中環遊戲（Foreplay）

人鬼殊途

中環，又名維多利亞城（Victoria City）。自香港開埠以來，中環都係香港嘅政治經濟中心。如果香港係個獨立嘅國家，中環就毫無疑問係香港嘅首府。

喺我輩親眼睇住香港點樣發展為國際都會嘅七十後眼中，中環，對比起其他香港商業區，的確有其獨特之處。細個嗰陣，好多長輩、特別係銀髮族，都會以「俾啲心機讀書，第日大個仔去中環做經理」嚟勉勵我哋。

久而久之，「中環」同「經理」彷彿成為咗我哋努力嘅目標。雖然，喺今時今日，「經理」喺一大堆 CEO VP SVP ED SAD 之類嘅美式高帽之下，已經成為辦公室嘅低層職稱，連殯儀館 sales 都係經理。但係，中環嘅地位，仍然屹立不倒。進入中環，無論係打工或者營商，都仍然係一個「成功」嘅指標。

最起碼，你要俾得起月租接近二百蚊一呎嘅甲級寫字樓租金，就算唔成功，你廢極都要有個譜 — 須知道，銀紙屬於「第三類危險品」，非常易燃；那怕你坐擁金山，好快就燒晒。

打工仔要晉身中環，你要經過好多嘅歷練 — 可能係良好嘅學業成績，可能係良好嘅工作表現同履歷，可能係良好嘅家庭背景或者投胎技巧；不一而足。據聞，老一輩嘅中環 HR 仍然會睇你之前份工嘅地址，如果係一啲太唔入流嘅地區，你可能連筆試嘅機會都未必有。

至於做生意嘅想進入中環就簡單好多，只要你俾得起錢。咁當然，「俾得起錢」呢四個字所包含嘅元素，就涉及人類幾千年歷史嘅所有知識，有時都仲未必夠。創業者要進入中環，首先就要喺「中環遊戲」中勝出。

「中環遊戲」規則好簡單：弱肉強食，淘汰制。

2008年9月初某早上，布吉島 Holiday Inn Busakorn Villa。（唔寫個島字驚大家以為我上咗深圳布吉）

Blackout curtain 將日光日白嘅房間遮蓋得伸手不見五指，但係 iPhone 3G 因為有新 message 而著機嘅光，劃破房間嘅黑暗。

喺夢中俾 email 嘅貓刮聲嘈醒咗嘅我伸手向床頭櫃上亂摸，指尖接觸到類似電話物體，然後拎上手；螢幕嘅強光令到半開嘅眼再次合上。我強撐起一隻眼，嘗試睇吓，究竟邊個咁唔撚知埞，我放緊大假都晨七咁早嘈醒我……

Hi Alan,

Sorry I am too busy and have problem opening your laptop, so I didn’t send your proposal to GIS.

Regards,

Raymond

首先，laptop 係 turn on 唔係 open，我又唔係叫你幫我拆機，你 O 乜鬼嘢 pen 喎！然後……開部電腦 send 個 file 俾人有幾難呢？俾晒 password 俾晒 token 你都唔識 send？就算你讀屎片，你都起碼學識換片啩？！

放假第三日就嚟個咁震撼嘅「喜訊」，咁我呢個假仲使唔使放？仲有冇心情放？

我坐起身，望一望喺我身邊仍然瞓得好甜未轉便嘅「方麗娟」；然後，我揭開窗簾、打開露台門、爬上露台欄杆、再飛身跳出去。

噗通！

我需要泳池嘅冷水，去清醒一下。

係時候交代返，喺我離開 Soliloquize 之後，究竟發生乜事。

未睇過本篇上集、拙作《北角演義》嘅讀者文友，傳送門喺呢度：

https://matters.news/@herrfung/北角演義-全集目錄-bafyreibvho7xspvsdozqz6kvb6woifkeixv7nie3kpzuo6xadol3dj7ktq

呢輯小說好緊要㗎，聽聞教統局就嚟會納入中文科嘅 syllabus（笑話嚟㗎，費事真係有真心膠去教統局個網到睇過冇棵咁樹，然後返嚟叉輪廚我）。

其實以我哋呢啲年資同位置，要搵份新工真係唔難。離開 Soliloquize、休咗一輪之後，我就掟咗一轉 CV 俾幾間最大嘅 headhunter — 即係咁，當你做到 senior manager 或者 director 呢啲位置嗰陣，冇人會自己 send resume 去搵工㗎喇，呢班人做嘢，有個 class 㗎。就算你真係喺報紙見到份好正好啱自己嘅工，你會點做？

搵 headhunter 幫你包靚份 CV，然後等佢哋搞。佢哋會幫你做好晒所有 paperwork，然後開個貼市嘅靚價，仲約好晒 interview。講真，我好幾年冇睇求職版喇；有咩要收風，打俾個相熟嘅 HR consultant 問咪得囉。好似我哋呢啲位置嘅人，有邊個冇兩三個 headhunter 跟身㗎？爭在會唔會同佢哋打交道咁解啫。

當人人都有秘書有 assistant 嗰陣，你仲要自己聽電話 make appointment，呢啲就係輸在起跑線喇。職場，其實係個 vanity fair；你越高姿態，啲人就越睇你台戲。

果然，冇幾耐就有 headhunter 問我：有冇興趣做國際學校嘅 fundraiser？

就係咁，喺離開公關公司唔夠兩個月，我就成為咗某國際學校嘅 PR and publications manager。原本諗住呢份工可以長做㗎，咁就算第二日結婚生仔，起碼我都已經搵定學位俾個仔。不過，打工嘅嘢，同造愛一樣，唔係你話想做耐啲就可以做耐啲嘅。結果，我喺國際學校，只係逗留咗五個月。

點解走？人事問題囉。入去之前，你好難會明白，點解一間作育英材嘅機構，可以有咁複雜嘅人事同派系鬥爭。

然後，另外一個 headhunter（BTW，好靚女），幫我搵咗另一份工：某大英資公關公司嘅 account director。坦白講，經過 Soliloquize 嘅半年無間地獄生涯之後，我對 agency 真係有啲抗拒。但係唔知因為呢間英資公司嘅 offer 靚得滯、定係個 headhunter 靚得滯，我竟然又傻到去見工，佢哋又竟然傻到請咗我。於是，我又再次返入去公關地獄……

話說地獄係有好多種嘅，上刀山、落油鑊、勾脷筋等等。我今次呢個無間地獄嘅苦劫，叫「倒轉金字塔」。

同巴黎鐵塔反轉再反轉無關嘅，不過呢間嘢嘅 hierarchy 就好有問題。是咁的，呢間其實係大行，但係香港個 operation 就好細，連埋秘書，全公司得九個人。

冇錯，公關公司唔係靠人多去賺錢嘅（黑社會咩）。事實上，呢間公司基本上唔搞 event 嘅 — 就算搞，都只不過會搞小型嘅招待會之類嘅嘢。總之，你唔會見到二卅人落場砌嘅大型 event。公司賺錢，主要靠高層次嘅嘢，例如：corporate messaging、branding、strategic development 之類；然後就係我嘅強項：media relations。

點賺錢其實唔係問題，問題係：九個人當中，連埋我，總共有六個 director 級以上嘅人。即係話，唔計秘書，真正會處理執行工作嘅人，得兩個；一個 AM、一個AE。

聖經故事就話五餅二魚可以夠幾千人食，喺現實生活中，公關公司裏面呢六條粉餅，就要為爭呢兩條死魚，差啲大打出手。六個 SVP/director，兩個本地人四個鬼佬/婆。PR firm 係一個弱肉強食嘅世界，要講呢間公司嘅故事，就先要講一吓條食物鏈。

喺食物鏈嘅最高層，係一個叫 Owen 嘅新西蘭鬼，佢係公司嘅 Regional SVP，基本上睇晒成個 APAC。由於佢嘅超然地位，香港嘅 operation 基本上唔關佢事。但亦都由於佢嘅超然地位，所以每件事都要佢老人家「過一過目」。佢係名副其實嘅影子老細。

喺 Owen 之下，就係 Jerome — 另外一隻新西蘭鬼，佢係公司嘅大中華區 SVP；Jerome 同 Owen 正正就係鬼佬版嘅「既生瑜、何生亮」。Jerome 喺香港 office 嘅老臣子，前朝餘孽。原本 APAC SVP 呢個位應該係佢嘅，可惜半路殺出個程咬金 Owen，年資短過佢、上位快過佢。所以，佢哋兩個基本上係口和心不和。Jerome 直接參與香港 office 嘅運作，但佢唔係真正嘅「香港揸fit人」。

真正嘅香港揸 fit 人，係 Sebastian，再一隻新西蘭鬼（香港公關圈，其實係新西蘭鬼嘅天下；呢個國家好多遊魂野鬼客死異鄉），佢係香港嘅 GM。Sebastian 之前係新西蘭財政部嘅新聞官，嚟香港做嘢純粹為錢。表面上，香港 office 係佢揸 fit。但當你睇完上面呢兩段之後，稍有 office politics 經驗嘅人都會知，揸 fit 就冇佢份㗎喇，揸𨋢就差唔多。

Angelica 係我嘅直屬阿姐，香港 SAD（Senior Account Director；唔慌唔 SAD）。來自荷蘭嘅 Angelica 係個好有歐陸風情嘅女人 — 我意思係，佢好似歐洲啲 OL 咁，一個星期只返四日，星期五係例假，佢要湊女。Angelica 喺我哋公司同客戶圈子裏面，最出名嘅一樣嘢，就係佢買名牌老翻買到開晒巷。而佢亦毫不吝嗇咁同我哋甚至客人分享，究竟羅湖城邊檔老翻袋性價比最高。

同我同級嘅另一個 AD，叫 Vienne，一個接近二百磅嘅 200% figure 女性（夠政治正確嘛？）。亦都由於佢咁 full figure，我一直都唔知道，原來佢有咗。佢喺我返工第二日就開始放產假，去澳洲生仔，到而家都未返。但係佢搖控住公司嘅唯一AM Paula，隔住幾千公里同我哋玩緊 office politics。

好喇，介紹完畢。我哋再嚟一條物理（力學）常識題：

一間公司，兩條鬼唔屬於呢個 office、一條係 GM、另一條個個星期 long weekend、一個 AD去咗生仔；咁究竟邊個頂緊大、負責日常 account servicing 運作？

冇錯，係我。

上至寫 plan、湊客、睇 budget、media pitching、下至 clipping、寫 synopsis、寫 report，全 — 部 — 都 — 係 — 我。寫完整完，再俾神檯上面嘅列位仙人「過目」。由於 Owen 同 Jerome 嘅鬥爭，我嘅 PR plan 好多時都係佢地暗啞底開拖嘅戰場。一個改完 ABC，另一個又話 DEF 好啲。改來改去，一個 plan 玩兩三個禮拜閒閒哋，玩一頭半個月都唔算新聞。

但係鬼佬行嘅嘢，究竟有冇人做嘢、賺唔賺到錢，其實真係冇乜人理。反正公司財來自有方，有幾個 global brand 嘅香港 operation，因為總部嘅 contract，一定要幫襯我哋。所以，呢班鬼有足夠本錢去不務正業、天天返半晝（呢句要用古天樂式國語講，明就明）。

我都話，喺公關圈子裏面，做鬼永遠好過做人㗎啦。

但係最近呢個月，形勢有啲唔同。話說 press secretary 出身嘅 Sebastian 好希望香港 office 可以做一啲政府 project 嚟「省招牌」，於是點咗我去 GIS 聽 briefing，然後入 tender bid 政府 project。

喺香港嘅公關圈子，呢類政府嘢，一直都係 Golin Harris 同 Burson-Marsteller 呢類鬼佬行嘅天下，人哋甚至有專人去招呼呢啲 bid。我哋要搶，其實都唔易。出入咗幾轉美利大廈 10 樓之後，我哋睇中一個青少年發展項目嘅 project，度咗一堆橋、寫咗個幾靚嘅 proposal 準備入 tender。

萬事俱備，入 bid 嘅日子就係琴日。因為我放大假嘅關係，所以，我就將最後嘅步驟（即係 print 出嚟然後去 GIS 打卡鐘入 tender）交俾我唯一嘅 AE Raymond。講真，手板眼見功夫，一隻受過訓練嘅猩猩都勝任有餘。偏偏我呢個傳理系畢業嘅高材生，竟然連我部 laptop 都「open」唔掂，白白錯過咗成件事。

社團有責任制，細佬有事，大佬要攬上身；公關公司都係。雖然，我一億個唔想攬呢條契弟，因為，我連佢係人係鬼都唔知 — 事實上，佢同 Vienne Paula 行得好埋，呢鑊嘢係意外定人為都未知之數。

不過點都好，其實我都做到有啲厭。借啲倚同班鬼佬開個拖，四四六六掂就掂，唔掂就起身，其實都唔係壞事；反正，喺呢間嘢做 AD 同做 AC 都冇乜分別。我真係咁鍾意落手落腳做、又真係咁做得的話，點解唔自己做，要做埋搵埋俾你班死鬼頭使？

講就咁講，喺香港八年，我真係冇諗過要創業 — 話咁易咩？！我老友 Christine 都捱到得返半條人命啦！就算要起身，都係搵過第二份工啫。

（待續）