DuncanLau
DuncanLau

岀生及成長於香港,旅居加拿大25年後回流。兩地生活文化的差異與衝擊,一邊是多元文化,一邊是中西匯集,從一邊看過去另一邊,算是多重國際視野。

識計數㗎,呵!

(edited)
完善與否,原來繼續紙上談兵,講咗就係。

「你講嘢呀?」原來真係,嘢可以亂食,說話一樣可以亂講。今日的我,打倒昨日的我,完全冇問題。求其講句:有啲人話喎,唔係我話㗎,就唔駛負責任。同其他部門講嘅唔同,只係各自表述,冇衝突。公,就佢贏,字,當然係你輸。所以,高投票率定低投票率,佢哋一定兜到。

Photo by Mika Baumeister on Unsplash

醜婦終須見家翁,唔係我講,人哋係咁講。

其實,投票率高定低,識計數嘅,一眼就計出嚟。上屆有35個直選議席,今屆只得番20席,咁投票率點可能高得過上屆?就係咁簡單之嘛,解釋咁多做乜。

上屆有啲選區,會有九個候選人爭五席嘅情況,雖然選舉設定上,建制同泛民都冇可能全取某區的議席,雙方大概會各穩得兩席,但最後一席仍是可以爭持激烈,未到最後一刻都未知鹿死誰手。就好似一場波利物浦對曼聯,勢均力敵,各有擁躉,賭波嘅注數同注碼都一定又高又大,咁係好自然嘅事。因此到最後關頭,大家都出力拉票,個個都話告急,呢啲氣氛,係唔可以生安白做出嚟嘅。

而家賽制完善哂,只係同一隊人分成A隊同B隊比賽,毫無比賽氣氛,球迷重會落注?真係睬你都儍啦。剩番20個議席,重設計到冇政黨可以全取每區全部議席(即係即使重有泛民候選人,佢哋最多只可得十席),同內定,欽點或委任有乜分別?有啲叫做競爭激烈嘅區,由四個人爭兩席,大家一睇佢哋嘅背景同後台,就已經知道係毫無懸念,但係居然重有人好意思大聲疾呼話自己告急,真係現代版嘅「狼來了」!小心,孤狼出沒!

而當中算最有名氣的,是其中港島候選人,爭取連任嘅,由於呢輪經常路過灣仔,銅鑼灣,北角甚至西灣河,幾乎每個街角都見到佢嘅宣傳,如果佢咁都冇超過選舉經費上限,咁即係話資源非常豐富,而其他候選人(特別係冇政黨背景個啲)一定冇咁有錢,但呢位仁兄重一早印定Banner,上面大大隻字就係「選情告急」,未開始選已經通街掛,好唔好意思呀?

而且告急喺乜嘢意思?你就嚟贏唔到,要靠我一票扭轉形勢?選舉唔係靠政績,靠你政治理念嘅咩?係,我知你冇,但响咁嘅選舉制度之下,佢又冇理由選唔到喎,四個人爭兩個位之中一個,如果佢入唔到,咁應該認命啦。又或者問吓自己,做咗立法會議員咁多年,有啲乜嘢成績係見得人吓呢?佢上一次個論壇度,比另一個候選人質問,上個月响立法會通過一筆千幾億嘅撥款,係乜嘢事項嘅撥款,佢完全答唔到!大拿拿千幾億,就係比啲橡皮圖章通過咗,已經完全冇咗件事,重點去監察正苦,替市民把關?係,佢當時係好樣衰,但應該對佢冇影響,因為完善嘅制度,就係要保護呢啲咁嘅廢物,特別係咁忠誠嗰啲。

如果重有乜嘢係叫人側目嘅,就係見到一隊警員荷槍實彈响某啲票站戒備,佢哋究竟想話比人聽乜嘢?咁危險嘅地方,大家喺咪應該遠離?我今朝落街,雖然未見到有荷槍實彈嘅情況,但一隊警員個個着哂避彈衣巡鑼,如臨大敵咁,我哋冇做過選舉咩?幾十多年來,乜事都冇,而家喺咪重衰咗?如果真係咁驚,你唔出嚟係安全囉。其實如果真係有危險,都應該係啲候選人呀,出嚟投票個啲人啦,理論上,佢哋應該着避彈衣先至啱。如果選民嚟到票站,立即獲派一件避彈衣,心裡面一定踏實好多。你咁想人出嚟投票,都要顧住人地嘅安全先得㗎,講到咁危險!

重話講到要展示比人睇,呢種選舉方式,比美國嗰種更優秀,但處處顯示出嚟就完全相反。今日嘅金句係,上次區選高投票率係假民主,今日呢啲先係真民主。喂呀,人哋識計數㗎!

CC BY-NC-ND 2.0

Like my work?
Don't forget to support or like, so I know you are with me..

所謂政綱

難為正邪定分(國)界

Loading...

Want to read more ?

Login with one click and join the most diverse creator community.