中環遊戲（1）

布吉島「深層spa」

講去旅行，香港人認第二，冇人敢行近頒獎台十米範圍。當年經常出入東大門嘅我，聽得最多嘅唔係「 안녕하세요 」，係「屌那星咁撚貴」。

其實呢樣嘢唔難明，香港嘅工作環境咁地獄，正所謂「吊頸都要唞吓氣」，放假出去行吓散吓心，降低吓皮質醇，個人都襟玩啲。

但係有好多人認為「放假去充吓電，返嚟成個爽晒，完全係兩個人咁」，呢個就真係比較難喇。因為唔關去邊旅遊事，係 by nature 嘅問題 — 你一直食緊屎，就算你去邊度用咩水嗽過口，返去都係繼續食屎咋喎，冇分別㗎！你唔會因為去完旅行充完電，返嚟啲屎都變咗米芝蓮三星㗎。就算真係變咗三星，咪又係屎！

有時候，一個唔好彩，放假去旅行，可能仲 stressful 過返工。

就好似我咁……

講返布吉，其實呢個 trip，一開始就一啲都唔放鬆不特止，仲好鬼緊張……

話說我哋起行嗰日，撞正泰國黃衫軍示威、衝擊機場。一般來講，呢類型示威，都唔會影響到遊客。但偏偏今次，示威者衝咗入機場、佔領跑道；結果好多航班都因為咁要取消。喺我哋去到曼谷機場轉機嗰陣，先至知道，我哋去布吉嘅班機已經取消！

喺機場嘅泰航 counter，人多過旺角。我哋幾經辛苦先至埋到去詢問處，點知個地勤愛理不理，有一句冇一句咁答我，話唔知幾時先有飛機，我哋鍾意等嘅可以等，唔鍾意等佢哋都冇辦法；又話賠償嘅嘢叫我地同辦事處聯絡，佢哋乜都做唔到。

但係大家都知道，假我哋就攞晒，不去白不去。如果我依家掉頭返香港，啲假就冇梗，亦都唔使旨意遲啲有得補。事實上，呢八日假都係打交咁打返嚟，公司嘅鬼佬鬼婆，已經排假排到過晒聖誕，我想補假都冇可能。

原本都有諗過，不如索性留喺曼谷，反正都係旅行，曼谷同布吉島都係泰國啦。問題係，去布吉嘅酒店同機票都已經 book 晒，而家突然間又要再 book 過曼谷嘅酒店，布吉嗰邊退唔退到錢都係未知之數，呢邊就肯定要俾多筆。

越諗越唔忿氣，洗多咗錢都係事少，無端端個假期就咁破壞咗，個心真係好唔順。還好我哋有買旅遊保險，於是攞出黎望一望。原來份保險，包埋因為延誤而引致嘅額外交通費；我哋打電話去保險公司 confirm 呢一樣嘢。

既然係咁，我都無謂同你客氣。於是，我哋喺機場搵咗間包車公司，問佢哋可唔可以包架車去布吉。唔係冇諗過租車自己揸落去，不過當我醒起自己喺個人生路不熟嘅亞洲國家，我就唔係好想冒呢個險。

還好嘅係，包車公司好理解我哋嘅要求，佢哋搵咗架新落地、只係行咗兩三千公里嘅 Camry 俾我，仲有個年輕力壯嘅司機。因為程車成千公里，預計需時十個鐘以上；費用盛惠三千港元。如果包車都算「計程車」的話，呢程應該係我呢世人搭過最貴嘅的士。

好彩有買旅遊保險啫……

十多個鐘頭嘅車程，雖然離開曼谷之後都冇乜塞車，司機技術亦好，開得都算快；但點講都好，都唔會係一件好享受嘅事情。中途停咗兩次車，食咗兩餐油站飯。結果，我哋喺零晨十二點幾到達布吉島。

當時我哋都為呢程順利嘅長途車程感到高興。我哋唔知道嘅係，喺同一條公路、前往同一個目的地，有一架同樣因為停航而要經陸路去布吉嘅車炒咗，三死幾重傷……

去到酒店，我哋兩個已經攰到條死屍咁，稍事梳洗就即刻瞓覺。

希望瞓醒可以開始嘆世界。

劈咗成千公里車之後嘅早上十點。

起身，做我最想做嘅嘢 — 打開露台門，然後跳入泳池游早水。我專登 book 咗 pool access 嘅房，都係為咗呢樣。點知一打開門，我見到泳池前面多咗一條繩，上面掛住塊牌，寫住：Out of order。

唔撚係啩？！我專登俾多幾舊水一日嚟 book pool access 嘅房，你 out of order？冇 pool access 你都仲夠膽死收多我錢，呢啲係咪失實陳述？

我叫醒 Winnie，等佢睇吓 — 拍咗拖一年，我非常熟悉我女朋友嘅性格。俾佢知道自己俾人坤咗，佢一定㷫過焫雞。呢個世界上，冇乜嘢俾一個扯晒火嘅公關恐怖，因為佢有火之餘，仲知道點樣玩嘢會最入肉最痛。無他，俾人整得多嘛。

果然，Winnie 睇完之後就二話不說，即刻打返香港旅行社剷人。呢啲環境，如果我第一時間走落去 lobby 詐型嗌回水，酒店未必會刮我 — 房你又住咗，呢度又唔係香港，我點知你間旅行社點同你講呀？關人隱士！

但打返去剷旅行社又唔同。呢間係我在公在私都幫襯咗好多年嘅小型旅行社，佢嘅 operation 唔大，食到落口嘅肉要佢嘔返出嚟，佢點都會有啲反應。最緊要就係，我三不五時就會出機票去鄰近地區度週末，再加埋我移咗民嘅雙親同其他生意上嘅往來，佢唔敢得罪我。

果然，剷後抑鬱嘅旅行社耍晒冧，迫酒店要同我哋換房，酒店方面亦都俾我哋任揀。但講真，冇 pool access 你俾間總統套房我都係假；我要 pool 呀 pool 你阿麼！結果，酒店肯全額回水，我哋就搵過第二間。於是，我帶咗 Winnie 去我熟悉嘅 Holiday Inn。大集團，點都比較信得過。

最後，我哋入住咗佢哋嘅 Busakorn Villa。唔只有 pool access，仲係私家泳池。如果怕孤獨，行兩步就到有 poolside bar 嘅大泳池。

如果連去旅行都唔嘆最好嘅，我都唔知返工做得咁辛苦嚟做乜。

去旅行除咗玩，最好做乜呢？

食同瞓。

喺香港做嘢，除咗長期睡眠不足之外，就係一日兩餐甚至三餐嘅劣食。每日返工，除非我肯喺已經唔夠嘅睡眠時間中，再減多半粒鐘嚟食早餐，否則都係求其質兩塊餅就當食咗。午餐就喺公司附近嘅茶記買外賣返公司食，因為公司喺金鐘好迫人。至於晚飯，如果接 Winnie 放工的話，都可能會食好啲；否則又係茶記搞掂。

所以，嚟到布吉，唔喪食喪瞓，點對得住自己？

呢幾日，我哋兩個嘅基本行程就係：

起身 ＞ 游早水 ＞ 食早餐 ＞ 補眠 ＞ 游多陣水 ＞食 lunch ＞ 午睡（因為每日呢個時間都會落雨） ＞ 行街或者去海灘 ＞ tea ＞ 再行多陣或者玩多陣 ＞ 晚飯 ＞ 去酒吧 ＞ 瞓。

我覺得，如果我哋死咗上天堂的話，除咗冇酒飲之外，應該都係咁上下。

不過食到第五日，我開始發現 Winnie 有啲異樣。嗰晚我哋食完海鮮 buffet 之後，佢一味話好滯。我諗，佢應該食滯咗都未定……

瞓咗一晚之後，第二朝早餐，佢好似冇乜事，於是又再食過。大家都知，喺東南亞旅遊，酒店嘅自助早餐係唔可以放過嘅嘢。基本上，呢餐同正餐 buffet 冇分別，不過就房價全包；不食白不食。

食完早餐，照舊游早水。呢個時候，Winnie 顯得有少少唔舒服，話個胃頂住。我陪佢返房，俾咗粒胃藥佢食，然後叫佢休息吓。於是，大家又返上床再瞓過。

一直到 tea time，Winnie 都好似唔係好舒服咁。

「有冇嘢可以幫到你？」我好關切咁問佢。「使唔使睇醫生？」

「唔使，我諗我食滯咗啫……」佢望一望我。「不如我哋出去行吓街、消化吓？」

於是，我哋去咗 Jungceylon shopping。

行行吓，見到有戲院上緊《 Wall-E 》，呢套戲雖然喺香港睇過，但我哋都好鍾意；於是買飛睇戲。

入到戲院，Winnie 突然間話個胃痛得好緊要，要去廁所嘔。嘔完返出嚟，佢話清緊啲嘢，應該冇事。點知喺播國歌、全院要起立嗰陣，佢痛到企唔直個人……

睇見個勢唔妥，我提議不如返酒店，佢點頭。

返到酒店，佢仍然一邊嘔一邊痛，但肯定唔係腸胃炎，因為佢冇得屙。我去 concierge 同佢哋講，佢哋話會叫醫生嚟。

醫生好快就嚟到，睇完一輪後，佢話 Winnie 係嚴重嘅胃抽筋。醫生幫佢打咗支針，又放低藥；最後同我講，如果聽朝仲係唔舒服的話，可以 call 佢，佢會過嚟車我哋去醫院。

醫生走咗之後，我餵 Winnie 食藥，然後等佢休息。

估唔到，去旅行都整鑊咁嘢，希望佢快啲冇事啦……

第二朝起身。

起身呢個詞，喺呢度唔係咁啱用。因為嚴格嚟講，我哋兩個成晚都冇乜點瞓過。

整個晚上，Winnie 每隔十五分鐘就嘔一次，由於冇食嘢嘅關係，嘔嘅都係水，甚至只不過空肚作嘔。我叫呢次做「布吉大屠殺」 — 乜嘢都俾佢劏晒出嚟……

天光之後，我哋決定call醫生。佢仍然好快就到，醫院應該就喺附近。果然，上咗佢架 Pajero 「白車」之後，行咗唔夠五分鐘，就到咗「醫院」。

點解要用引號括住醫院呢？因為其實只不過係樓下診所、樓上有病人就係病房、冇病人就係渡假屋嘅「病棟」；應該係醫生私人執業嘅地方。

護士安頓好 Winnie 喺「病房」之後，醫生就同我講：「佢要吊鹽水去停止佢嘔到脫水嘅惡性循環，所以都要四五個鐘。」佢指一指隔籬張單人床，然後繼續講。「你想的話，可以喺度休息吓等佢。」

於是，我就瞓咗喺隔籬床，邊睇住 ESPN 邊陪住要吊鹽水嘅佢。

四五個鐘後嘅下晝，鹽水吊完，Winnie 嘅胃抽筋亦都停咗。我陪佢去攞藥埋單，然後返酒店。

星級醫療 spa 連出診同藥，盛惠港幣四千。還好我哋都信奉保險，醫療保除咗公司之外，私人嘅都不缺，可以 claim 得返……

返到酒店，Winnie 藥氣未過、蒙頭大睡。而我，就自己一個叫 room service 做晚餐。

點都好，希望佢喺聽日走之前會精神啲。

布吉之旅第八日，離開。

「I don’t care what your company policy is. You either refund our tickets, or upgrade us to first class all the way back to Hong Kong, otherwise I will make you some trouble you can never think of! I will make you famous in Hong Kong!」

發老脾小緊人嘅係 Winnie，俾佢小緊嘅係泰航布吉辦事處嘅總經理……

我都話，千其唔好得罪公關，我哋真係有本事繞過晒所有 CS、直接搵個大老細嚟屌。

睇見佢咁好中氣、屌人屌到啪啪聲，好明顯，佢已經好返晒。

然後，我哋搭咗兩程頭等，結束八日有驚無險嘅假期，返去香港呢個活地獄，live to fight another day.

（待續）