IF
IF

此 Matters 帳戶已停用,請勿加入。如有興趣閱讀我的文章,請前往: https://www.patreon.com/herrfung Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。

北角演義(二)

星期一早上,office。

「早晨馮老闆!」Rachel每朝早都會過嚟同我打招呼、吹幾句、同埋run一次嗰日個schedule。「今朝十一點我哋要同Simon開會,下晝兩點你同上海marketing team有個conf call,然後三點半我哋internal meeting。」

Rachel brief緊我嗰陣,我留意到佢今日著咗條短裙,一對42吋長腿加高踭鞋,就咁棟咗喺我面前。我好似冇講過:Rachel都有成五呎七。

可惜,我戒咗長腿好耐喇。

「有冇收到風,Simon今日開邊範呀?」我問Rachel。

「唔知呀,連Peggy都唔知佢想傾乜……」Rachel則一則頭。「你哋同佢呢期有乜搞作係煲到㷫熻熻㗎?」

「除咗郭總,咪就係香港仔嗰間貼牌手機firm囉……」我努力咁思索。「不過火水嚟㗎,個老細精甩尾呀……」

「得!我一陣執好晒啲file,再過嚟搵你啦!」佢講完走咗。

點解我哋兩個,對同Simon開會好似咁緊張?因為Simon好憎人反應慢,佢問嘅嘢,要即刻答到,唔准諗;偏偏佢又係一個冇乜章法嘅人,諗嘢一時一樣。為咗唔想俾佢話,我哋通常都會prep定先。

Simon嘅口頭禪係:「我最憎人蠢!」但根據我咁多年嘅職場心得,講得呢句嘅,通常都係蠢人。


「嘟……嘟……」Intercom響起。

「Alan?」電話傳來Peggy、即係Simon個秘書嘅聲音。「老闆準備好喇!」

「唔該Peggy。」我拎齊文件,行過去會議室。

喺會議室門口,Rachel、Andrew同埋佢個副手、我哋個FC Henry都已經喺晒度。我哋係咁𠵱點個頭打個招呼,然後Andrew就推門入會議室。

呢間公司其中一個怪現象,就係職位同職能不對稱。我名義上係Corp Comm Director,實際上係Simon個跟班兼法律顧問;Rachel名義上係Deputy Communications Manager,實際上係我個助手兼秘書;Henry名義上係Financial Controller,實際上係Andrew個助手兼Simon個跟班 — 冇錯,我同Henry除咗JD上面嘅職責之外,首要嘅工作,就係跟住Simon出出入入、幫佢「執手尾」(Henry話係「抿屎」)。

「齊人喇?」Simon喺會議室入面個主席位望出嚟。「入嚟坐啦!」

當我哋對號入座坐好後,Simon喺檯面向Andrew「煽」咗份文件,然後講咗句:「我同Felix Cheung傾掂喇,你哋睇睇呢份嘢,然後開工做嘢啦!」

我同Andrew俾佢嚇到你眼望我眼,唔識俾反應。眼前嗰份文件,係份意向書(Letter of Intent)。Simon又一次喺我哋冇人在場之下,同其他老細簽意向書,入股(或者收購)人哋檔嘢。

佢早年跟慣啲大孖沙傾生意,見慣人哋打場golf就十億八億生意上落,握個手就當簽約;而家走去有樣學樣。但係佢唔記得,佢以前跟嗰班老細,市值成千億;而佢老人家,一公一私兩個荷包加埋,都未必有廿億。

Felix Cheung,就係今朝我同Rachel提過嗰個貼牌機公司老闆。所謂「貼牌機」,其實係大陸用語,意思就係買一啲細廠出嘅手機,輕輕咁modify過個form factor或者spec,有時甚至只係就咁改過個名,然後就當自己嘅產品出售。Felix Cheung呢壇嘢,就係向美國DC Comics,購得某卡通人物嘅使用權,然後出手機嘅公司。

我之所以形容佢為「火水」,係因為呢個Felix Cheung喺行頭內出晒名,次次傾呢類刁,都能夠安然cap水走;接佢手嘅通常都損手爛腳,執返嚟間公司都非常雞肋。可以話,佢賣得嘅生意,通常都冇死錯人 — 接手嗰個一定死。

我唔擔心,份意向書裏面會有地雷,反正都係齋吹嘅文件。我擔心嘅係,Simon對呢類case一向都雷厲風行、話買就要買、有時甚至無視我哋係「Due D」(Due Diligence;盡職審查) 嗰陣發現嘅問題。佢之所以今時今日都未舐鑊金嘅,全因為佢夠運:我哋發現嘅問題,最終都冇影響單刁或者生意運作;所以補咗鑊就move on。

當Andrew向Simon查詢入股嘅內容嗰陣,我有時間細心咁望一望份LoI嘅內容,其中有一條,係話喺呢單刁嘅洽談過程中,所有有關法律顧問服務嘅支出,均由我哋公司支付。

「Simon,」我打斷佢同Andrew嘅說話。「唔好意思呀,我想問吓:我哋入股佢間公司,我哋仲要幫佢俾埋律師費呀?」

「係呀!」Simon氣定神閒。「咁我哋話晒都係上市公司,佢哋呢啲公司仔,未必請得起律師幫佢哋跟文件;你知道我最怕同蠢人傾生意,一陣佢連入股嘅technical details都聽唔明,盞浪費時間啦!搵個律師幫佢睇吓文件,使得幾多錢吖!」

Felix Cheung個撚樣,早兩個月先入咗件貝沙灣,周圍同人晒緊命;你驚佢唔夠錢俾律師費?!

公司M&A談判嘅最大目的,就係要喺談判桌上,傾一個最合乎股東利益嘅刁返嚟;如今你出錢幫對手請個談判專家嚟搵自己笨柒,我真係唔知邊個係蠢人囉……

「如果佢搵JSM,每次同我哋傾嘢都開兩個律師跟出跟入、幫佢睇埋文件的話,」我繼續好冷靜咁同佢分析。「分分鐘可能一百幾十萬埋單喎。」

Miranda之前都係「孖記」嘅solicitor;佢哋個「價目表」,我點會唔知。

「唔會嘅,佢都係搵個律師仔睇吓文件啫;」我唔知Felix Cheung同Simon落咗啲咩藥,搞到佢咁聽教聽話。「幫佢搵我哋用開嗰幾間其中一間咪得囉!俾盡佢咪十萬八萬囉!就咁話啦!」

十萬八萬唔係錢咩?!十皮嘢慳返佢留返俾你個仔日日數都好吖!你咪等佢早啲領悟吓,十皮嘢可買幾多條春卷囉!

春卷:「關我咩事呀?」

既然佢老人家講到咁,我再出聲的話,就真係買板唔知埞喇。

然後我哋傾埋其他手尾嘢;還好,冇乜鑊氣。

當我哋散會嗰陣,Simon叫住我同Henry:

「Alan、Henry,今個星期五跟我上珠海。」

「上去有乜搞作呀?」我問。

「郭總個friend張總,喺中山有幾間鋪,我想去睇睇。即日來回,冇乜嘢嘅。」Simon答。

即日來回都還好,反正我每日九粒鐘你都埋晒街鐘㗎啦,你話點咪點囉,老細!


午飯時間,殯儀館酒店coffee shop。

我哋四個落咗去北角「殯儀館酒店」食lunch buffet。每個月一次,我哋都會約埋一齊食buffet,提醒自己雖然踎喺柴灣工業區返工,我哋話晒都係上市公司高層。

「邊有人咁做嘢㗎!呢間上市公司嚟㗎!」Andrew仍然憤憤不平。「你估仲係九十年代喺華強北𢱕石仔嗰陣咁一言堂咩!唔使同股東交代呀?」

「所以佢咪請我哋返嚟抿屎囉!」Henry笑笑口咁講。「你張糧單個備註寫住『抿屎金』㗎!」

「妖!人哋仲食緊㗎!」Rachel抗議。「可唔可以唔好咁核凸呀你!」

「佢使鬼同股東交代咩!」我一邊食住雪糕一變講。「街貨歸晒邊,五號仔一分鐘嘅turnover多過佢一年。佢兩公婆同佢幾兄弟又揸住大部份股份,佢喺AGM當眾揈賓周都冇人夠票反對啦!」

呷緊茶嘅Rachel聽到之後,kit一聲笑,我幾乎俾佢啖茶噴中。

「佢當眾揈賓周就冇乜所謂呀!佢夠長先算啦!」Andrew個樣有啲擔心。「最怕佢繼續暗啞底搞呢啲小動作、然後踩晒屎我哋先知,咁就仆街喇……」

「所以我死人都唔喺份年報度落我個名㗎,」我笑住答。「有乜𠵱郁,CFO同FC呢啲有份vet數有份簽名嘅,負責坐監㗎嘛!」

「屌你啦!」Henry好大反應。

「點都好啦,有得閃好閃喇!」Andrew嘆咗口氣。「趁個市唔係太差,搵個好『竇』慢慢坐穩,好過呢邊沉船先嚟you jump I jump呀!」

佢咁講完,我地三個都唔識答佢。

仲未去到呢個地步呀……

(待續)


本故事人物及情節如有雷同,實屬巧合。
CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论