Gear噏
Gear噏

認識本土 思想武裝

請紀念也在受難的手足

頭盔:本人曾為耶教徒,現為不可知論者,無意冒犯任何宗教

以下內容非耶教徒睇可能未必明/感受冇咁深。今日係耶穌受難節,對耶教徒嚟講意義重大。如果你每年都有紀念耶穌,請喺今年都特別紀念一班因愛你而受苦嘅手足。

受難節的本質

受難節嘅本質離唔開愛、受苦、得救、新生命。耶穌愛世人,唔願意見到世人因罪而死。佢紆尊降貴,嚟到人間受盡苦難:被辱罵、鞭打,最後更被釘十字架。佢希望代世人受死,令信徒得救。信徒獲得新嘅人生,秉持宣揚福音嘅使命。如果你係耶教徒,以上講嘅嘢你理應一早知。

因愛付出的耶穌與手足

「惟有基督在我們還做罪人的時候為我們死,神的愛就在此向我們顯明了。」(羅馬書5:8)耶穌願意走近弱勢,呼召低下階層做門徒、親自醫治被社會邊緣化嘅病人,以行動證明愛唔係得個講字。

香港亦有一班手足因為愛而抗爭。佢哋愛嘅可能係香港,唔願意見到香港沉淪;可能係愛港人,希望與港人同甘共苦。旺角放TG,佢哋讓個豬咀畀露宿者;黑警中止大遊行,佢哋畀老幼走先。絕大部份人同耶穌一樣,行動出於無私嘅愛,並非為自己,冇計較自己嘅益處。事實上因抗爭而失去嘅遠比得到嘅多,根本毫無利益可言⋯⋯

抗爭的耶穌與手足

「惟有基督在我們還做罪人的時候為我們死,神的愛就在此向我們顯明了。」(羅馬書5:8)耶穌願意走近弱勢,呼召低下階層做門徒、親自醫治被社會邊緣化嘅病人,以行動證明愛唔係得個講字。

香港亦有一班手足因為愛而抗爭。佢哋愛嘅可能係香港,唔願意見到香港沉淪;可能係愛港人,希望與港人同甘共苦。旺角放TG,佢哋讓個豬咀畀露宿者;黑警中止大遊行,佢哋畀老幼走先。絕大部份人同耶穌一樣,行動出於無私嘅愛,並非為自己,冇計較自己嘅益處。事實上因抗爭而失去嘅遠比得到嘅多,根本毫無利益可言⋯⋯

偏走苦路的耶穌與手足

「你這個要拆毀聖所、三天內又建起來的人哪,救救你自己吧!你如果是神的兒子,就從十字架上下來吧!」(馬太福音27:40)當日有人質疑耶穌點解唔喺十字架上落嚟,嘲諷佢冇能力脫離險境。諷刺地,耶穌絕對有從十字架落嚟嘅能力,佢冇咁做因為佢知自己使命係以死成就救贖,並且心甘情願咁做。

睇返手足們,佢哋絕對知自己面對政權係以卵擊石。所謂「廢青」同「曱甴」並非因為廢先唔怕同社會攬炒,佢哋當中唔少人本來大好前途,可以隔岸觀火;亦有唔少人係家庭支柱,本來要搵食已經好艱難。但咁又點呀?佢哋就係想藉住付出為香港帶來改變。以死明志又好、保持抗爭熱度又好、喺高牆上創造缺口都好,佢哋都成就緊呢場時代革命。

追求公義的耶穌與手足

「作官的原不是叫行善的懼怕,乃是叫作惡的懼怕。」(羅馬書13:1)即使林鄭月娥自稱天堂留咗位畀佢,但顯然今日佢並非合乎聖經所講嘅管治者,今日香港社會亦出現唔少耶穌討厭嘅不公。

手足們以身犯險,其實追求緊一個公義嘅社會,改善港人生活。事實上,喺制度不公之下,唔少人生活艱苦,亦唔快樂。一日港人未爭取到民主,教育制度、醫療體系、經濟政策,種種影響我哋生活嘅決定上我哋都唔能夠話事。爭取五大訴求、雙普選、獨立,都只因為手足想拯救港人免被獨裁政權所逼害。耶穌受死為信徒帶來得救;手足受苦為港人追求自由。

重獲新生的你

對信徒嚟講,耶穌嘅影響跨越時間地域,偉大程度無人能比,拎兩者比較邊個偉大啲冇咩意思。不過耶教徒經常強調學效基督,今日香港就有一班活生生「活出基督」嘅例子。或者出發點唔完全一樣,但在於對抗強權嘅勇氣、追求公義嘅堅持、無私無畏嘅愛,手足們活出基督嘅樣式。

受難節重點唔單單係受苦,更提醒信徒省察自己。正如耶穌死咗二千年,信徒至今仍然要繼續傳揚福音。今日我哋知道有班手足受苦,要做嘅係反思點樣秉持手足精神繼續抗爭,唔好辜負前人付出。

耶穌死後三天會復活,已死嘅手足唔會。請喺紀念耶穌同時,唔好忘記一眾手足,一班愛我哋為我哋受苦嘅手足,一班實踐耶穌教導嘅手足。

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论