勉強點會有幸福

(寫於 2018 年，當時香港民族黨被取締。今天回望，只有更深刻。）

（當時仲係一個暗角七警及朱經緯可以入到罪嘅年代。文中伸縮警棍呢個梗便來自朱經緯案）

陳浩天單嘢，我係咁樣解讀嘅。

＋＋＋＋＋＋

男女感情漸淡，因為個女嘅太專制，控制慾又強⋯⋯有錢就係任性果種。個男仔頂唔順，嗌分手。

「講乜手都好，但呢兩個字萬萬唔可以講出口！」女仔咁話。

「咁你可唔可以咪管住晒，我嘅生活自己話事先？」

「可以，但係要按部就班咁開放囉。」

於是大家試行一段時間，但係個男仔出街嘅時間表，係由女仔話事嘅。電腦，要好誠實咁喺個女仔監督下使用；食飯，ABC餐三個選項，個女仔定嘅。銀行戶口都唔俾開，要用聯名果個；啲錢點洗？唔洗講，梗係都由個女仔話事啦，但佢攞晒去買佢親戚公司出品嘅山塞名牌袋。

咁樣，係可以行屍走肉咁生存到嘅，但唔係個男仔理想中嘅生活囉。

「又話可以傾嘅？」

「可以呀！」

於是個女仔搵埋班姊妹團嚟，同個男仔當面理論。男仔一咀難敵眾口，唔夠票。

「我嚟搵啲兄弟嚟一齊傾！咁先可以代表到我嘅意見！」

「你邊有兄弟呀？」女仔陰陰咀笑。「俾我 DQ 晒咧！」

男仔終於諗通左：「你從第一日開始就喺度昆我，根本冇打算俾我過真正自由嘅生活。其實你褒陸劇，我睇netflix。興趣唔同，品味唔同，溝通嘅語言都唔同。價值觀，我同你更根本唔喺同一層次。何必勉強呢？我覺得分手係解脫嘅唯一出路嚟。」

「你大錯特錯！我地係天生一對。」女仔激列地爭辯。「我嘅前世同我報過夢，話你係我嘅前世！我地係命中註定！」

個男人覺得佢都痴線嘅，拎轉頭就想撇。個女仔死拉住佢唔放。「你邊度都唔去得！你自古以來就係屬於我嘅！」

男仔忍無可忍，舉手便想兜巴扯埋去，但係手舉到半空，女仔大喝：「你敢？！打女人呀？」男仔呆左一呆之際，個女仔唔知幾時手上已多左碌伸縮棍，兜嘢仆左落個男仔個頭度，佢登時好似東方昇咁頭破血流。

「你郁手打我？仲用武器！」

「我隻手唔夠長啫，呢件係工具。工具呀！」個女子雙眼圓瞪，理直氣壯。「先撩者賤，打死無怨呀！而且碌棍係我阿爺俾我用嚟專打小人嘅！」

個男仔無計可施，對面又有十幾億⋯⋯身家嘅姊妹團坐鎮，唯有屈服，等候個女仔宣判⋯⋯宣佈婚期。

做男人做都咁都夠失敗咯。就喺Bachelor Dinner 果晚，佢有個老死 ABC 聽完佢嘅遭遇，好同情咁搭一搭佢膊頭話：”I know that feeling, brother!" 個 ABC 打算同佢做個婚前回憶錄，喺佢進入婚姻嘅牢籠之前，將佢嘅心路歷程喺牆外嘅 Facebook 些牙下出嚟。就喺佢地入左房準備⋯⋯錄影果陣，出面突然傳出班姊妹叫囂嘅聲音。原來，間屋嘅房東又係個女仔嚟，佢真係財雄勢大呀！

「ABC，你咁樣做，攪亂我地場婚禮，傷害晒我全班姊妹嘅感情！我要重新檢討仲租唔租間屋俾你住！你躝番老美啦，外國勢力！」