呀閑
呀閑

房俊文 | Fong Chun Man | DoDo♍ Hkapa Drama school Acting 2022 graduate | 劇場萬事屋 aka Theatre Maker | 喜歡無厘頭文字創作

《信封、信紙與郵票的三角關係》

(编辑过)

「你知唔知道三角形嘅內角和係180度?」

「三角形?係咪同百慕達三角差唔多嘅地方?」

「呢度寫住,如果等邊三角形每隻角都係60度,咁你就係直角三角形,我就係你嘅90度。」

「我記得好耐之前真係有人將我寄左去百慕達三角架…我係點出返嚟架?」

我做左咁多年信紙,都係第一次見人用三角形嚟比喻愛情。同埋我係你嘅90度係咩意思?

「郵票嚟啦。」

要寄一封信要有信封同信紙,最後貼埋張郵票。但係邊個緊要啲呢?冇信封上面嘅地址就寄唔到出去。冇郵票嘅話郵差就唔會幫你送信。但係冇左我嘅話,個情婦就會睇唔到呢篇三角形內角和愛情定理,裡面重有條equation 「a^2+b^2=c^2,假設a= anal…」 OKOK,再讀落去就兒童不宜。

呢封係一封情夫寫比情婦嘅信。有時做信紙都幾攰,要焗住知道曬封信嘅內容,我可以同你保證,唔係封封信都同小朋友寫比聖誕老人嘅信一樣咁天真。個情夫重要好自豪佢地段三角關係隱瞞得幾好,「就像i,是虛數,也是你和我,在只有實數的世界中消失…」真係有人鐘意佢嘅?

不過事實係,依家呢度都有段三角關係。

曾幾何時我以為我同信封係天生一對。你幾時有見過信封同郵票一set咁賣?唔會架麻,永遠都係信封同信紙一set咁賣。

但係我發現左其實我同信封唔係咁close,就算我地再close,都唔夠郵票同信封close,佢地係24小時痴埋一齊,literally痴曬左。

而我呢?啲人收到信之後第一時間就抽我出嚟,將信封掉埋一邊。咁我點知信封同郵票趁我唔係度嘅時候做左啲咩?

我相信信封,因為佢真係好單純。佢唔似我見盡人間冷暖,佢最多都係見過港九新界嘅地址,你一講地址以外嘅事佢就唔識,佢又好易信人喎,佢想好似我咁咁多見識。

「郵票冇同你講啲咩呀嘛?」

「佢問我有冇見過今年賀歲生肖郵票嘅設計,佢話好靚。」

郵票最叻就係咁係博人睇佢有幾靚呀啦,成日換新款,開口埋口話咩特別款,咩全球限量。

膚淺。雖然唔係封封信都係咁有善意,尤其係稅單,啲人一打開份稅單都係問候人地老母。但係我都見過有啲文筆好好嘅人,佢地寫手字真係一流,邊係區區郵票上面嘅圖案比得上嘅野。

「唔好成日痴埋佢度啦,佢淨係識呢啲冇營養嘅野。」

「但係我地真係痴埋左一齊。」

「…咁如果佢對你郁身郁勢你記得大叫。」

我好想搵次當面同郵票對質,但係每次見到信封同佢痴埋一齊個樣我就冇聲出。

直到有一次,有人將郵票同我一齊擺入信封裡面。個一封係一封寄入監獄嘅信,郵票係為左回信個陣擺嘅。難得終於可以同郵票單獨相處,但係當我知道封信嘅內容嘅時候就靜左落嚟,郵票睇完封信之後都冇野講。

「……唔好喊啦,你再喊你身上啲膠水就會溶架啦,痴左落我度咁點算呀…」

「…其實睇真啲,你身上啲圖案又幾靚嘅,邊度嚟架?」

「…香港…….」

「喂,我係想扯開話題架,唔係叫你喊多兩錢重…」

「香港真係好靚架…」

「我知,但係都唔洗喊架…」

「最衰都係你…你提醒左我佢依家睇唔到有幾靚啦…」

「佢睇到…佢係你身上咪睇到囉…」

個次之後我好似明多左郵票,我諗起之前有人係我身上寫

「有的人環遊世界,但他什麼都看不見。有的人一生從沒離開過他所住的小村莊,但他卻看到了全世界。」

可能郵票身上嘅圖案對一啲人嚟講係希望,透過佢可以見到呢個世界。

之後我同信封,郵票都保持住呢段三角關係,不過…我地之間個三角形有啲唔同左,我可能變左個個90度…

「郵票佢今次又係咩款呀?......係呀,佢又幾靚喎……」

---------------------------------------------------------------------------

Free writing筆留手 《信封、信紙與郵票的三角關係》

10/01/2022

#freewriting #freewriting筆留手 #我係無聊嘅時候寫歡迎你無聊嘅時候睇

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论