中環遊戲（33）

台北晚9朝5

唔好以為呢篇唔再係「和你飛」就代表我甩難，其實我都仍然要飛……

話就話怕飛，但我嘅飛行次數紀錄，可能係朋友圈中最多嘅一個。自六歲開始，每年最少出門兩次。去美國讀書後，直頭飛到九彩，一有稍為長嘅假期，唔係飛香港就飛波士頓，再唔係就溫哥華。如果速度真係可以扭曲時間的話，我嘅卅六年，比一個正常人嘅卅六年，肯定多幾秒。

同都先生嘅一席話之後，我想成為 Daehwa 香港嘅 PR agency，經已唔再係煲吓冇米粥咁簡單。為咗令呢件事十拿九穩，我決定再次打我嘅「人情牌」。今次人情牌嘅對象，係 Cindy — Chloe 自小學開始、一直到大學嘅同學、好姊妹兼競爭對手、frienemy。

根據 Chloe 嘅形容，Cindy 係個有機心、有野心嘅女仔；美麗嘅外表背後，有著複雜嘅 algorithm。Chloe 當年用「iMac」嚟形容 Cindy：即係「睇得又有腦」。

坦白講，其實咁仲好。商業社會從來都係「唔怕你痴、唔怕你呆、至怕你唔來」嘅地方；你無欲無求，我反而唔知點應付你。你拎住張 wishlist 嚟同我擺檯，我仲可以搵到我哋嘅共通語言。

我同 Cindy 嘅共通語言有兩種：友情、利益。我相信，點都比只得一種好。

見完阿都之後翌日，我返咗香港，但隨即訂咗聽日飛台北嘅機票 — 我約咗 Cindy、兌現我「去上海見完社長之後，即刻碌返嚟台灣見佢」嘅承諾。

「啱啱先返嚟又飛？」Winnie 幫我訂咗機票同酒店後問我。「辛唔辛苦呀？」

「辛苦，但有計咩？」我笑一笑反問佢。「我唔去邊個去？」

「阿都個秘書，係你喺韓國嘅好朋友……」佢若有所思、然後靈機一觸。「佢係唔係你以前嗰個韓妹女朋友呀？」

「梗係唔係啦！」我斷言否認；呢個時候只要稍有少少猶豫，必定死無全屍。「邊得嚟咁多韓妹女朋友喎……」

「係咪唧？係咪唧？」佢好有興趣。「係咪有殘廢餐食嗰啲韓妹唧？似金喜善定似宋慧喬呀？定係你最冧豬嘅崔智友？」

「你估韓國真係周街靚女咩，喺明洞撞口撞面都係豬扒多過人啦……」我冇佢咁好氣。「總之我搞掂就盡快返嚟啦！」

翌日黃昏，台北 101 八十五樓欣葉。

「人哋隻蠢蛋呀……」Cindy 滿臉為食相 + 笑容望住我。「……我係咪真係可以叫㗎？」

「叫啦！」我都笑笑口望住佢。「鬼叫我冇飲你餐喜酒，又冇送結婚禮物俾你咩！嚟啦！任你劏喇！」

「好嘢！多謝 Alan 哥哥！」佢好興奮咁轉台用國語同個 waitress 講。「麻煩你，這個套餐，兩位。」

Cindy 扭緊我嘅，係價值每位八千台幣嘅五個 course 台菜套餐。雖然呢餐唔會係我食過最貴嘅一餐，但其實我骨罅都有少少赤……

不過，今晚係我同佢「套交情」嘅一晚，睇咗十幾年友情份上，赤就赤啦！

「你啲中國語講得幾好喎！」我讚佢。「幾時學㗎？」

「你個好老婆教㗎！」佢笑笑口睇我嘅反應。「個衰婆仲收到我鬼死咁貴，話我可以 claim 公司、唔志在喎……」

佢唔識 Winnie，所以佢口中嘅「好老婆」，係講緊 Chloe。

「嗱，唔爭在而家俾埋你喇！」我唔想再同佢喺 Chloe 嘅事情上糾纏，於是遞上一份包得好靚嘅禮物。「補祝你新婚快樂、白頭到老、永結同心。」

「嘩！多謝你呀 Alan 哥哥蠢蛋！」佢拎住份禮物，有啲喜出望外。「Tiffany 呀！我之前睇小美放閃晒命都睇得耐喇！今次仲唔到我？！我可唔可以影張相 send 俾佢晒吓呀？」

我指一指身旁嘅落哋玻璃，然後同佢講：「你想唔想就咁用最快嘅速度落樓？」

「唔晒咪唔晒囉……」佢啤住我伸一伸脷。「我返到屋企先影俾佢睇！」

「呢套係杯嚟㗎，唔係我送俾佢啲銀器；」我好整以暇咁答佢。「你就算影俾佢睇，佢都唔會妒忌你。你兩姊妹都唔細啦，仲玩埋啲你激我、我激你嘅嘢？」

「唓，呢啲係我哋兩個嘅相處方式；」佢一臉不在乎。「你啲男人唔明㗎喇！」

「又請我食餐咁貴嘅飯、又送結婚禮物俾我……你唔會無啦啦對我咁好嘅……」Cindy 臉色一沉。「你係咪想我講小美嘅近況你聽呢？」

「梗係唔係啦！」陰謀我的確有，不過冇咁簡單。「都分開咗咁耐，我先唔會咁緊張佢啲嘢呀……」

「哦，咁好啦……」佢有少少好似自言自語咁。「都好嘅，佢而家同佢男朋友咁甜蜜，又就嚟結婚，你都係唔好知咁多喇……話晒都一場夫妻，始終都有啲 hurt 嘅……」

聽完佢呢段說話之後，我霎時間完全唔識俾反應，呆咗，連笑容都僵住咗。

原來小美已經有男朋友，仲就嚟結婚……

睇嚟，之前我仲諗住返去搵佢，原來係我一廂情願嘅痴心妄想……。我唔係應該戥佢開心嘅咩，點解我個心好似喺 101 樓 wireless bungee jump、free fall 落去地下咁嘅……

「好傷心呢？喊啦，喊出嚟好啲㗎……」佢好關切咁望住我。然後突然間，佢再忍唔住、kit 一聲笑噴當場。

伏已中。

太耐冇見，我一時唔記得，佢兩姊妹玩人，天下無敵……

「아이씨……미쳤어 ? （妖……你癲㗎？）」我做個地道韓國人反應，係咁 sssss 佢。「幾廿歲人仲玩埋啲咁嘅嘢……」

「哈哈哈哈！你結咗婚㗎喇，好心你就收心養性啦！」佢仍然控制唔到佢嘅喪笑。「兩句說話就露晒餡，幾乎喊埋出嚟，你第日實俾你老婆恰死你！唔怪得金銀美叫你做蠢蛋……飲啖茶定吓驚先啦，情聖蠢蛋！」

「究竟咩人會娶你呢個癲婆呢……」我回敬佢。「你老公嫌命長呀？」

大家從上述嘅對話可以睇得到，我同 Cindy，真係只套交情。事實上，如果我同佢之間，真係要搵共通語言的話，交情可能遠比利益更有效。

「老朋友」其實就係咁解。

君子可欺以其方，老朋友都係。

同日晚上大約十點，晚飯過後。

「嗱，飯又食咗、禮物又送咗，乜數都找晒㗎喇！」我準備幫 Cindy 截車返屋企前同佢講。「你住邊度？我截的士送你返屋企？」

「我住附近，不過，你唔准截車住；」佢講完後，一手挽住我手臂。「我帶你去一個地方先！」

我跟住佢行，佢喺信義路同松智路轉角個公園停低，然後搵張 bench 坐低咗、再拍一拍張 bench、示意我坐喺佢隔籬。

「點呀你，又想玩乜先？」我笑笑口問佢。

「嘻嘻！」佢嬌笑、然後打開手袋、拎咗樽燒酒出嚟。「哥哥陪我飲酒！你好耐冇陪我飲酒喇！」

佢扭開樽酒，大口飲一啖：「我嘅。」

然後佢再飲一大啖：「呢啖代銀美飲嘅，到你喇！」

佢遞咗樽酒俾我。我接過，大口飲一啖。灼熱嘅燒喉感令我不自覺「啊」咗一聲。踏入十月，台北嘅夜晚開始有些微涼意，酒進入身體轉化成熱量，正好中和呢種中秋過後嘅涼意。

一樽韓國燒酒，大約 350–360ml，我哋飲得幾啖，樽酒都去得七七八八。

「酒就飲晒喇，」我搖一搖個空樽。「捨得返屋企未？」

「咩呀？仲有呀……」佢打開個手袋俾我睇，我起碼仲見到兩三支燒酒喺裏面！

女人嘅手袋，其實係咪叮噹個法寶袋？點解個個手袋都可以容納無限量物件嘅？我見過 Winnie 個手袋，可以裝晒一餐餸連汽水……

「你個癲婆……」我擰一擰頭。「你唔係諗住喺街飲晒佢呀？越夜越凍呀……」

「咁點算好呀？」佢眼碌碌望住我。

二十分鐘後，台北君悅酒店某客房。

我帶咗 Cindy 返酒店。呢件係我識佢十幾年、諗都未諗過嘅事。

我唔會搞佢。
我唔會搞佢。
我唔會搞佢。
我唔會搞佢。
比好重要更重要，所以講夠四次。

「薯片……薯片……唔該！交換吖！」我遞咗包薯片俾佢，然後佢俾咗支酒我開。「Alan 哥哥，我哋識咗幾多年喇？」

「唔……十二年喇……」我心算。「當日識你嗰陣，我同小美都未拍拖……」

「我記得，喺狎鷗亭撞到你哋兩個吖嘛！」佢亦都回憶緊過去。「其實嗰陣同你哋去下午茶，我已經知道小美鍾意咗你。佢平時對其他男仔唔係咁㗎，唔會俾人咁接近、又唔會咁百厭，但對你就唔同。嗰陣我已經知道，個衰妹發姣、你哋有啲嘢……哈哈！」

我哋一邊傾、一邊食零食。坦白講，成四五千銀港紙嘅台灣菜，其實不外如是。起碼，我食唔飽先……

「好掛住我哋以前一邊飲酒、一邊玩遊戲嘅日子呀……」佢有少少感嘆；然後，佢突然拎起手袋。「等我搵啲嘢嚟同你玩吓先……」

佢搏命喺手袋度抄；良久，佢拎返隻手出嚟，手中拎住咗啲嘢……

「啦啦啦，我搵到喇！」佢打開手掌，原來係五粒 공기 （Gonggi，即係好似拋豆袋嘅兒童遊戲）。「嚟，我哋玩 공기 ，輸咗罰飲酒！」

「嘩，咁都有呀？你個手袋仲有啲乜呀？」我笑佢。「你幾多歲呀？仲袋住啲咁嘢嘅？行政秘書喎！」

「唓，你理得我！」佢反駁。「我個手袋乜都有，你搵多兩次，可能搵到你個銀美喺裏面𠻹呀，哈哈！」

「你想呃酒飲，我實成全你嘅……」

「呢位先生，我係韓國人嚟㗎，玩공기 大㗎！你擔心你自己飲到嘔仲好啦！」

就係咁，時光好似倒流返去十年前嘅漢城，我同 Cindy 喺遊戲、閒談、胡鬧中，將佢手袋裏面嘅五支（女人手袋萬歲）燒酒清晒。

所欠嘅，就只差 Chloe 一個；否則，呢個係完美嘅晚上。

同日晚上，唔係，係清晨時份。

一張冚落嚟嘅被將我驚醒；我一望，係 Cindy 想將被冚落瞓咗喺梳化上嘅我身上。

「唔好意思，整醒咗你……」佢一臉歉意。

「唔緊要……」我坐直個人、捽一捽眼。「而家幾點呀？」

「朝早五點幾喇……」佢坐低喺梳化嘅另外一邊。「我都差唔多要走喇，返屋企梳洗換衫，又要返工喇……」

「你有冇瞓過？」我問佢。

「有，瞓咗一陣，飲咗酒特別好瞓；」佢指一指張床。「唔好意思，霸咗你張床，要你瞓梳化……」

「我同你，冇計啦！」我笑一笑，佢亦回以一個甜美笑容。

我叫咗兩份 in-room breakfast，然後同佢一齊食早餐。

「係呢，」我突然醒起。「你成晚冇返屋企，老公冇詐型咩？」

「佢返咗韓國 business trip，要後日先返。」佢一邊食一邊講。「其實我同佢都經常要台北首爾咁飛，所以都慣咗靠電聯。」我點頭。

早餐過後，Cindy 喺梳妝檯前補妝。我見呢個係最後機會，於是行埋去佢身邊同佢講：「Cindy，其實今次我搵你，仲有啲嘢想……」

呢個時候，佢企起身，示意我唔使再講落去。

「其實，幾日前你喺我 office 出現搵社長，我已經大約估到會發生啲乜事；」佢好認真咁同我講。「就算嗰一刻我未係好清楚件事，慢慢再睇返啲資料，其實我都 round up 到個故事……」

佢的確好聰明，再加上呢十多年嘅閱歷，令佢嘅智慧更上一層樓。

「放心啦，我點都企喺你呢邊。」佢笑一笑望住我。「我會幫你同社長講好說話。其實呢件事對佢嚟講，係好簡單嘅嘢；對我嚟講都係。放心啦哥哥，包喺我身上！」

有時候，可以同一個了解你嘅人合作，嗰種「大家唔使多講、一切都在心中」嘅默契，實在爽過一口氣隊半支 Johnny Walker Blue！

「惠兒，多謝你。」我非常由衷嘅一句多謝。

「哥哥，」佢望住我。「我叫得你做哥哥，呢個稱呼唔係叫吓就算；我真係當你係我哥哥。呢啲舉手之勞，你唔需要太過客氣。」

識個好嘅朋友，好過投胎投得好。

我諗，我今次打出咗個 home run。

我送 Cindy 落去搭車，佢同我講：「你返到香港之後，我會叫秘書 courier 啲申請做 Daehwa 供應商嘅文件俾你簽，你簽完後 courier 返俾我，我幫你盡快 register 咗佢，咁樣社長先可以向崔社長推薦你。」

「麻煩晒你！」我向佢點頭。

「都話叫你唔使客氣咯！」佢輕輕拍咗我手臂一下。臨上車前佢同我講：「下次我再嚟香港，到時約埋你太太一齊食餐飯吖！我仲要喺佢面前爆你喺韓國嘅大鑊！哈哈！」

雖然我知 Cindy 係講笑，但如果有朝一日佢真係嚟香港探我的話，我諗我要 prep 定佢，Winnie 其實唔知 Chloe 嘅嘢……