DuncanLau
DuncanLau

岀生及成長於香港,旅居加拿大25年後回流。兩地生活文化的差異與衝擊,一邊是多元文化,一邊是中西匯集,從一邊看過去另一邊,算是多重國際視野。

巴X閉嚟啦!

講真,「巴閉」呢個詞都算老套,冇一百都有幾十年歷史嘅廣東話,突然之間成日聽到,之唔係一個人成日覺得自己好L巴閉囉!

據我了解,當日提出「攬炒」之時,真的要終極攬炒,其實最後幾步,是要看執權的一方如何反應,他們有足夠能力和權力去阻止,扭轉形勢,但同一時間,他們同樣有足夠能力和權力去加快步伐,所以有「加速師」之說。內地的加速師固然令人側目,而且頻頻發功,而香港的加速師亦不遑多讓!

有成日好巴閉人士,突然宣稱:「據我了解,抗體唔係數字越高越巴閉,夠用就得。」嘩,佢唔係引用乜嘢專家數據嚟説服大家,佢只係自言自語,然後潛台詞係:你睇我幾叻!但如果夠就得,你做乜谷人打多針?佢其實暗示打兩劑科興係唔夠?隨便講兩句就亂七八糟,令人覺得佢自以為是,氣焰囂張,係啦,知你巴X閉啦!呢句嘢,最可圈可點嘅,就係佢劈頭就講明「據我了解」,即係係佢自把自為,與其他人無關。

講開又講,呢類獨行獨段嘅人總係成日獨家村咁,而佢又好似若無其事咁喎。譬如最近跌親入院,由入院到出院,全程都唔見佢家人出現,有冇有啲奇怪呢?換咗第個,嗰老婆,嗰亞媽跌親,就算唔係現場,一聽到重唔飛身去醫院睇吓咩?重要係跌親手,重唔留响身邊侍候,餵飲餵食咩?呢個香港第一家庭,古古怪怪,似愛登士家庭多啲。

而且呢啲唔止一次,今年中秋,佢派月餅比傳媒,順便送一張卡通人物造型的賀咭。呢個擺明人月兩團圓嘅日子,中國人又話做節,一家人齊齊整整慶祝,佢張賀咭只有佢孤家寡人,攞住個燈籠同月餅,強顏歡笑,真係聞者傷心見者流淚。定係,有人認為,據佢了解,佢一個已經夠殺有餘,夠就得呢?

响外國,領導人不時同另一半一齊亮相,甚至响聖誕賀詞中,帶埋子女一齊向國民祝賀,都係軟實力嘅一種。英國皇室成員自然係識玩嘅一班,而美國總統們,在任期間,大家總有機會見到佢嘅家庭成員,甚至連第一狗仔都成日上鏡。而另一半通常有好多慈善社會活動,算係幫總統建立及保持形象。事實上,香港政府係有撥款比特首另一半,去從事這類活動,以前三首特首夫人都有經常出席此類活動,但現任的,就幾乎沒有,甚至他是否住在香港,我們也無從知道。

佢經常話得到家人支持,但從來沒有一個家人出來說過一句支持,説服力欠奉。而這種經常獨家村的情況,更加深佢那種獨行獨斷的形象,加上佢自以為是,有錯必推比人,有功歸自己,經常喜怒形於色,又有仇必報的心態。而近期更萬事以中央為宗,從不以香港角度考慮,香港加速師之名已落實。而現時,所謂的反對派大都成了階下囚,反對聲音近乎零,剩下能發聲的,礙於時勢,忠言不會入耳,慳返啖氣。其餘的是受益者,啦啦隊,只會附和(不排除他們根本無法思考),因此在一些人眼中,是意氣風發,形勢一片大好,更加心雄,不在話下。

近日政府推出這款「新局面新氣象」推廣廣告,Are they Serious? 這樣簡陋寒酸的設計,看上去還有點七、八十年代feel,何來新?新响邊?而且咁樣嗌兩句口號,有乜實際作用?不過,當一切在沉淪,還有甚麼可以免疫。攬炒正在進行中,加速師在發功,大勢所趨,不幸的是,很多無辜的人會受牽連,也是無可避免。

你睇,巴X閉嚟啦!大家坐穏!


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论