中環遊戲（36）

搏擊會

點解我咁恨做 Daehwa 嘅生意呢？

我可以鳩吹到天花龍鳳、擺一大堆數據、marketing 術語同埋行內名人 quotation 嚟坤你兩千字，去解釋呢樣嘢。但其實，歸根究底，係因為我想向曾經係奚落我嘅 Richard Ong 報仇；賺唔賺錢，都已經係其次。

除此之外，我對呢間韓國企業，其實斗零興趣都冇。我識嗰班 Daehwa product manager，正宗係國際機場公廁 — 乜撚都有、乜西到有，但就搵唔到一條正正常常嘅圓柱體、同埋有角形狀以外嘅西。

坦白講，香港地周圍都有錢賺，冇乜特別需求的話，免得過我都唔想賺 Daehwa 嘅皮肉錢，因為賺咗到補唔返嘔出嚟嘅血。

既然報仇係整件事嘅主軸，站在「睇人仆街最開心」嘅角度嚟睇件事，有乜嘢好得過，可以親眼睇住你個仇人喺你面前仆街？

呢個就係 Patricia 送俾我嘅「見面禮」 — 親眼睇住 Richard 喺我哋面前「摜低」。

最毒婦人心就係咁解喇。記住，無論喺乜嘢場合，寧得罪小人、莫得罪女人。

十月下旬某日，灣仔。

還記得當年第一次聽 Wyman 填嘅《你沒有好結果》嗰陣，心裏面嘅第一個感覺係：唓，搵嘢嚟講！邊度會有人咁得閒、咁樣去憎恨一個人喎！有咁多時間去憎一個人，不如用呢份狠勁去做啲正經嘢好過喇，多 Q 餘！

好明顯，當年嘅我，只係個入世未深、唔識嘢嘅竹升死𡃁仔。因緣際會，我終於親身見識到呢種恨。後來嘅日子，起碼有兩三個女人、好似首歌所寫咁憎我……

無論有幾恨都好，一樣嘢係肯定嘅：沒有無原無故嘅恨。就好似我身邊嘅 Patricia 咁，自從幾日前，我同佢分析、覺得 Richard Ong 有份參與想整瓜佢嘅流產「政變」之後，佢對 Richard 嘅恨，就每日不斷咁「昇華」 — 由唔係好嬲、一日嬲過一日、漸漸變成要凌遲佢、慢慢折磨佢嘅恨……

為咗發洩佢心頭之恨，Patricia 約咗一個 handover 嘅 meeting，我哋兩個一齊殺上 Soliloquize「開會」、順便折磨吓對手。於是，一個工作會議，隨時有可能變成 Fight Club……

The first rule of Fight Club is: You do not talk about Fight Club. 所以，呢個仍然係「handover 會議」。

又一次證明，邱吉爾的確係個偉大嘅領袖。佢引納粹去打蘇俄嘅策略，咁多年後仍然好使好用。

我係咪專登引 Patricia 去開 Richard 拖？老實講，我仲未有咁叻；雖然我亦都唔介意為呢個「意外驚喜」去煽吓風點吓火……

「你真係肯定，你要咁玩？」雖然睇人 PK 最開心，但恨還恨，我個心仍然唔係好踏實，係咪真係要踩到上心口。「玩大咗，返唔到轉頭㗎喎……」

「驚呀？驚咪走先囉……」佢答我。冇錯，我同佢已經熟到可以開玩笑嘅程度。「不過走咗就冇仇報㗎喇！」

「超！我使驚？！」我好輕挑咁答佢。

十分鐘後，我哋上到 Soliloquize 嘅 office，喺會議室坐低咗等 Richard。

「乜 Soliloquize 唔係喺太古坊咩？點解灣仔嘅？」我聽到有讀者文友問。

是咁的，喺 Winnie 走咗之後（或由佢走之前開始），Soliloquize 經歷咗一次「大地震」、八成以上員工起身走人。自此之後，唔知 Richard 想慳 cost定點，就搬咗落灣仔某丙級商廈（其實係商住兩用，舊區最多呢啲單幢樓）。

「作為你個 PR agency，我有義務要提吓你，」我細聲但慎重咁同 Patricia 講。「玩還玩，唔好玩得咁串，日後你哋仲要合作嘅；ok？」

「使乜驚唧，我有你吖嘛；」佢轉咗個好嗲嘅玩嘢 tone。「我玩串咗個 party，你咪幫我孭鑊囉！我哋嘅合作協議係咁㗎嘛！」

「……上錯賊船……」我作勢想走。「可唔可以當我哋冇見過？我走先……」

「太遲喇，」佢笑笑口望住我。「你阿媽冇教你咩？越靚嘅女人就越會呃人。上咗船先後悔，太遲喇……」

當我哋開緊玩笑之際，receptionist 推開會議室大門，Richard 到。

「Patricia、Alan，好耐冇見！」佢逐一同我哋握手。「估唔到我哋三個有機會合作！」

「新 office 幾好喎！」我同佢握手時笑笑口咁講。「旺中帶靜，唔錯吖！唔喺商業區、喺正住宅區，食 lunch 都方便啲啦！呢啲地方縮皮一流！太古坊嗰啲甲級商廈太貴喇，好難為皮嘅！」

「係呀，呢度真係唔錯㗎！附近仲有好多嘢食𠻹！」佢笑笑口答返我。呢條友認衰仔嘅能力，的確一流，俾我串完都仍然不動聲色，唔到我唔服。

坐好之後，我哋開始傾正經嘢。

「今次呢個會嘅目的呢……」Patricia 撚起把正經聲、啱啱開始開場白之際，突然定咗格、講講吓停咗落嚟。

良久，佢輕輕嘆咗口氣、再輕輕同自己講咗句「算吧啦」；然後，佢繼續開場白：「我唔想再扮嘢喇。今次我上嚟嘅目的，就係想話你知，你嘅企圖已經失敗，我死唔去。作為你落錯注嘅懲罰，你將會失去獨家公關代理權，同埋損失 Daehwa 香港嘅一半生意。」

我唔係好相信自己對耳聽到嘅嘢，我相信 Richard 亦都一樣。如果唔係礙於呢度都叫做公眾場合，而我哋亦都係有社會經驗嘅成年人，我唔會介意暫時扮一扮梵高《The Scream》嘅 😱 表情。

Patricia 係個好斯文嘅女人，我同佢呢段時間一日傾幾轉電話，從來都冇聽過佢講粗口、連大聲啲喝人我都未聽過。但估唔到，佢一開口，唔使大聲唔使粗口都可以咁 powerful……

「Wow! Patricia, relax!」Richard 試圖用佢嘅老套路嚟冷卻呢個熾熱嘅場面。「代理權嘅事，我哋之前喺電話已經傾過。但我真係唔係好清楚你講緊嘅嘢。會唔會你係俾人誤導，先會諗埋一邊？」

「咦？呢句係咪關我事㗎？」我明知顧問，就係想佢有咁尷尬得咁尷尬。「係咪我誤導你呀 Patricia？」

「咁我又冇指明係你……」Richard 擺出佢一貫皮笑肉不笑嘅笑容。當佢正想繼續詭辯落去之際，Patricia 係褸袋攞咗啲嘢出嚟，「啪」一聲擺咗喺檯面。

係張 SD card。

「唔關你事？咁即係我怪錯你啦？」佢冷冷咁講。「既然係咁，不如我哋一齊聽吓啲電話錄音，睇吓係咪你把聲？如果唔係，我向你道歉囉！」

「咁又唔使去到咁盡嘅……」Richard 竟然喺呢個 critical moment 𢯎底；睇嚟真相大白、我冇估錯。「咁你而家想點吖？」

「正如我剛才所講，我會將 Daehwa 香港嘅一半 PR and Marketing events，交俾 Alan 嘅 Infinity Communications 去負責；」Patricia 收返將 SD card，然後講出佢嘅計劃。「呢份清單就係我心目中嘅 planning，你睇吓有冇問題。」

Richard 攞起份清單細心閱讀，我亦都望一望我手上嗰份一模一樣嘅 copy，大致上同我之前見過嘅差唔多。

「Patricia，你諗清楚未呢？」Richard 再一次撚出佢嘅招牌笑容，老實講，喺呢個環境下，呢個笑容只會令人更討厭佢。「Alan 雖然係呢行裏面好出色嘅人才，但係作為一間 agency 嘅老闆，佢仲係太新，未必可以擔得起咁大支旗……」

「屌！關你叉事咩！就算係擔都唔係擔你嗰支啦！」大家放心，呢句係心諗嘅啫，我更冇品都唔敢喺呢個場合爆粗。

「多謝關心喎！」我學佢皮笑肉不笑咁答佢。「不過，關你乜事呢？」

「係囉，呢啲係我哋同 Alan 之間嘅事，」Patricia 亦都冷冷咁附和一句。「佢做得掂與否，都係我同佢之間嘅事。你唔需要太過操心。」

Richard 乾笑兩聲，然後發現我同 Patricia 都冇理佢，有啲冇癮；於是繼續睇文件。

接住落嚟嘅時間，大家圍繞住某啲 project 單打咗一兩句，嚴格嚟講都唔算交鋒，因為 Patricia 食到 Richard 死死實實，佢冇乜位去運作佢嘅語言偽術。

去到接近尾聲嗰陣，Richard 發現咗啲嘢。

「Patricia，呢個螢光筆 highlight 咗嘅 project，代表啲乜？」佢問 Patricia。

「我就係等緊你問我。」Patricia 拎住份文件答佢。「呢個下星期五嘅 press conf，我想你交俾 Alan 接手做埋佢。」

佢呢一嘢，再一次令我同 Richard 再次 O 晒嘴。做做吓嘅 event 俾人中途接手，又唔係因為發生咩鑊氣嘢，咁即係擺明落 Richard 面……

「咁……咁好似唔係幾好喎……」Richard 開始有啲怯。「我哋做好咗嘅嘢，又點計呢？」

「Retainer 唔包 event、但包埋嗰啲 paperwork 㗎嘛，唔係嘅咩？」Patricia 望一望我，我點頭，佢繼續講。「你手頭上做好嘅嘢，交晒俾 Alan 就得，佢會接手。你叫你啲同事通知台燈聲 vendor 就得啦！來來去去都係嗰班人啫，係咪？轉個 contact point 冇難度啦。所以，我唔希望到時有啲咩交接出現問題嘅嘢，傳返入我隻耳度。」

最後幾句，Patricia 講得幾重語氣。Richard 原本應該仲諗住據理力爭，聽完呢幾句說話之後，就好似個洩咗氣嘅汽球咁，冇再駁落去，只係唯唯諾諾。

傾埋啲細節之後，會議結束，Richard 送我同 Patricia 出去搭𨋢 — 佢另外一個值得我學習嘅地方，就係風度。老實講，今日呢鑊嘢如果發生喺我身上，我唔敢擔保我唔會拍檯走。

𨋢到，當我想入𨋢之際，Richard 同 Patricia 講：「唔好意思 Patricia，我仲想同 Alan 講兩句，介唔介意落樓先？」

「咁我喺頭先經過間茶餐廳等你。」Patricia 冇正面答佢，只係同我講。

關𨋢門之後，Richard 劈頭第一句就問我：「你以為咁樣就係報仇？你以為咁樣就可以趕絕我？Daehwa account 係我公司嘅一小部分咋。」

睇嚟，我讚得佢太早，原來佢台戲都係做唔到全套。

「如果你真係唔緊嘅，你留住我嚟講呢幾句為乜？」我輕描淡寫咁答佢。「攞尾彩呀？」

「你以為咁就叫做生意？公關公司唔係咁 run 㗎！你完全都唔知自己做緊乜。」佢情緒有啲激動。「未學行先學走，連基本根基都未打好就學人充大個頭做老細，因住上得快、跌得慘呀！」

「其實，我一直都十五十六，究竟咁樣噬你一嘢，會唔會真係對你構成任何傷害……」我笑笑口同佢講。「多謝你呢幾句說話，而家我好肯定，我咬中要害！多謝你嘅 confirmation。」

「哈！你太睇小我喇！」佢亦都笑咗一笑。「你連皮毛都傷唔到我呀……」

「係？」我答佢。「如果係咁，我唯有繼續努力，唔好令你失望。S 記、JBC、Naptune、NBC……放心，我唔會一次過，我會逐個逐個 approach。做唔到生意唔緊要，只要一拍兩散就夠。再唔係，我收你一半價錢去 quote 你啲客又得。唔啱試吓每個 Soliloquize 嘅客，我都送個免費 event……」

「你咁即係求氣唔係求財啫！」佢仍然幾激動吓。

「傻啦，邊個得閒同你求氣喎！」佢越係激動，我就越和顏悅色。「我都係學你當年喺 WS 帶客又帶人走、然後自立門戶啫！乜你兩年前郁我嗰陣、幾個月前約我出嚟想睇我求你嗰陣，冇諗過會有呢一日嘅咩？」

講完呢句之後，𨋢到。我冇等佢俾反應，就入𨋢走咗。

落到去茶記，Patricia 已經喺度啜緊凍 OT。

「傾完喇？叫嘢飲吖！呢餐點都係你㗎喇，唔使同自己客氣。」佢笑笑口望住我。「點呀，係咪條氣順晒呢？」

「順！一定順。」我答佢。「我估唔到，你玩到咁大啫……」

「Alan，喺呢件事之前，你可能唔認識我，」佢轉咗個認真樣。「我係嗰啲冇乜大志、人不犯我、我不犯人嘅小女人，但唔等於我係個俾人恰唔識還手嘅傻婆。Richard Ong 同我，只不過交手短短時間，佢就諗住喺背後插我一刀，呢啖氣如果我啃得落，咁我以後仲點食住佢哋？」我點頭。

「係呢，」我突然醒起啲嘢。「你真係錄咗佢哋音？你早啲同我講嘛，咁我就唔使兜咁大個圈囉……」

「張 SD card？」佢喺袋拎咗張卡出嚟。「我今朝喺公司部 event DC 度掹出嚟嘅，都未嚟得切 format 咗佢，可能仲有 event 相喺裏面……」

「你大佢㗎咋？」我覺得有啲不可思議。

「梗係！」佢露出個好頑皮嘅表情。「你估真係話錄音就錄音咩，我又唔係韓國高層。嚇吓佢之嘛，點知佢咁鬼易嚇喎！呢次冇冤枉佢啦！」

「咁……」我仍然未諗得通晒成件事。「如果佢頭先話：好呀，播嚟聽吓吖！咁你點收科呀？」

「唓，咪照搵部腦出嚟播，然後扮攞錯卡囉！」佢若無其事咁答我。「我係客佢係 agency，你慌佢敢串我為難我呀？！我最多咪自己執生、然後搵過第二樣嘢發佢脾氣囉！」

我眼前嘅 Patricia 係咪冇乜大志嘅小女人，我唔知。不過，呢個「小女人」，全名應該係「小心女人」……