覺得抗爭冷卻係因為你哋心態有問題

適逢721 七個月紀念，好多手足話運動冷卻咗，覺得好灰心。所以我想同大家分析下點解會咁覺得，同埋呢大半年嚟大家嘅抗爭心態出咗咩問題。

睇完呢幾張圖大家有咩感覺？憤怒？悲傷？都係一種情緒。本身抗爭就係一樣好情緒化嘅嘢，用情緒去為抗爭助燃係冇問題，問題出喺大家長遠將情緒轉化成啲咩。

從抗爭口號可以睇到大家嘅心態：

由抗爭初期嘅「林鄭下台」，到黃絲嗌得最落力嘅「黑警死全家」、「解散警隊」、「721唔見人831打死人」、「香港人報仇」，係出於對「他者」嘅仇恨同不滿。相反，由抗爭初期嘅「香港人加油」，到有啲人唔敢嗌嘅「光復香港 時代革命」，係出於對「我者」嘅支持同鼓勵。

唔知邊種口號你會嗌得落力啲呢？

由721元朗恐襲開始，好多中立淺藍淺黃開始覺醒，佢哋係因為不滿警黑合作、睇到警暴嘅流血畫面而覺醒。心態上佢哋加入抗爭係因為不滿警暴，而非對香港未來有願景同對香港人嘅愛。

問題就出現啦，一旦警暴唔再出現、唔再有流血畫面，呢班人就會退出或淡出抗爭。

點解抗爭一降溫就會有手足要跪地賣慘情、不惜犯險流血，甚至犧牲自己？係因為手足覺得只有呢啲畫面先可以令香港人堅持多一陣，一路走來都係咁，唔想抗爭降溫就唯有流血。靠鮮血獻祭延續嘅抗爭唔長久，亦都唔人道。

咁有咩方法延續抗爭，應該要有咩心態？我今日要介紹一個人俾大家識，佢叫做梁天琦。

梁天琦喺反送中之前已經開始抗爭，由一四年雨革開始到一六年魚革後，甚至去到受審前幾個月佢都仲做緊外國遊說工作。

佢曾經俾人話係鬼、港獨狗。

佢嗰陣嘅香港相對甚少有警暴、流血畫面。

佢身邊冇咩同路人，都係得啲本土派手足。

佢喺初一魚革俾好多人割席，被控最高十年嘅暴動罪。

點解佢仲可以堅持不懈咁抗爭到最後一刻？

佢都經歷過雨傘嘅無力，見證過黑警嘅濫權，但佢將抗爭情緒轉化為愛，而唔係仇恨。佢著緊嘅係「我者」，因為愛香港、愛香港人，所以要光復香港時代革命。

點解我會覺得天琦咁諗？我引用下佢寫俾香港人嘅呢封信：

我知道，我怎樣努力都無法想像你們正在經歷的苦難和身心承受的傷痛。在槍林彈雨中，親眼目睹鮮血灑在街頭，聽見四周的哀嚎吶喊，定必使你們悲憤不已……雖然如此，我仍希望你們能夠明白：本著對香港的熱愛，你們已展現了無比的勇氣，改寫了香港的歷史。當然，真正的公義還未來臨，你們或許因而心中充滿憤怒，這乃是人之常情。但我懇請你們不要被仇恨支配自己，在危難中，仍要時刻保持警覺與思考……當本應解決社會問題的人選擇冷待，反而熱衷於將香港的命運放上賭桌作政治豪賭，我們需要的，不是以自己寶貴的生命和他們對賭，而是在苦難中煉成堅毅與盼望。

可能你覺得我又過份解讀咗封信嘅意思，但無論如何我想帶出嘅係：只要心態正確，就算香港變成點、身邊仲有冇人抗爭，都無阻對抗爭嘅堅持。 咁樣抗爭先會生生不息，咁樣手足先唔洗再用鮮血延續革命，咁樣先有可能堅持到煲底相擁嘅一日。

但我唔知咩叫愛喎，點樣先可以改變心態？

第一步：認清自己愛緊啲咩

我哋所愛嘅係香港、香港人。咁香港同香港人到底係咩先？

上圖係天琦參與香港保衛戰嘅紀念活動，悼念二戰時為香港呢片土地犧牲嘅義士。我哋要認識香港呢片土地嘅過去，香港歷史。（之後我會出文再講）

上圖係地厚天高嘅片段，左邊嘅係《香港民族論》其中一個作者王俊杰。我哋要認識香港人係一個點樣嘅族群，香港民族。（之後我會出文再講）

第二步：擁抱所愛嘅嘢

無條件擁抱香港本土價值，守護粵語、睇港產片、聽本土音樂，支持香港製造同創作。明白點解呢啲嘢咁值得我哋付出。

第三步：願意為所愛犧牲

犧牲唔一定講緊啲好偉大嘅嘢，可能係金錢、時間、自由。即使可能冇回報都好，你都願意去作出犧牲。

當你能夠真心去愛香港、香港人，呢份愛就會作為我哋最大嘅動力，十年二十年都好，抗爭都唔會冷卻，視光復香港為畢生志業，我哋係會堅持到煲底相擁嘅一日。

最後，我記得李怡先生喺G20嗰排有篇文咁講手足：

「恨嘅力量再強，都有盡頭，而愛嘅力量係無窮盡。愛終歸會戰勝恨。」

即係愛比暴力強，與警暴割席。我哋香港人抗爭係出於愛，而中共或黑警只係出於仇恨，所以最終我哋一定會嬴。

希望大家唔好再單單為警暴而抗爭。記住我哋係為香港民族而戰，為我哋所愛嘅人和事而堅持。

光復香港 時代革命

民族自強 香港獨立

筆者作為一個嘅好早就覺醒本土派、獨派，見到大家對抗爭感到灰心，所以有感而發想分享下，俾啲正能量大家。因為香港抗爭都出現過幾次低潮期，雨傘失敗後有，DQ之後又有，嗰陣個政治氣氛比依家差好多。你話你愛香港、搞革命，啲港豬當你痴線，但都仲有一班人一直堅持緊，冇灰心過。

直到反送中開始，我哋呢班老鬼真係睇到希望，所有嘢好似雨後春筍咁爆出嚟。革命其實一啲都唔容易，或者抗爭真係冷卻咗，短期內真係救唔到手足。但如果我哋拉長條時間線睇，我哋都係為香港民族嘅尊嚴、前途奮鬥緊。只要我哋一日唔放棄，香港民族只會越來越強，距離勝利只會越來越近。

應承我，只要一息尚存，唔好放棄光復香港，到真係有煲底相擁嘅一日，所有嘢都係值得。