https://www.patreon.com/herrfung Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。

隨想(2019/KW43)

生活淡淡似是湖水

如果我話,過去嘅七日,香港持續咗四個多月嘅抗爭,終於靜咗少少,大家會唔會群起屌我老母?

事實上,作為一個隔岸觀火嘅局內人,喺冇現場感嘅情況下,我的確覺得,呢幾日好似真係靜返少少喎 — 嗱,唔好interpret我嘅說話,靜唔一定係壞事,亦唔一定係啲人嘅「熱情」已經冷卻blah blah blah。我睇返日程表,仍然見到有唔少嘅活動,只不過唔再係一啲好eye catching嘅活動。

不過,大家真係唔使擔心,就算幾唔eye catching、幾和理非嘅活動,我哋嘅香港黑警,一樣有能力將佢變成流血衝突!我哋要對呢班冚家剷有信心!唔使幾耐,只要大家篤完魚蛋三秒內唔掉咗支竹籤,你都會被人告藏有攻擊性武器同襲警。試問喺個咁嘅社會環境下,大家邊使擔心會冇人上街抗爭?

所以,更加唔好擔心乜撚嘢「社運膠化」呢啲咁多鳩餘嘅嘢。你諗得啲咁嘅嘢,證明膠化嘅係你唔係社運 — 同理,當你想上街做膠嘢、例如之前天上地下最戇撚鳩嘅甚麼「快樂抗爭」,我哋仲有三萬盡忠職守嘅黑警將你打返醒。面對住被自殺、兜心口轟一鎗、斷手斷腳或者好命唔死得就最高十年嘅徒刑,你仲敢唔撚敢快樂抗爭?快樂著草就有。

唔好咁擔心件事就咁就會平息,我哋已經過咗point of no return好耐喇。

至於去唔去支持加泰獨立集會,講真,問心啦。你個心想去就去、你個心唔想去就唔好去。但點講都好,唔好咁戇鳩信嗰啲甚麼「《香港法》進入關鍵一周」(咩周呀?你嗰條定我嗰條?)、「美國支持香港自治,唔係獨立」之類嘅鳩話連篇。You are what you share,呢啲膠post絕對反映share者嘅智慧。

點解?我不忠,我老婆發爛要剪我就話正常啫。我不忠,關隔籬屋七姨婆乜事?香港人支持加獨、驚西班牙唔鍾意,我明;驚德國唔鍾意,我唔明但都仲可以理解(話晒歐盟都唔支持加獨)。香港人支持加獨,關美國咩事?又驚攞唔夠二萬分定攞唔到白兔仔?(唔好嘗試同我解釋呢啲所謂「理由」,我睇過晒,冇一個成立,包括Solomon Yue呢條茂利講嗰啲。)

喺西方,呢啲就係「和而不同」。支唔支持加泰獨立,大家仲可以慢慢傾。就算傾唔掂,每個國家、每個人都仍然可以支持自己嘅理念。最緊要就係,可以自由咁表達意見,而唔會被以言入罪。

「表達意見」同「行動」,係完全兩回事。某國搞唔清呢個咁深奧嘅概念,唔代表一個正常嘅民主政權,都會犯上同一個錯誤;呢啲就叫「人禽之別」。

近期,因為香港正正喺國際政治舞台嘅中間,所以好多所謂KOL,都開始發表有關國際政治嘅意見。表達自己嘅睇法,點講都係件好事。 不過,可唔可以at least去google吓、或者搵本《International Politics for Dummies》嚟睇吓,免得自己發膠音而不自知。

外交同國際政治嘢,唔係你覺得自己識就係識嘅。你寫嘢出嚟𠱁到班同你一般水準嘅人嚟圍爐(白頭梁嗰句:咩罌出咩草話?)、同真正認識國際關係、外交,係兩件事。有啲國際嘢,並唔係常識可以解釋到,仲有好多因果關係、前世今生之類嘅嘢;更何況,香港人本來就唔係常識叻嘅人類,何必要衝出嚟柒呢?

面斥就當然不雅;但有時候,就算人哋唔兜口兜面串鳩你,貽笑大方都夠晒尷尬。

至於陳同佳,坦白講,我對佢冇乜興趣 — 講到尾,佢都只不過係俾人擺上檯用完即棄嘅殺人犯乙件。擔唔擔心放生一個殺人犯周街走?香港日日都有三萬個有制服有武器但冇委任證嘅殺人犯周街走啦,多一個唔多囉。起碼,我唔信陳同佳夠薑周街冧友先。

不過,睇完佢出冊嘅相之後,我又覺得,連佢副尊容都有女朋友(雖然係帽事)俾佢老謀,你哋班A0毒丁係咪要好好檢討吓?!


既然大棚嘢冇乜好講,可以俾我講返啲自己嘢喇啩?!

但係一時間,我又諗唔到乜嘢自己嘢嚟講……

不如就講吓medium嘅近況。

相信大家都收到medium嘅email,喺呢個月嘅月尾,我哋嘅「派彩」計算法,又會有調整。今次嘅調整,仲會幾大吓:簡單嚟講,就係由大家睇一篇文章嘅時間長短,去決定你每個月課金嘅分配。拍手仍然會有效,但唔會好似以前佔嘅比重咁多。

文友hkmalls亦都有寫文講過有關嘅嘢:

(非mall文)Medium 新收費model + 意見調查

Medium嘅運作特色,就係永遠留返幾樣大家永遠唔會知嘅因素,去影響課金嘅分配。因為只有咁,佢哋先可以繼續一言堂、繼續用盡方法去迫你哋睇一啲佢想你哋睇嘅文章、製造吸客嘅數據,同時亦迫你放棄你哋嘅「from your network」,因為呢班from your network嘅人經已完成咗佢哋嘅歷史任務 — 吸引你嚟呢度,再冇其他剩餘價值。

只有咁做,佢哋先可以generate到business、搵啲大傳媒或者大作者落疊、然後繼續做大左膠、將大家嘅部分課金同收入、派俾啲連每月五鎂都唔肯俾嘅作者、希望有日佢哋大發慈悲科水入會。換句說話嚟講,佢哋係慷緊我哋嘅慨、去「建設民主中國」。

今次嘅改變,對我哋呢班old seafood有乜影響?我點Q知呀!係都要10月28日殺到埋身先知囉講真。不過,收入會少咗就似乎無可避免。以前大家就鍾意叫人俾claps,而家可能要改口,叫大家每篇文睇耐啲喇。

還好我從來都冇follow「長文冇人睇」嘅「定律」、寫親都長文。所以,唔睇我嘅永遠都唔會睇、睇開我嘅就一定要花時間去慢慢睇。希望我呢個堅持咗兩年嘅原則,今次可以幫到我。

不過,喺呢一切開始之前,大家一定要記得一件好重要嘅事:

記得backup自己啲文。

記得backup自己啲文。

記得backup自己啲文。

呢期呢套system嘅唔穩定,經已去到接近核爆嘅地步。上星期我就試過先後兩三日,俾佢哋以「reach the daily limit」而禁言。投訴之後,佢哋話係bug、已經reset咗我個limit,但第二日又再禁過。

我唔敢擔保,佢哋將套每周計錢嘅system轉咗做每日計錢之後,我哋要死幾多日機。上星期我亦都試過,寫寫吓文成篇唔見咗,兩千幾字就咁消失風雨中!好彩嘈佢哋嗰陣,又俾返個backup我。但我唔肯定,會唔會次次都咁好彩,因為medium經已變成梅菲定律實驗場。

大家,記得backup呀。



本週《中環遊戲》免費文章:

中環遊戲(34)未生

中環遊戲(35)博弈

最近有文友反映,用「IF」呢個名,好難search到我嘅文章。所以,建議大家使用我嘅domain name 「@herrfung」 去search,比較容易搵到我嘅文章
CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论