根叔|gunshock
根叔|gunshock

⎡邊緣回望後,滑進一界混沌,從不掙扎。跟自己的過去過不去,執著地浮沉著。⎦ Still hope/to hand stitch my book/of ups & downs on a tightrope./No plan to elope/coz it just chokes.

根太教你煮架胸

根太都睇唔過眼,係時候出現啦!

▍那星救地球

從前從前從前從前,有個電視台諷刺時弊嘅節目,每一集都會令我笑到趴喺地。乜都唔怕講嘅題材內容,透過嘻笑怒罵嘅對白同埋誇張嘅肢體動作演譯得啱啱好。唔過火位,更加唔似家陣咁,乜到船頭驚鬼又怕草繩,係咪都人人斬定腳趾戴定頭盔先。

八婆消息曾經傳到好響,話第一師奶個老爺一早就已經架空咗佢㗎啦咁喎。呢啲馬後炮講唔講都冇乜分別。教咗煮餸咁耐,我好少會做「架胸」呢一道菜,全因為無論係材料或者時間上都需要好多,而且要得架胸,必先有架両

既然講開,咁就等根太我攞定雞蛋六隻同埋糖兩茶匙出嚟,簡單教大家煮呢個「架胸」先:

① 揀啲夠重手嘅「架両」,夠斤兩夠重秤至係好嘢。睇清呢個係架両,official 好多嘅,唔係民間常見嘅炸兩。
② 另外摷啲疊 file 夠厚嘅嘅「架兩」,數量愈多愈好,多啲堆埋去先可以架得起。
③ 數量夠多,又夠重秤,就可以開爐,用多元嘅大細文武火不停咁煲佢,啱滾就自然煲得出一碌「架樑」。表面上係用嚟幫手撐住個飯煲蓋,實則埋定閘等鐘聲一響一起起步,就插手伸腳撠佢鹵味下馬。加鹵水汁唔淨只係為咗整色整水㗎嗱。
④ 落晒成包花生,一邊食就一邊等佢煲到成烹嘢黐肺黐底燶晒。趁熱,倒晒佢,一定要趁熱。砍掉重練換新血,放喺舊酒新瓶裡面嗰包三小辣辛血。

*小心睇路睇火。一日唔熄火,睇唔緊嘅話有機會喺不知不覺間推你去一齊打飛行棋飛機。三個六返大陸,重做第①步,轉彎直入無限輪迴。

「咁呢,就為之維妮骨啦。」我記得節目裡面嗰個阿乜太係咁講。


▍▍神奇福佳宝贝

隔離廠嗰部貴價抽氣扇係咪壞咗?當室內溫度醞釀得高到一個點,佢老爺拍緊嗰套《阿爺廚房煮意》就肯定會收返埋個笑容罷拍,轉拍隔離台比較嚴肅嘅《阿爺隨訪主意》。不過既然都係跟住食譜嚟煮,唔走得出咩花臣嘅,嗱不過唔好又係家傳戶曉嗰碟「四字池魚兜亂」好喎。

咁到時新嗰煲煮到咁上下,神奇福佳宝贝畀咭超連同一齊擺堆嘅奇獸會唔會畀茅山寨版精靈葫蘆所收服呢?

欲知後事如何,且看佢地下回點樣被分解。未知,唔見有劇透。

唔知我講繄乜?之唔係呢套不日放映但熱度十足嘅《神奇福佳宝贝畀咭超之勇闖茅山》老尷煮藝大比拼囉。有乜特別?無㗎,咪又係同一間製作公司,起用另一組都係搽晒厚顏嘅班底,自我吹棉直至思覺失去調味換湯不換藥咁以三幅被炒炒埋埋嗰兩碟大鑊飯,再互相你煮下我煮下你咁囉。

免費入場,你唔係唔睇呀?溫馨提示返先,上一場放映途中突然派嘢食派嘢飲,我呢種人諗住無死啦就梗係唔好蝕,原來係好難食,骾唔落。之但係算啦世界上無 free lunch 嘛又唔係隊鹹魚。吖點乜知佢竟然秋後埋嚟收我錢,重要係貴到離晒譜,貴過晒所有食譜!自古以來,貪字真係得個貧!就算係暗地裡改咗例,唔畀帶嘢食進場都好,我下次寧願唔食。

有下次嘅話,小心下場呀。


▍▍▍有啲對白唔係人人都講得起

琴日根太喺街市買餸,見到天真蕉,佢話個個都想有機會講句「係咁先,唔係咩呀」嘅對白,唔通個個都真係想講咩?

一言驚唔驚醒到夢中人我唔敢講,我至怕一語係成讖就陰功。冬陰功乃係外國勢力架勢菜式,我唔知,我唔識煮。我唔食得辣,淨係知自己煮完然後食到阿媽都唔認,就係自食其異果。奇異果,我食咗會過敏,病癥係噏臭口,病發時會亂講廿四味

我就係剛剛食完兩個,所以先至諗到呢堆野芝麻。等陣揸車出去買餸,都係戴返個頭盔好。唔知有冇用,你都知啦,近排流行防不勝防唔聲唔聲隨時炒埋嚟,又唔係 lime juice 喎,抵唔到頸睇唔過眼呢啲批豆呀我。

好彩我冇講我係根叔個老婆根太吖,定係佢成日衝出嚟做架樑嗰條仔根太(ねだ)啫。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论