IF
IF

此 Matters 帳戶已停用,請勿加入。如有興趣閱讀我的文章,請前往: https://www.patreon.com/herrfung Medium 累積超過一百萬 claps 嘅廣東話作者。小說 《當首爾仍是叫漢城的那些年》系列、《北角演義》、《初雪》、《中環遊戲》作者。

中環遊戲(44)

天下第一武道會

唉,又要飛喇……

如果長途飛行係種酷刑的話,咁香港飛美國呢程 long-haul 就絕對係凌遲。好命嘅十二三個鐘(西岸),唔好命嘅十六七個鐘(東岸);我成日覺得,喺機場賣痔瘡膏,其實係好有得做嘅生意,Anusol 應該開專門店。

作為公關咁耐日子,我知道客人都係風吹皇帝褲浪(即係孤鳩寒)嘅人,冇致命嘅必要,佢哋唔會隨便叫公關出 trip  — 走一轉美國一個星期,機票連食宿,三皮嘢冇走雞,仲未計篤鐘錢。一個星期嘅費用,夠佢哋請個 fulltime PR Manager 一個月、或者一個月嘅 retainer fee。所以,除非係一啲十萬火急嘅公關災難,否則客人甚少會叫公關出 trip。

所以,大家都可以想像到,我個腦諗緊乜:點解無啦啦咁緊張,要我呢個冇份負責 CES project 嘅公關都蒲頭呢?

另一方面,當我知道,Cindy 會同我一齊去 Vegas 之後,唔知點解,我好似對呢件事有啲期望咁……作為一個負責任嘅成年人,我當然會提醒自己「有婦之夫」呢個身份,而我亦都對佢唔會有乜嘢非份之想;但係……總之就有種揮之不去嘅古怪期望……

於是,差唔多整個十二月,都係喺呢種古怪氣氛之下度過。


十二月仍然係上旬,本座 office。

公司高層會議,即係我兩公婆傾嘢。

雖然話十二月,公司忙緊幫貴客們搞 party,但忙還忙,都仍然要搵時間返吓嚟 office 坐吓,順便傾吓嘢。

「新年啱啱過、一月二日你就飛……」Winnie 詐型,其實呢個 moment 佢係老婆、唔係我嘅 AD 或者 GM。「又剩低我一個……」

「咁都冇計㗎,貴客叫到唔通話唔去咩……」我安慰佢。「最多我幫你買 A&F 啦,Vegas 有專門店,嗰邊啲款白沙道啲樓上鋪冇㗎!」

「你就疏乎啦,有個靚韓妹專登飛過嚟陪你搭飛機!」Winnie 嘟嘴。「你都仲未話俾我聽,究竟 Cindy 係唔係你個韓國 ex?!」

「梗係唔係啦!」唔好猶豫,稍有猶豫會死得好慘烈。「佢係我喺韓國嘅老朋友、好朋友,唔係女朋友。佢飛過嚟都係搵個伴陪佢飛啫。更何況,打埋算盤佢都算係我哋個客。其實,佢過到嚟,我哋都會陪佢食飯去吓街,唔信到時你自己問佢囉……」

「呀!係呢,」我趁佢反應慢咗半秒,即刻搵位轉話題。「你知唔知 Jessica 同 Charlotte 啲嘢呀?」

「Jessica 唔 likey Charlotte 嘛,我知啦;」佢答我。「Charlotte 同我講過,Jessica 聽佢 briefing 反佢眼吖嘛……」

「呢單我又未聽過喎……」我笑一笑。「Anyway,我唔認為我哋應該插手,你同意嘛?」

「同意,等佢哋自己私片陣先啦!」Winnie 縮一縮膊。「不過講到尾,Charlotte 都係資深啲嘅一個,我覺得 Jessica 應該聽吓人講,唔好起晒弶對人囉……」

我冇答 Winnie,但我心裏面覺得,呢行嘅嘢,有時候又唔係年資大晒嘅。要講年資,Winnie 都長過我呢個半途出家嘅 PR 好多,但呢間公司都係我揸𨋢啦……

點都好,總之一日未打交,一日我都話之佢哋。


十二月中某工作日,Daehwa 香港總部。

上得嚟呢度,當然又係開會啦。我有計過,其實我每個星期嘅工作時數,有一半或以上,係用黎招呼 Daehwa 嘅。每個星期我對住 Patricia 嘅時間,應該同對住 Winnie 嘅時間差唔多(唔計瞓咗個幾粒鐘)。如果萬事都有得篤鐘的話,我諗我好快就可以上岸。

還好 Patricia 都算靚女一名,就算見咁多,都算係視覺享受。如果佢係李慧琼或者梁美芬咁嘅西樣,我諗我會用電話會議代之,免得嘥錢買藥水洗眼。

係喎,除咗 Cindy,呢個靚女都會陪我一齊去 Vegas 㗎喎!有時候,我都係個有啲艷福嘅人嚟嘅……嘻嘻。

「其實我同你呢次最主要嘅任務呢,就係陪住幾個香港記者去 CES;」Patricia 當然唔知我呢啲咁複雜嘅思緒,佢繼續講緊我哋個 task。「入到會場,行完 Daehwa 個 booth,佢哋就可以自由活動。當然,最理想嘅,就係可以同佢哋食餐晚飯、聯絡吓感情。你知啦,喺香港除咗 media day,好難有機會同啲記者打好關係。今次去到 Vegas 咁遠,大家都人生路不熟,反而有機會去做呢啲嘢。」

「呢層問題唔大,我呢兩日都同其中幾個傾過吓,」我答 Patricia。「其實成班都係孤兒仔、大部分都未來去過賭城、未去過 CES,所以都好需要我哋嘅照顧。食飯當然唔係問題,同佢哋講好晒,你記住帶錢就得。」

「總之錢就唔成問題啦,」佢一副 I don’t care 嘅模樣。「我有公司卡,你哋食得幾多吖講真!我嘅主要任務係同佢哋打好關係,飲飲食食唔係問題,佢哋肯食我嘅,我仲求之不得𠻹!」

Patricia 同一般嘅 in-house 最唔同嘅地方,就係佢從來唔會幫公司慳錢,總之應使得使、唔會就住。都唔知點解,好多 in-house 當咗公司錢係佢自己錢一樣,慳得就慳、唔慳得都照慳,好似使多個崩都會食窮佢咁。講真,公司錢啫,又唔係你啲姑婆本,budget 又唔係窄得咁交關,慳咗都冇你份㗎喎!

「咁就一於餐餐和牛漢堡喇!」我玩佢。「去 BLT 食和牛,都係每位六七十蚊美金啫,Pat 姐咁豪,唔志在啦係咪?!」

「唓,你唔怕食滯咪食到夠囉,反正又唔係我啲錢;」佢講得好輕鬆。「不過,唔好齋食鬼佬嘢,到時你幫我 locate 一兩間似人樣嘅中菜吖!日日食薯仔,食到口都寡埋……」講完佢擰一擰頭。

「冇問題啦,Pat 姐出到聲,你話點咪點囉!」我笑笑口答佢。「搵唔到靚中菜,我煮俾你食又點話!」

「你係至好講!到時冇得食,我真係要你煮十幾人份嘅中菜㗎!」佢都笑笑口回應。

「十幾人……係呢,講開又講,」我懶 casual 咁講。職場語言法則:講開又講通常先係主要想講嘅嘢。「有冇收到風,年年都有 CES,點解今次咁大陣象、咁多大代表都飛晒過去呀?」

「風就梗係有收啦!」佢突然好有興致。「呢次大鑊嘢喎,仲精彩過三國演義呀!」

「咁呀,咁我去 pantry 㩒杯咖啡同 snack 先繼續聽故得唔得?」我問佢,佢笑笑口點頭。

五分鐘後,我捧住兩杯啡同 snack 返去會議室。

「唔該晒!」Patricia 一邊攪緊杯啡、一邊開始講故。「其實你都應該聽過吓,我哋公司個 hierarchy 同升遷制度㗎啦,係咪?你咁熟韓國嘢,應該實知啦。」我點頭。

「咁話說,我哋 APAC 有個常務(董事)明年年中退休。佢退咗,咁當然要搵繼任人啦;」佢繼續講。「我聽 Alfred 講,通常呢啲退休嘅人事變動,因為唔係突發、HR 一早知道某人某年會到退休年齡,所以都會物色好接任人,喺公佈常務退休嗰陣就會同時公佈埋。偏偏今次,總公司冇公佈繼任人選之餘,仲放聲氣話會喺 APAC 裏面嘅地區揸 fit 人當中提升;」

韓國公司嘅辦公室政治嘅凶險程度,同香港不遑多讓、甚至比香港更凶險,呢個就係活生生嘅實例 — 掉舊肥豬肉出嚟,乜都唔講、淨係話你聽打贏有得食。於是你班友仔就好似《大屠殺》咁、打個天昏地暗、甚至分門分派群毆;真正高高在上嘅,就等你哋自己整頓自己。到你真係爭贏咗舊肉,都五癆七傷、任由你嘅飼主擺佈……

「咁你都知,韓國公司嘅階級制,就算去到好似阿崔呢啲揸 fit 人,其實都只不過係韓國總公司嘅『部長級』,頂盡都係『本部長級』(按:即係 AGM 或等同職級);」Patricia 繼續講故;btw,佢講故個樣好多表情、幾可愛。「雖然話同『常務』只係差一級,但地位就天同地,冇得比。Executive Director 呢兩個字喺 Daehwa,同位列仙班冇乜分別。所以,好多地區揸 fit 人都𥄫實呢個位、蠢蠢欲動。」

「咁關 CES 咩事喎!?」我好直接咁隨口答佢。

「梗係關啦,你聽埋故先駁故啦!」佢啤一啤我。「其實呢班區頭自己知自己事,真正嘅 contender,就係大中華區嘅三個人:香港嘅阿崔、台灣嘅阿都、同埋中國嘅阿申;其他人嘅機會真係十分渺茫、黑馬並唔存在。咁啱今年嘅 CES,呢三個揸 fit 人都係顧問團嘅主要成員;於是,戰場就無啦啦伸延咗去美國。」

「咩顧問團呀?」我真心問。

「你前度女友冇同你解釋過咩?每年 CES 嘅展出,總公司都會有個顧問團去負責策劃同執行;」Patricia 解釋。「呢個顧問團話就話負責埋執行,但實質 operational 嘅嘢,都係由總公司嘅人負責,所以顧問團都係屬於掟橋性質,唔使落手落腳。咁啱咁橋,今年嘅顧問團當中,我老細阿崔負責 VR、阿都負責智能駕駛概念、阿申負責未來家庭影院。於是 CES 就變咗三個揸 fit 人較量嘅擂台,個個都想喺呢個展覽度攞分。」

哦,原來係打擂台,唔怪得之阿崔咁緊張,連我呢個唔係好關事嘅都扯埋出嚟;吹大雞、leave no stone unturned 咁話喇。

「我都話佢唔係我前度女友咯……」我抗議。「你班嘢好心就積吓口德啦……」

「唏,扮咩吖!成個 Daehwa 香港都講緊你同嗰位 Cindy Kim 嘅羅曼史啦!」佢笑得仲開心過睇緊周星馳。「喂,我發覺我真係冇泊錯你碼頭喎!嗰位金小姐來頭咁勁,又係你前度;阿崔阿都又同你 friend 到摸晒酒杯底,是但邊個坐正常務,PR and Marketing 嗰邊都係你嘅世界啦!到時記得射住小妹喎 Alan 哥!」

俾呢班賤人把口講過,我同 Cindy 都唔慌有好嘢。不過,現階段我亦都冇諗住做啲乜去澄清 — 一來冇乜嘢好澄清,二來呢啲嘢通常越澄越黑,三來……其實我唔係太介意呢班 cheap 精講我同 Cindy 嘅「緋聞」,反正如果可以因為 Cindy 同佢老公嘅地位、令到呢班友對我有所收斂、唔使好似喺 Soliloquize 咁做 account servicing 兼做埋契弟的話,呢啲閒言閒語,我都仲可以忍吓。

狐假虎威一直都係商場最好用嘅手段,只要唔好傳返入我老婆同 Cindy 隻耳就得喇。


聖誕前夕最後幾個工作日嘅其中一日(問你死未),office。

呀!!!!!!!!

慘叫嘅係我,唔係因為 holiday mood 太重或者太多嘢做,係我終於有機會睇一睇領事館幫我同 Cindy 訂機票嘅 itinerary,然後俾佢嚇到春袋都跌埋落地……

我明明係去拉斯維加斯,喺香港飛 LAX(13 hrs)、然後 LAX 飛 LAS(1 hr),兩程加埋轉機(1 hr),俾晒你咪十五個鐘囉;就算飛 Dallas 再轉機,都係講緊十七個鐘啫。點解我程機,會係香港飛紐瓦克(紐約)、然後再飛返去近西岸嘅 LAS?十六個鐘再加六個鐘,未計轉機都足足廿二個鐘,我俾埋條命你好唔好!

「唔好意思呀馮先生,」美國領事館嘅職員喺電話同我耍冧。「因為我哋嘅 airline partner 係 Continental Airlines,所有機票都要由佢哋出,而 Continental 由香港出發,就只係有飛美東嘅航線,所以你一定要喺 New York 或者 DC 轉機……」

呢次捉蟲喇……

廿二個鐘、一萬六千幾公里航程。我同 Cindy 唔慌唔相依為命喇……

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论