IF

小說、散文,廣東話寫作。長篇小說 《當首爾仍是叫漢城的那些年》系列、《北角演義》、《初雪》、《中環遊戲》作者。 https://medium.com/@herrfung 、 https://t.me/ifpush

北角演義(二十三)

發布於

陪我講 陪我講出我們最後何以生疏

我明白,我呢個要求係好自私,但係……你可唔可以俾多兩年時間我哋?」
「我好同情你哋嘅遭遇同埋處境。我亦都明白,嚴格嚟講,我只係第三者;但係好抱歉,我唔可以答應你。」
「既然係咁,我哋等Alan去決定啦。」
「唔需要。其實,我已經有決定……」

星期二。

今日應該忙到甩轆,因為係傳說中嘅「Xueqin Interview Day」。今日總共有八隻interview,中場仲有Xueqin本人會出席嘅S記corporate citizenship嘅教育event一個。為方便計,今日已經係舉行event嘅Marriott book多咗間細function room嚟做interview。

點解我咁清楚?因為我要單拖sit晒八隻interview!如果呢度係美國,我一定會以「cruel and unusual punishment」嚟JR你班友!

但係點忙都好,我有啲嘢今日一定要搵到個答案。於是,我準時九點就返到公司抄server。

經過琴日Gruoch同Tamora對我嘅敵意,再加上Renee要整死Yvonne嘅決心,我一定要釐清一啲事實,然後connect the dots,知道個戰場有幾大幾闊、遠離危險。

喺server,我睇返兩年前,佢哋簽呢個客嗰陣嘅archive。有兩點吸引咗我嘅注意:一,兩年前,Daehwa肯同我哋簽約,基本上都係Renee嘅功勞;二,Daehwa簽約嘅大前題,係Yvonne唔准掂呢個account,因為Gruoch好憎Yvonne。

如果,Renee嘅「北調」係整死Yvonne嘅其中一步棋的話,咁我幾乎可以肯定,Renee要借嘅「刀」,係Gruoch。因為Renee係Daehwa corp comm嘅account lead,如果佢調走咗,Daehwa嘅account servicing team就要執位。而以而家嘅形勢嚟講,下任Daehwa corp comm嘅account lead就必死無疑。

因為,無論係以「無大將」做藉口將Yvonne扯返落水俾Gruoch魚肉,定係到時要Renee「回朝勤王」,首要嘅條件,就係下任嘅account lead做唔掂;或者再簡單啲,就係冇人敢接呢個燙手山芋,迫Richard一係擺Yvonne落去死,一係留Renee喺香港 — 條件就係Yvonne要走。

無論開邊瓣,Yvonne都可以話係必死無疑。

而呢個下任「宋帝昺」,唔係我就係Winnie;冇第三個答案。因為Daehwa嘅retainer contract列明,account lead必須係senior consultant職級以上。Frankie已經係Product Team嘅account lead,Ophie淨係做S記都已經得返半條人命;Richard根本冇選擇。

睇真啲,Daehwa corp comm account lead呢個位,其實係張電椅。

都好,起碼我知道發生緊乜事。至於Winnie……其實只要我唔出聲的話,以佢兩星期前喺Richard面前搶我白呢種咁aggressive嘅性格,基本上唔使我推,佢自己會去送死。

照咁諗,我暫且安全。


下晝兩點,JW Marriott嘅function room。

我同Dr. Xueqin狼吞虎嚥咁分別「劈」緊兩個club sandwich。狼吞虎嚥唔係因為我哋好肚餓,或者冇table manner;係因為我哋好趕時間,十五分鐘後,佢就要出席喺隔籬房舉行嘅學屆IT問答比賽,做頒獎嘉賓。

「你哋香港人真係好趕時間呀,」Dr. Xueqin笑笑口、一邊食一邊用英文同我傾計。佢雖然係駐北京,但一啲都唔似北京人;又係嘅,人哋係正宗美國華僑。「大學畢業之後,我都未試過咁趕咁食嘢;哈哈!」

「香港係咁㗎喇,」我禮貌咁答佢。「我都知今日個schedule係趕咗啲,唔好意思呀。」當然,我個心就梗係屌緊安排schedule嘅Ophie;邊有人智障到安排interview冇留buffer zone㗎!結果一個遲就個個遲,搞到原本四十五分鐘嘅lunch time得返十五分鐘;說好的新加坡人做嘢好醒呢?

倒完個三文治落肚,我帶Xueqin去頒獎禮現場坐好,然後我就出咗門口個reception位;都係時候到我唞吓喇!

當我企定一陣、飲緊杯水時,Winnie都嚟到。我見佢喺個手袋度拎咗個手提出嚟,然後𠹶一聲,將個市值兩皮幾嘢嘅BV woven袋一嘢掉落地,然後再加一腳,就咁就踢咗落檯底。在場嘅兩個「阿妹」見到佢哋「阿姐」咁型棍,都不禁笑笑口拍手。

「兩皮幾嘢個袋就咁伸腳落去,」我都笑一笑、同佢開個玩笑。「Winnie姐真係視錢財如糞土。」

「係咪好型呢?」佢頑皮咁笑一笑。「我練咗好耐㗎喇!」

其實,呢條女都係有啲傻更更,同平時做嘢個種aggressive硬係唔係好夾。

呢個時候,S記兩位貴客 — Goneril同Regan都施施然到場。我同佢哋打咗個招呼,然後同Goneril講咗句「好耐冇見」 — 我哋大大話話識咗七八年,之前傾偈食tea都唔知幾多次,打個招呼都好應份吖。

「唔。」 Goneril冇望過我一眼,全程抄緊手袋,只係用個鼻應咗我一句。

係喎,差啲唔記得咗,我家陣係賤民身份喎!賤民又點配同呢啲上等人打招呼呢?!上次佢個好下屬Regan咪身體力行咁提醒咗我一次囉!做奴才點可以咁冇記性㗎我!

「我大人hi你賤人就得,你賤人hi我大人就唔得!」

下晝五點。

最後一個CNBC嘅interview,做埋就可以收工。

當我喺function room門口,整理緊俾個記者嘅background info個陣,一把久違但非常熟悉嘅親切聲音叫住我:

「Alan!」

我轉身一望,一張熟悉嘅面孔、one length bob短髮、淺灰色套裝、然後一個親切而甜美嘅笑容。

「諾妍!」我本能反應叫咗佢一聲。

諾妍行埋嚟我前面、同我握手。

「估唔到你都會轉職做公關;」佢古古惑惑咁笑一笑。「我哋當年最有使命感嘅馮大記者,竟然都轉職公關喎!哈哈!」

「搵食啫!」我笑咗一笑。「有使命感」呢句說話真係這麼近、那麼遠。「點解會係你嚟嘅?」

「Roberta今日sick leave呀,我咪幫佢頂囉!」佢好爽朗咁縮一縮膊,然後笑一笑。

「陣間得唔得閒?」我好慣口咁問佢;其實,我冇諗真點解會咁問。

「都仲係咁鍾意喺event之後約人飲嘢食飯,其實你都冇乜點變;」諾妍答我。「好吖,你搞掂呢度啲嘢之後,老地方見啦!」


六點半,老地方,PP Dan Ryan。

「老地方」對唔同人有唔同定義;Colette嘅老地方係Santa Monica漁人碼頭,Chloe嘅老地方係佢阿姨office個天台,Miranda嘅老地方係跑馬地蓮園、Renee嘅老地方係禮鮨、諾妍嘅老地方係PP嘅「掟壞人」。

唯一相同之處,就係呢堆老地方都係同我有關。

諾妍究竟係邊個?或者我咁講:諾妍係當日「贏咗」Chloe嗰個人;遺憾嘅係,當日佢冇「領獎」。幾個月後,我同Chloe正式分手,完成咗我哋呢段「悲劇」嘅使命。

「我哋差唔多成五年冇見喇!」諾妍數一數,然後一臉驚訝。「原來一個咁細嘅圈子,兩個圈中人都可以五年都碰唔到一面喎!」

「冇見咁耐,你好嘛?」佢好懇切咁望住我,一如當年。

「唉……我應該點講好呢……」我嘗試將五年內發生嘅嘢,撮到一句說話講晒。「同你分開咗之後唔夠一年,我結咗婚,然後離婚,然後我離開咗香港一段日子;06年返嚟,兩星期前轉咗呢份工。」

「你同Chloe離咗婚呀?」佢再次一臉驚訝。

「我唔係好知應該點答你……」我好努力咁嘗試組織一下成件事。「唔……我同Chloe最終都分開咗,但係我哋冇離婚,因為都冇官式嘅結婚手續。同我結完再離嘅,係另外一個女人。」

「原來係咁……唉……」佢嘆咗口氣。「我仲以為,我退出,可以成全到你哋兩個,點知……唉……好可惜呀……」

當日,當Chloe知道諾妍係「真命天子」之後,就曾經親自向諾妍「求情」(請嘗試去理解一吓,Chloe要有幾desperate先會咁做),希望諾妍可以俾多兩年時間我同佢。其實,當時我哋兩個都意識到,我哋呢段五年嘅情緣,已經去到盡頭;只不過係我哋唔肯面對現實。

我冇怪過Chloe對諾妍呢個過份嘅要求,諾妍亦都冇怪過佢。不過,我同諾妍嘅分手,就在所難免喇。諾妍嘅離開,令我感到傷痛,亦令我痛定思痛;三個月後,我同Chloe正式分手。亦都係從嗰陣開始,Chloe呢個名,就變咗個忌諱。

「係呢,你呢幾年點呀?」我問諾妍,亦都借機拉開話題。

「我舊年年尾結咗婚喇;」佢望一望我。「原本想派帖俾你㗎,點知你所有聯絡方法都改晒……」

其實我都有聽過佢結婚嘅消息;畢竟,我喺呢行都仲有啲人面,呢啲消息點都會傳返入我耳中。

「恭喜晒!」我笑住同佢講。「第日叫埋你先生出嚟食餐飯吖!當係我補返份賀禮俾你哋。」

「嘻嘻,咁多年嚟,你都係仍然唔識講大話喎!會唔會有少少酸咪咪咁呢?嘻嘻!」佢換咗個好精靈嘅笑容。「你估如果當時我唔係選擇離開的話,我同你而家會點呢?」

「我點知咁多喎,你當年咁多狂蜂浪蝶……」

「淨係我有呀?你咪仲多!又空姐又乜姐……」

「你夠有個『每日一支玫』嘅鬼仔記者啦……」

「呀……唔好講佢啦!好骨痺呀……打晒冷震呀!」

就係咁,我同諾妍有句冇句咁,喺一個熟悉嘅老地方傾咗一個晚上。嗰種既親切、又陌生嘅感覺……我諗,我終於體會到,咩叫「恍如隔世」喇。

成人只寄望收穫 情人只聽見承諾
為何都不大懂得努力珍惜對方
螳螂面對蟋蟀 迴響也如同幻覺
Shall we talk Shall we talk
就算牙關開始打震 別說謊
陪我講 陪我講出我們最後何以生疏
誰怕講 誰會可悲得過孤獨探戈
難得 可以同坐
何以 要忌諱赤裸
如果心聲真有療效
誰怕暴露更多

飯後,我車咗佢返去佢海怡半島嘅屋企。

「隻訪問幾時出街,你到時話返聲俾我知吖!」佢臨落車之前,我同佢講。「等我叫同事錄起俾個客。」

「其實呢,呢隻訪問你要同Roberta follow up喇,」諾妍好輕鬆咁笑咗一笑。「我聽日last day喇!下個月開始,我會轉去『一波』做in-house。」

「呢次就真係恭喜晒喇!」我答佢。「泊咗Credit Suisse呢個咁強橫嘅碼頭,以後記得多多關照喎湯小姐!」

「你人面咁廣,你要多多關照住小妹就真!」開完玩笑,佢稍稍收起笑容。「你公司嗰位Richard Ong……你留意吓佢啦。佢喺呢行,出咗名鍾意炒人;我有個舊同事,兩三年前俾佢高薪挖角,之後唔夠一年就俾佢炒咗,話佢諗嘢太negative喎……講真,邊有記者諗嘢唔negative㗎?請嗰陣又唔見佢咁講!」

其實,就算諾妍唔講,我都心裏有數。坐咗兩個星期,種種跡象經已話我知,呢間公司有啲唔妥……

但係都已經洗濕咗個頭咯,我仲可以點?

(待續)


本故事人物及情節如有雷同,實屬巧合。

喜歡我的文章嗎?
別忘了給點支持與讚賞,讓我知道創作的路上有你陪伴。

《北角演義》全集目錄

1

看不過癮?

一鍵登入,即可加入全球最優質中文創作社區