《寫字》（三）

寫咗幾日，我喺度諗：點講都好，其實我仲係有少少寫作天份嘅。起碼，我呢個隨口噏當秘笈嘅一條題，竟然都可以俾我上綱上線咁寫咗四篇嘢出嚟；識吹水對人生事業方面其實都有正面嘅一面嘅。

我想問一下，大家有無試過，寫完或者做完一件事之後，對自己嘅成品，係連眼尾睄下嘅慾望都無嘅呢？

我喺報館工作嗰陣，每星期最期待嘅，就係出書嗰一刻。儘管個版係點其實校對嗰陣都睇過晒，但係喺雜誌中見返自己寫嘅嘢，都不無興奮。

直到我親手寫咗我人生第一本，亦非常希望係最後一本嘅上市公司年報。

咁當然，年報上面嘅數字唔會係由我去作。我所指嘅寫年報，係講緊一本年報裡面嘅兩大部份：「主席的話」同埋「市場概覽」（係咁上下嘅名啦，鬼記得咩）。

無論係任何語文，係呢個文字世界裡面，除咗法律條文之外，仲有兩個範疇，可以將原本生動有趣嘅文字，變成令人絕望嘅一潭死水。

一個係外交辭令，另外一個係上市公司年報。

呢兩套文字嘅共同特點，係可以以最客氣嘅說話，長篇大論咁用數千至數十萬字，去講一啲講咗等於無講嘅嘢。好多時候，當你有耐性去花時間精讀一份年報或這一份外交公告，你會發現當你去蕪存菁（if any菁）之後，成篇文除咗大量言不及義嘅詞句之外，根本係乜都冇，讀完之後亦毫無得著。

如果某類型嘅官樣文字可以稱為「黨八股」的話，年報上嘅官腔文字應該可以歸類為「財經八股」。

隨手執一個：凈係EBITDA（Earnings Before Interest, Taxes, Depreciation, and Amortization）嘅中文「稅前息前折舊前攤銷前利潤」我已經覺得好有呢個「攞你命3000」嘅效果；就如我將某大眾「女神」稱為「長髮高鼻大眼大波長腿雌性靈長類動物」一樣，「唔係話唔明嘅」，「不過可唔可以講得好啲咁囉」。

當你畫咗個九頭身美少女出嚟，『上市規則』就會勒令你要畫埋佢啲心肝脾肺腎十二指腸同痔瘡出嚟「增加對公眾嘅透明度」，此為「投資者關係管理」。

其實寫年報呢啲本來係財經公關公司收錢去做嘅dirty job，當年因為啱啱轉新工諗住搏表現嘅我，竟然拍心口一手包辦！

結果我中英對照咁寫咗合共卅六頁自己完全無閱讀意欲嘅文字。

當然，因為職責所在，我係無可能唔讀嘅；凈係bulk print當日我都讀咗不下數十次……

當你能夠寫出數萬個連自己都唔想讀嘅字，你嘅文書能力會到達一個新境界：如果爛都有分境界的話。

傳媒、政治、Corp Comm、IR，寫字嘅旅程將我帶入一個認識已久但又完全陌生嘅地域：公關。